गुरुवार, 29 ऑक्टोबर 2026
Ramayanam Song Judy Jodi: (फोटो सौजन्य- सोशलमीडिया)
ए. आर. रहमान यांचे संगीत आणि डॉ. कुमार विश्वास यांच्या शब्दांनी सजलेले हे गाणे भक्ती, विश्वास आणि आयुष्यभर साथ निभावणाऱ्या प्रेमाचा उत्सव साजरा करते. हे गाणे पाच भाषांमध्ये प्रदर्शित होत आहे. Ramayanam Song Judy Jodi:
करवा चौथच्या खास मुहूर्तावर नमित मल्होत्रा यांचा ‘रामायणम्’ हा चित्रपट प्रेक्षकांना ‘जुडी जोडी’ या नव्या गाण्याच्या माध्यमातून प्रभू श्रीराम आणि माता सीता यांच्या प्रेमकथेशी जोडणार आहे. हे गाणे ‘वर्ल्ड ऑफ रामायणम्’ आणि टी-सीरिजच्या अधिकृत यूट्यूब चॅनेलवर प्रदर्शित करण्यात आले आहे. तसेच, करवा चौथच्या पवित्र मुहूर्तावर हे गाणे सर्व प्लॅटफॉर्मवरही उपलब्ध होणार आहे. विश्वासावर टिकून असलेले नाते, श्रद्धा आणि आयुष्यभर एकमेकांची साथ देण्याचे वचन या गाण्यातून व्यक्त होते. पती-पत्नीच्या नात्यातील प्रेम आणि समर्पणाला समर्पित असलेल्या या खास दिवशी गाणे प्रदर्शित झाल्यामुळे या उत्सवाचे महत्त्व आणखी वाढले आहे.
‘रामायणम्’मध्ये रणबीर कपूरने प्रभू श्रीरामांची, तर साई पल्लवीने माता सीतेची भूमिका साकारली आहे. ‘जुडी जोडी’ या गाण्यातून राम आणि सीता यांच्या नात्यातील गोडवा, जिव्हाळा आणि आपलेपणा अनुभवायला मिळतो. त्यांच्या विवाहसोहळ्यातील सुंदर क्षणांवर आधारित हे गाणे केवळ प्रेमाचीच नव्हे, तर एका दिव्य नात्याचीही अनुभूती देते. वचन, विश्वास आणि आयुष्यभर एकमेकांची साथ निभावण्यासारखी मूल्ये या गाण्यातून अधोरेखित होतात. याच मूल्यांमुळे या पूजनीय जोडीची प्रेमकथा अजरामर झाली आहे.
ए. आर. रहमान यांनी संगीतबद्ध केलेल्या आणि डॉ. कुमार विश्वास यांनी लिहिलेल्या ‘जुडी जोडी’ या गाण्यातील शब्द, संगीत आणि काव्याच्या माध्यमातून राम आणि सीता यांच्या पवित्र नात्यातील भावविश्व आणि त्याची खोली सुंदररीत्या उलगडली आहे. हे गाणे केवळ हिंदीतच नव्हे, तर तमिळ, तेलुगू, मल्याळम आणि कन्नड या भाषांमध्येही उपलब्ध होणार आहे. त्यामुळे देशभरातील प्रेक्षकांना या उत्सवात सहभागी होता येईल.
या गाण्याच्या हिंदी आवृत्तीला श्रेया घोषालने आवाज दिला आहे, तर तमिळ आवृत्ती हीरने गायली आहे. तेलुगू आवृत्तीला सिरीषा भगवतुला, मल्याळम आवृत्तीला अमृता सुरेश आणि कन्नड आवृत्तीला पूजा वैद्यनाथ यांनी आपला आवाज दिला आहे. या पाचही आवृत्त्यांचे गीतलेखन डॉ. कुमार विश्वास यांनी केले आहे. याशिवाय, तमिळ आवृत्तीचे बोल कार्तिक नेथा, तेलुगू आवृत्तीचे राकेंदु मौली, मल्याळम आवृत्तीचे विनायक शशिकुमार आणि कन्नड आवृत्तीचे कार्तिक सरगुर यांनी लिहिले आहेत.
चित्रपटाच्या निर्मात्यांनी सोशल मीडियावर ‘जुडी जोडी’ या गाण्याचे पोस्टर शेअर करून त्याच्या प्रदर्शनाची घोषणा केली. यासोबत त्यांनी लिहिले, “या करवा चौथला चिरंतन प्रेमाचा आणि एका दिव्य नात्याचा उत्सव साजरा करा.
‘जुडी जोडी’ हे गाणे आता प्रदर्शित झाले आहे.”
View this post on Instagram
जगभरात सर्वाधिक पूजल्या जाणाऱ्या महाकाव्यांपैकी एक असलेल्या ‘रामायणम्’ची भव्य कथा आता मोठ्या पडद्यावर साकारली जात आहे. या चित्रपटात रणबीर कपूर प्रभू श्रीरामांच्या, साई पल्लवी माता सीतेच्या, रॉकिंग स्टार यश रावणाच्या, सनी देओल हनुमानाच्या आणि रवी दुबे लक्ष्मणाच्या भूमिकेत दिसणार आहेत.
नितेश तिवारी यांच्या दिग्दर्शनाखाली तयार झालेल्या ‘रामायणम्’ची निर्मिती नमित मल्होत्रा यांच्या प्राइम फोकस स्टुडिओजने आठ वेळा ऑस्कर जिंकलेल्या DNEG आणि यश यांच्या मॉन्स्टर माइंड क्रिएशन्स यांच्या सहकार्याने केली आहे. हा चित्रपट दोन भागांमध्ये प्रदर्शित होणार आहे. पहिला भाग ५ नोव्हेंबर २०२६ रोजी, तर दुसरा भाग दिवाळी २०२७ मध्ये जगभरात प्रदर्शित होईल. हे दोन्ही भाग हिंदी, तमिळ, तेलुगू, कन्नड आणि मल्याळम या भाषांमध्ये प्रेक्षकांच्या भेटीला येतील.
Scam 1992: IMDb च्या लोकप्रिय मालिकांच्या यादीत ‘स्कॅम १९९२’ अव्वल; ‘क्रिमिनल जस्टिस’चाही समावेश
सोनी पिक्चर्स भारत वगळता जगभरात या चित्रपटाचे वितरण करणार आहे, तर हिंदी भाषिक बाजारपेठेत धर्मा प्रॉडक्शन्स वितरकाची भूमिका बजावणार आहे. हा चित्रपट जगभरातील IMAX चित्रपटगृहांमध्येही प्रदर्शित होईल. चित्रपटातील गाणी टी-सीरिजच्या संगीत लेबलअंतर्गत प्रदर्शित केली जाणार आहेत.
