जयपूर : राजस्थान पोलिस उपनिरीक्षक भरती परीक्षा 2021 च्या पेपर लीक प्रकरणात डझनहून अधिक उपनिरीक्षकांना अटक करण्यात आली आहे. ते सध्या कोठडीत असून, या प्रकरणी दररोज नवनवे खुलासे समोर येत आहे. प्रत्यक्षात या भरतीत निवड झालेल्या उपनिरीक्षकांनी सादर केलेल्या पदव्या आता बनावट असल्याचे दिसून येत आहे.
सध्या या संपूर्ण प्रकरणाचा तपास राजस्थान पोलिसांच्या स्पेशल ऑपरेशन ग्रुप, एसओजीकडून केला जात आहे. एसओजीने अटक केलेल्या 14 उपनिरीक्षकांची कागदपत्रे तपासली असता त्यात अनियमितता आढळून आली.
2010 मध्ये झालेल्या उपनिरीक्षक भरती परीक्षेत 370 उपनिरीक्षकांची निवड झाली होती. त्यापैकी 138 उपनिरीक्षकांच्या निवडीवर प्रश्न उपस्थित करण्यात आले होते. आरोपींना अटकही झाली पण योग्य कारवाई झाली नाही. तथापि, 40 जणांची ओळख पटली आहे, ज्यांची पदवी संशयास्पद वाटत होती. त्याची संपूर्ण चौकशी केली असता 23 उपनिरीक्षकांच्या पदव्या बनावट असल्याचे आढळून आले. त्याची संपूर्ण चौकशी होणे बाकी आहे. त्यानंतरच या संपूर्ण प्रकरणावर कारवाई होईल.
आरोपी जगदीशला 2014 मध्ये एसओजीकडून अटक
नुकत्याच झालेल्या उपनिरीक्षक भरती पेपर लीक प्रकरणात अटक करण्यात आलेल्या आरोपी जगदीशला 2014 मध्ये एसओजीनेही अटक केली होती. त्यादरम्यान त्याच्याकडे कॉपीसाठी हायटेक रिसोर्सेसही होती. मात्र, त्यावेळी एसओजीने त्याच्यावर कोणतीही कडक कारवाई केली नाही आणि जामिनावर तुरुंगातून सुटल्यानंतर जगदीश वेगवेगळ्या पद्धतीने कॉपी करू लागला.
