मंगळवार, 18 ऑगस्ट 2026
२१ राज्यांमध्ये ९ तासांत मुसळधार पावसाचा इशारा, (File Photo)
नवी दिल्ली : गेल्या काही दिवसांपासून वातावरणात कमालीचा बदल पाहिला मिळत आहे. काही ठिकाणी मुसळधार पाऊस तर काही ठिकाणी तुरळक पाऊस होत आहे. त्यातच हवामान विभागाने महत्त्वाचा इशारा दिला आहे. हवामान विभागाच्या अंदाजानुसार, महाराष्ट्र, उत्तर प्रदेश आणि बिहारसह 21 राज्यांसाठी मेघगर्जनेसह पावसाचा इशारा जारी करण्यात आला आहे. नागरिकांना अत्यंत सतर्क राहण्यास सांगण्यात आले आहे.
शेतकरी आणि मच्छिमारांना सुरक्षित ठिकाणी जाण्याचा सल्ला देण्यात आला आहे. पूर्व भारतातील राज्यांसाठी विजांचा कडकडाट आणि मेघगर्जनेसह पावसाचा इशारा जारी करण्यात आला आहे. या काळात ताशी ७० ते ७५ किमी वेगाने जोरदार वारे वाहण्याची शक्यता आहे. काही राज्यांमध्ये गारपिटीचाही इशारा देण्यात आला आहे. काही राज्यांमध्ये, जोरदार वादळामुळे मोठी झाडे उन्मळून पडू शकतात. या धोकादायक पावसामुळे शेतकऱ्यांच्या पिकांचेही नुकसान होऊ शकते, असेही सांगण्यात आले.
दरम्यान, उत्तर हरियाणा आणि आसपासच्या भागांवर वरच्या हवेतील चक्रीय वाऱ्यांची स्थिती कायम आहे. याशिवाय, मध्य राजस्थानवरही वरच्या हवेतील चक्रीय वाऱ्यांची स्थिती कायम आहे.
कोणत्या राज्यांना दिला इशारा?
उत्तर प्रदेश, बिहार, दिल्ली, राजस्थान, हरियाणा, उत्तराखंड, पंजाब, हिमाचल प्रदेश, जम्मू आणि काश्मीर, झारखंड, पश्चिम बंगाल, ओडिशा, मध्य प्रदेश, छत्तीसगड, गुजरात, महाराष्ट्र, आसाम, केरळ आणि आंध्र प्रदेश या राज्यांत पावसाचा अंदाज आहे.
