लहान मुलांपासून मोठ्यांपर्यंत सर्वांच्या आवडीची ‘फ्रुट जेली’ घरी कशी तयार करायची; आजच जाणून घ्या बनवण्याची योग्य पद्धत

Fruit Jelly Recipe : घरच्या घरी बनवलेली फ्रूट जेली केवळ स्वादिष्टच नाही तर आरोग्यदायी आणि आकर्षक दिसणारी देखील असते. मुलांच्या टिफिनसाठी किंवा सणासुदीच्या मिठाईच्या थाळीत ती एक खास रंगत आणते.

लहानपणी खाल्लेले काही पदार्थ नेहमीच आपल्या स्मरणात राहतात आणि यातीलच एक म्हणजे ‘फ्रूट जेली’. मऊ, तोंडात टाकताच विरघळणारी ही जेली एक अशी डिश आहे जी लहानांपासून मोठ्यांपर्यंत सगळ्यांनाच खूप आवडते. तिचा रंग, पारदर्शकपणा आणि हलकी गोड चव पाहूनच तोंडाला पाणी सुटतं. बाजारातून आपण नेहमीच तयार जेली विकत घेतो, पण तीच जेली आपण घरच्या घरी अगदी सोप्या पद्धतीने बनवू शकतो हे अनेकांना ठाऊक नसतं.

दिवाळीत गॅसचा वापर न करता सोप्या पद्धतीमध्ये घरीच बनवा हलवाईसारखी रुचकर मिठाई, नोट करून घ्या रेसिपी

घरीच बनवल्या जाणाऱ्या जेलीमध्ये प्रिझर्व्हेटिव्ह्ज किंवा कृत्रिम रंग वापरावे लागत नाहीत आणि आपण ताज्या फळांपासून पौष्टिक जेली तयार करू शकतो. ही जेली दिवाळी, वाढदिवस किंवा उन्हाळ्याच्या खास प्रसंगी गोड पदार्थ म्हणून सर्वांना आनंद देणारी ठरते. याची स्वादिष्ट चव आणि आकर्षक लूक अनेकांना याकडे आकर्षित करू शकते. चला तर मग फ्रूट जेली सोप्या पद्धतीमध्ये घरच्या घरी कशी तयार याची रेसिपी जाणून घेऊया.

साहित्य:

• ताजं फळ रस (आवडीप्रमाणे – संत्रा, स्ट्रॉबेरी, अननस, सफरचंद इ.) – 2 कप
• साखर – ½ कप (फळाच्या गोडीप्रमाणे कमी-जास्त करा)
• जेलाटिन पावडर किंवा अगर अगर (चायना ग्रास) – 2 टेबलस्पून
• पाणी – ½ कप
• लिंबाचा रस – 1 टीस्पून
• साच्यात लावण्यासाठी थोडं तेल किंवा बटर

Sitafal Kheer Recipe: दिवाळीत बनवा लक्ष्मीच्या आवडीची सीताफळ खीर, जाणून घ्या रेसिपी

कृती:

• फ्रुट जेली तयार करण्यासाठी सर्वप्रथम एका भांड्यात ½ कप कोमट पाण्यात जेलाटिन पावडर टाका आणि 10 मिनिटे भिजू द्या. अगर अगर वापरत असाल तर त्याला थोडं पाण्यात उकळून वितळवा.
• एका पातेल्यात तुमच्या आवडीच्या फळाचा रस ओतून त्यात साखर टाका. मध्यम आचेवर हलवत साखर पूर्णपणे विरघळेपर्यंत गरम करा.
• साखर विरघळल्यानंतर त्यात लिंबाचा रस घाला. यामुळे जेलीला हलकी ताजी चव येते आणि ती सेट होण्यास मदत होते.
• आता आच बंद करून गरम रसात भिजवलेले जिलेटीन मिसळा आणि चांगले ढवळा, जेणेकरून ते पूर्णपणे विरघळेल.
• मिश्रणात जर काही गुठळ्या किंवा फेस असेल तर बारीक गाळणीतून ते गाळून घ्या, ज्यामुळे जेली गुळगुळीत तयार होईल.
• तेल किंवा बटर लावलेल्या साच्यात हे मिश्रण ओता. साचं थंड होऊ द्या आणि मग फ्रीजमध्ये किमान 3-4 तास सेट होण्यासाठी ठेवा.
• जेली पूर्ण सेट झाल्यावर साच्यातून काळजीपूर्वक बाहेर काढा आणि चौकोनी किंवा गोल तुकडे करा. वरून
• ताज्या फळांचे तुकडे सजवून थंडगार सर्व्ह करा.
  अधिक रंगीत जेली बनवायची असल्यास वेगवेगळ्या फळांच्या रसांपासून वेगवेगळ्या रंगांच्या थरांची जेली तयार करा.
• अगर अगर (चायना ग्रास) हा शाकाहारी पर्याय आहे, त्यामुळे सर्वांसाठी योग्य ठरतो.
• साखरेऐवजी मध वापरून हेल्दी व्हर्जन बनवू शकता.
• तुम्हाला हवे असल्यास तुम्ही यात फळांचे लहान तुकडे देखील घालू शकता, असं केल्यास तुमची जेली दिसायला आणखीन छान दिसेल.