इंधन तुटवड्याच्या अफवा आणि इराण युद्धाचे सावट; पंतप्रधान मोदींची मुख्यमंत्र्यांसोबत महत्त्वाची बैठक, ‘या’ मॉडेलवर भर

इराण युद्धाच्या सावटाखाली पंतप्रधान मोदींनी मुख्यमंत्र्यांसोबत घेतली महत्त्वाची बैठक. इंधन तुटवड्याच्या अफवा रोखण्यासाठी 'टीम इंडिया' मॉडेलवर भर आणि देशातील पेट्रोल-डिझेल साठ्याचा आढावा.

• इंधन तुटवड्याच्या अफवा आणि इराण युद्धाचे सावट
• पंतप्रधान मोदींची मुख्यमंत्र्यांसोबत महत्त्वाची बैठक
• ‘या’ मॉडेलवर भर

PM Modi Meeting CM Fuel Crisis: पश्चिम आशियातील इराण युद्धाच्या पार्श्वभूमीवर निर्माण झालेली जागतिक परिस्थिती आणि देशातील इंधन पुरवठ्यावर होणारा त्याचा परिणाम, यावर चर्चा करण्यासाठी पंतप्रधान नरेंद्र मोदी (PM Narendra Modi) यांनी सर्व राज्यांच्या मुख्यमंत्र्यांसोबत ‘व्हर्च्युअल’ बैठक घेतली. इंधन टंचाईच्या अफवा रोखणे आणि पुरवठा साखळी सुरळीत ठेवणे हा या बैठकीचा मुख्य उद्देश आहे. या महत्त्वपूर्ण बैठकीत पाच राज्यांचे मुख्यमंत्री सहभागी झाले नाहीत. पश्चिम बंगाल, केरळ, तामिळनाडू, आसाम आणि पुद्दुचेरी या राज्यांमध्ये आगामी निवडणुकांचे वारे वाहत असल्याने, येथील मुख्यमंत्र्यांनी या बैठकीला हजेरी लावली नाही. इतर सर्व राज्यांच्या मुख्यमंत्र्यांशी संवाद साधताना पंतप्रधानांनी इंधन सुरक्षेबाबत सविस्तर आढावा घेतला.

इंधन टंचाईच्या अफवांनी नागरिकांमध्ये घबराट

पश्चिम आशियातील युद्धामुळे भारतात पेट्रोल-डिझेल संपणार असल्याच्या वावड्या सोशल मीडियावर उठल्या आहेत. या अफवांमुळे अनेक राज्यांमध्ये पेट्रोल पंपांवर लांबच लांब रांगा पाहायला मिळत आहेत. काही नागरिक भविष्यातील टंचाई लक्षात घेऊन मोठ्या टाक्यांमध्ये डिझेल भरून साठवणूक करत आहेत. यामुळे गरजू ग्राहकांना इंधन मिळणे कठीण झाले आहे. केंद्र सरकारने पुन्हा एकदा स्पष्ट केले आहे की, देशात पेट्रोल-डिझेलचा कोणताही तुटवडा नाही आणि साठा पुरेसा आहे.

See more

PM Narendra Modi is chairing the meeting with CMs through video conferencing on the West Asia conflict to review preparedness and plans of states. pic.twitter.com/pqJS3iCgro — ANI (@ANI) March 27, 2026

Lockdown India: देशात पुन्हा लॉकडाऊन? सोशल मीडियावरील अफवांवर केंद्र सरकारचा मोठा खुलासा

‘स्ट्रेट ऑफ हॉर्मुज’ आणि पुरवठ्यातील आव्हाने

भारत आपल्या गरजेचा मोठा हिस्सा कच्च्या तेलाच्या स्वरूपात पश्चिम आशियाई देशांतून आयात करतो. एलपीजी (LPG) आणि पीएनजी (PNG) साठीही आपण याच देशांवर अवलंबून आहोत. कच्च्या तेलाचे टँकर प्रामुख्याने ‘स्ट्रेट ऑफ हॉर्मुज’ (Strait of Hormuz) मधून येतात. युद्धामुळे या मार्गावर टँकर्सच्या हालचालींवर मर्यादा आल्या आहेत. दिलासादायक बाब म्हणजे, इराणने भारताकडे येणाऱ्या टँकर्सना या मार्गावरून जाण्यासाठी विशेष सवलत दिली आहे, ज्यामुळे पुरवठा पूर्णपणे खंडित झालेला नाही.

कोरोनाकाळातील ‘टीम इंडिया’ मॉडेलची पुनरावृत्ती

पंतप्रधान मोदींनी या संकटाचा सामना करण्यासाठी पुन्हा एकदा ‘टीम इंडिया’ मॉडेलचा मंत्र दिला आहे. कोरोना महासाथीच्या काळात केंद्र आणि राज्य सरकारांनी ज्या प्रकारे एकत्रितपणे काम केले होते, तशीच रणनीती आताही वापरली जाणार आहे. राज्यांना आवश्यक त्या प्रमाणात इंधन आणि गॅसचा पुरवठा सुनिश्चित करणे. मिळालेल्या इंधनाचे जनतेमध्ये सुयोग्य वितरण करणे आणि अफवा पसरवणाऱ्यांवर कायदेशीर वचक बसवणे. कोरोना काळात औषधे आणि मास्कवर भर होता, आता इंधन आणि एलपीजीच्या उपलब्धतेवर लक्ष केंद्रित केले जात आहे  “इराण युद्धाने निर्माण झालेल्या आव्हानांना तोंड देण्यासाठी आपल्याला कोरोनाकाळाप्रमाणेच संघटित होऊन काम करावे लागेल,” असे आवाहन पंतप्रधानांनी या बैठकीत केले.

India Fuel Supply News: देशात इंधनाचा मुबलक साठा, अफवांवर विश्वास ठेवू नका! पेट्रोलियम मंत्रालयाचे स्पष्टीकरण