File Photo : BJP
नवी दिल्ली : आगामी लोकसभा निवडणूक (Loksabha Election) भाजप 40 मित्रपक्षांच्या सहकाऱ्यांनी लढण्यासाठी सज्ज होत आहे. चंद्राबाबू नायडू यांच्या टीडीपीचाही यात समावेश राहणार आहे. पंजाबमध्ये शिरोमणी अकाली दल, तेलंगणामध्ये बीआरएस यांच्यासोबत भाजपची चर्चा सुरू आहे. हे दोन्ही पक्ष एनडीएमध्ये समाविष्ट होऊ शकतात.
मागील 26 वर्षांत पहिल्यांदाच भाजप एवढ्या मोठ्या प्रमाणात मित्र पक्षांना सोबत घेत आहे. आतापर्यंत 20-22 पक्ष सोबत घेत होते. जुलै 2023 मध्ये दिल्ली येथील अशोका हॉटेलमध्ये पंतप्रधान नरेंद्र मोदी यांच्या नेतृत्वात एनडीएची बैठक झाली होती. त्या 38 पक्षांना बोलाविण्यात आले होते. या पक्षांतील अनेक पक्षांना राजकीय जनाधार नव्हता. त्यानंतर ‘इंडिया’ आघाडीची स्थापना झाली व सात महिन्यात भाजपने एनडीएचे स्वरूप पूर्णपणे बदलवले. आता एनडीएमध्ये जनता दल यूनाइटेड, जनता दल सेक्युलर आणि आरएलडीसारखे मोठे पक्ष सहभागी झाले आहेत.
हे घटक पक्ष आहेत सामील
भाजपच्या नेतृत्वातील एनडीएमध्ये सध्या शिवसेना (एकनाथ शिंदे), पीजेपी, राष्ट्रवादी काँग्रेस पक्ष (अजित पवार), आरआयपी (आठवले), जेडीयू, आरएलजेडी, एलजेपी-रामविलास, आरएलजेपी, एचएएम (बिहार), एजेएसयू (झारखंड), आरएलडी, सुभाषपा, अपना दल-सोनेलाल आणि निषाद पार्टी (उत्तर प्रदेश), हरियाणा मधु जेजेपी.
कोणत्या राज्यात प्रभावी ?
भाजप सध्या स्थितीत उत्तर प्रदेश, गुजरात, मध्य प्रदेश, राजस्थान, छत्तीसगड, उत्तराखंड, अरुणाचल, गोवा, त्रिपुरा या राज्यात प्रभावी आहे. येथे भाजपचे सरकार आहे. याशिवाय भाजप बिहार, महाराष्ट्र, सिक्किम, मेघालय या राज्यात सरकारमध्ये दुसऱ्या स्थानी आहे. झारखंड, बंगाल, हिमाचल, कर्नाटक मध्येही भाजपचा मोठा जनाधार आहे. दक्षिण भारतात तेलंगाना, तामिळनाडु, जम्मू-काश्मीरमध्ये भाजपला जनाधार आहे.
एनडीएचे घटक पक्ष असलेला जेडीयू, लोजपा (दोन्ही गट) बिहारमध्ये, हम आणि आरएलजेडी, महाराष्ट्रात शिवसेना (शिंदे गट), राष्ट्रवादी काँग्रेस (अजित पवार) यांचा मजबूत जनाधार आहे. यासोबतच उत्तर प्रदेशात अपना दल (सोनेलाल), आरएलडी, निषाद पार्टीसह सुभाषपा या स्थानिक पक्षांचाही मोठा प्रभाव आहे. कर्नाटकमध्ये जेडीएस तिसऱ्या क्रमांकाचा पक्ष आहे.
