Diwali 2025 : दिवाळीत फराळात बनवा कुरकुरीत आणि मसालेदार ‘कुरमुऱ्यांचा चिवडा’; फार सोपी आहे रेसिपी

Chivda Recipe : दिवाळीच्या फराळात कुरकुरीत आणि तिखट चवीचा चिवडा हा सामील व्हायलाच हवा. संध्याकाळच्या चहासोबत हा चिवडा चवीला फार छान लागतो आणि अनेक महिने साठवूनही ठेवला जातो.

“दिवाळी म्हटली की घराघरात फराळाचा सुगंध दरवळायला लागतो. शंकरपाळे, लाडू, करंजी, चकली, चिवडा… हे पदार्थ म्हणजे आनंदाचा मेजवानी! या सगळ्या फराळामधील एक हलका, खमंग आणि कुरकुरीत पदार्थ म्हणजे कुरमुऱ्यांचा चिवडा. हा चिवडा केवळ चविष्टच नाही तर झटपट तयार होणारा आणि हलका नाश्त्याचा उत्तम पर्याय आहे. गोड आणि तिखट फराळाच्या मधोमध असा हलका चिवडा खाल्ल्यावर मन ताजेतवाने होतं. शिवाय हा पदार्थ दीर्घकाळ टिकतो आणि प्रवासातही सहज नेता येतो.

राजस्थानचा फेमस पदार्थ डाल ढोकाळी कधी चाखली आहे का? चवीसह आरोग्यासाठीही फायदेशीर आहे ही डिश

मुरमुरे चिवडा बनवताना घरभर जो सुवास दरवळतो, तो दिवाळीची खरी चाहूल देतो. तेलात फोडणी देताना मोहरी तडतडते, कढीपत्ता खमंग सुगंध पसरवतो आणि मुरमुरे, शेंगदाणे, डाळे या सगळ्यांच्या एकत्र चवीतून तयार होतो एक परफेक्ट खमंग चिवडा! चला जाणून घेऊया यासाठी लागणारे आवश्यक साहित्य आणि कृती.

साहित्य:

• मुरमुरे – ४ कप
• शेंगदाणे – ½ कप
• चणाडाळ (भिजवलेली व वाळवलेली) – ¼ कप
• कढीपत्ता – १०-१२ पाने
• हिरव्या मिरच्या – ३ ते ४ (तुकडे करून)
• हळद – ½ टीस्पून
• मीठ – चवीनुसार
• साखर – १ टीस्पून (ऐच्छिक)
• मोहरी – ½ टीस्पून
• जिरे – ¼ टीस्पून
• हिंग – चिमूटभर
• तेल – ३ टेबलस्पून
• खोबऱ्याचे काप – २ टेबलस्पून
• मनुके – १ टेबलस्पून

Diwali 2025 : दिवाळीत चर्चा होईल फक्त तुमच्या फराळाची, जाणून घ्या भरपूर लेयर्सने भरलेली खुसखुशीत करंजी कशी तयार करायची

कृती :

• यासाठी सर्वप्रथम एका मोठ्या कढईत कुरमुरे हलकेसे भाजून घ्या. ते कुरकुरीत झाले की बाजूला काढा.
• त्याच कढईत तेल गरम करा. त्यात मोहरी टाका. ती तडतडली की जिरे, हिंग आणि कढीपत्ता घाला.
• आता त्यात हिरव्या मिरच्या टाकून थोडं परता. नंतर शेंगदाणे आणि चणाडाळ टाकून सोनेरी होईपर्यंत परता.
  हळद आणि मीठ घालून चांगलं ढवळा.
• आता भाजलेले कुरमुरे त्यात टाकून सगळं छान मिक्स करा. हवे असल्यास साखर घाला आणि पुन्हा हलवा.
• शेवटी खोबरे काप आणि मनुके टाकून एकदा हलवा आणि गॅस बंद करा.
• थंड झाल्यावर हवाबंद डब्यात भरून ठेवा. दिवाळीच्या फराळात हा हलका, स्वादिष्ट आणि कुरकुरीत मुरमुरे चिवडा सर्व्ह करा.
• चिवडा तिखट हवा असल्यास मिरच्यांची संख्या वाढवा.
• खोबरे आणि मनुके घातल्याने गोड-तिखट संतुलन छान साधलं जातं.
• कुरमुरे फार भाजू नका, नाहीतर ते जळतील.

कुरमुऱ्यांचा चिवडा हा असा पदार्थ आहे की लहानांपासून मोठ्यांपर्यंत सगळ्यांना आवडतो. दिवाळीच्या गडबडीतसुद्धा काहीतरी हलकं आणि खमंग हवं असेल तर ही रेसिपी अगदी योग्य पर्याय आहे. एकदा करून पाहा आणि या दिवाळीत घरभर सुगंध पसरवा मुरमुरे चिवड्याचा!