सौजन्य - ICC महिला टी-20 विश्वकप सेमीफायनलसाठी चार संघ निश्चित; हे संघ एकमेकांशी भिडणार, पाहा उपांत्यफेरीचे संपूर्ण शेड्यूल
T20 WC Semi Final Schedule : ICC महिला टी-20 विश्वचषक 2024 च्या उपांत्यफेरीच्या सामन्यांना सुरुवात झाली आहे. उपांत्य फेरीसाठी चार संघ निश्चित झाले आहेत. या स्पर्धेच्या साखळी टप्प्यात अनेक मोठे अपसेट पाहायला मिळाले, ज्यामध्ये हरमनप्रीत कौरच्या नेतृत्वाखालील भारतीय संघ उपांत्य फेरीत पोहोचू शकला नाही. याशिवाय इंग्लंड हा दुसरा मोठा संघ ठरला जो अंतिम चारमध्ये स्थान मिळवू शकला नाही. 17 ऑक्टोबरपासून उपांत्य फेरीला सुरुवात होणार आहे. अशा परिस्थितीत, महिला T20 विश्वचषक स्पर्धेत कोणते चार संघ उपांत्यफेरीत पोहोचले आहेत आणि त्यांच्यात कधी सामना होईल हे जाणून घेऊया.
उपांत्य सामना ऑस्ट्रेलिया आणि दक्षिण आफ्रिका यांच्यात होणार
ICC महिला T20 विश्वचषक स्पर्धेतील पहिला उपांत्य सामना ऑस्ट्रेलिया आणि दक्षिण आफ्रिका यांच्यात होणार आहे. ऑस्ट्रेलियाचा संघ अ गटात होता तर दक्षिण आफ्रिकेने ब गटातून उपांत्य फेरीत प्रवेश केला आहे. 17 ऑक्टोबर रोजी ऑस्ट्रेलिया आणि दक्षिण आफ्रिका यांच्यात सामना होणार आहे. या सामन्यासाठी दोन्ही संघ दुबई आंतरराष्ट्रीय क्रिकेट स्टेडियमवर मैदानात उतरतील.
चारही सामने जिंकून गुणतालिकेत पहिल्या स्थानावर
अ गटात ऑस्ट्रेलियन संघ साखळी टप्प्यातील चारही सामने जिंकून गुणतालिकेत पहिल्या स्थानावर आहे. तर दक्षिण आफ्रिकेने चारपैकी तीन सामने जिंकून गुणतालिकेत दुसरे स्थान पटकावले होते. पहिला उपांत्य सामना जिंकणारा संघ रविवार, 20 ऑक्टोबर रोजी खेळल्या जाणाऱ्या अंतिम फेरीत प्रवेश करेल. दुबई आंतरराष्ट्रीय क्रिकेट स्टेडियमवर अंतिम सामना होणार आहे.
दुसऱ्या उपांत्य फेरीत न्यूझीलंड विरुद्ध वेस्ट इंडिज यांच्यात लढत
स्पर्धेतील दुसरा उपांत्य सामना 18 ऑक्टोबर रोजी शारजाह क्रिकेट मैदानावर खेळवला जाईल. दुसऱ्या उपांत्य फेरीत न्यूझीलंड आणि वेस्ट इंडिज यांच्यात लढत होणार आहे. न्यूझीलंड संघाने अ गटातील चारपैकी चीनचा सामना जिंकला होता आणि गुणतालिकेत ऑस्ट्रेलियानंतर ६ गुणांसह दुसऱ्या स्थानावर होता. तर वेस्ट इंडिजचा संघ ब गटातील अव्वल संघ आहे. वेस्ट इंडिजनेही चारपैकी तीन सामने जिंकले, पण चांगल्या धावगतीमुळे ते दक्षिण आफ्रिकेच्या बरोबरीच्या गुणांसह गुणतालिकेत पहिल्या स्थानावर राहिले.
