सातारा : जिल्हा बँकेच्या निवडणुकीसाठी (Satara District Bank Election) अद्याप राजकीय पातळीवरून कोणतीच हालचाल झालेली नाही. पण, मुंबईत काल विधान परिषदेचे सभापती रामराजे नाईक-निंबाळकर (Ramraje Naik Nimbalkar) यांच्या निवासस्थानी राष्ट्रवादीच्या प्रमुख नेत्यांची प्राथमिक बैठक पार पडली. यामध्ये शिवेंद्रसिंहराजेंना सोबत घेऊन निवडणूक बिनविरोध करण्याबाबत चर्चा झाल्याचे समजते. तसेच आमदार शिवेंद्रसिंहराजे भोसले व शशीकांत शिंदे यांच्यात सातारा-जावळीवरून सुरू असलेला वाद शांत करण्याचा प्रयत्न सभापती रामराजेंनी केल्याचे सांगितले जात आहे. मात्र, हे नेमकं कितपत खरं हे निवडणुकीदरम्यान स्पष्ट होणार आहे.
सातारा जिल्हा बँकेच्या निवडणुकीसाठी अंतिम मतदार यादी तयार आहे. पण, कच्च्या यादीतील खासदार रणजितसिंह नाईक-निंबाळकर व आमदार जयकुमार गोरे यांचे पाणीपुरवठा मतदारसंघातून पात्र ठरलेले ठरावांविरोधात उच्च न्यायालयात याचिका दाखल झालीय. त्यामुळे यावर न्यायालयाचा निर्णय होत नाही, तोपर्यंत यादी प्रसिध्द करू नयेत, अशी सूचना न्यायालयाने केल्याने अंतिम मतदार यादी लटकलीय. जिल्हा बँकेच्या निवडणुकीसाठी राष्ट्रवादी काँग्रेसच्या नेत्यांकडून अद्याप कोणतीही बैठक घेतलेली नाही.
अंतिम मतदारयादी प्रसिध्द झाल्यानंतरच प्रमुख नेत्यांची बैठक होऊन आगामी रणनीती ठरविली जाणार होती. मात्र, रिझर्व्ह बँक व नाबार्डची नवीन नियमावली संदर्भात नेमकी काय भूमिका घ्यायची, तसेच इतर मतदारसंघातील विषयासंदर्भात चर्चा करण्यासाठी काल मुंबईत विधान परिषदेचे सभापती रामराजे नाईक-निंबाळकर यांच्या निवासस्थानी राष्ट्रवादीच्या प्रमुख नेत्यांची प्राथमिक बैठक झाली. या बैठकीला पालकमंत्री बाळासाहेब पाटील, आमदार शशिकांत शिंदे, मकरंद पाटील, भाजपचे आमदार शिवेंद्रसिंहराजे भोसले उपस्थित होते.
