Maharashtra Breaking News LIVE Updates Today:
26 Aug 2026 09:20 AM (IST)
MLA Report Card 2026: प्रजा फाउंडेशनचा मुंबईच्या आमदारांचा वार्षिक अहवाल (MLA Report Card 2026) जाहीर झाला असून, विधानसभेतील मुंबईच्या आमदारांच्या कामगिरीवर यामध्ये मोठे प्रश्नचिन्ह उपस्थित करण्यात आले आहे. अधिवेशनात आमदारांकडून विचारल्या जाणाऱ्या प्रश्नांच्या संख्येत आणि गुणवत्तेत लक्षणीय घट झाल्याचा दावा या अहवालात करण्यात आला आहे.
अहवालानुसार आमदारांच्या प्रश्न विचारण्याच्या सक्रियतेत कमालीची घट झाली आहे:
हिवाळी अधिवेशन २०२४ ते पावसाळी अधिवेशन २०२५: मुंबईच्या आमदारांनी एकूण २,२१३ प्रश्न विचारले.
२००९ ते २०१० चा काळ: या काळात आमदारांनी ७,९५५ प्रश्न विचारले होते.
घट: पूर्वीच्या तुलनेत प्रश्नांच्या संख्येत तब्बल ७२ टक्क्यांची घट नोंदवली गेली आहे.
प्रजा फाउंडेशनच्या अहवालानुसार, मुंबईचे नागरी प्रश्न विधानसभेत मांडण्यात सत्ताधारी पक्षाचे आमदार अत्यंत निष्क्रिय ठरले आहेत.
विरोधी पक्षाचे वर्चस्व: सर्वाधिक प्रश्न विचारणाऱ्या टॉप ३ आमदारांमध्ये काँग्रेसचे आमदार आहेत, तर चौथ्या आणि पाचव्या क्रमांकावर शिवसेना (उद्धव बाळासाहेब ठाकरे) गटाचे आमदार आहेत.
सत्ताधाऱ्यांना स्थान नाही: टॉप ५ कामगिरी करणाऱ्या आमदारांमध्ये सत्ताधारी पक्षाचा एकही आमदार समाविष्ट नाही.
26 Aug 2026 09:15 AM (IST)
Manoj Jarange Maratha Reservation: मराठा आरक्षणाच्या मुद्द्यावरून मनोज जरांगे पाटील २९ ऑगस्टपासून अंतरवाली सराटीत पुन्हा आंदोलन सुरू करणार आहेत. या आंदोलनाच्या पार्श्वभूमीवर राज्य सरकारने मराठा-कुणबी जात प्रमाणपत्रांबाबत महत्त्वपूर्ण निर्णय घेतला आहे. तालुकास्तरावर तहसीलदारांच्या अध्यक्षतेखाली कार्यरत असलेल्या कुणबी वंशावळ जुळवणी समितीला १ जुलै २०२६ ते ३० जून २०२७ पर्यंत, म्हणजेच एका वर्षाची मुदतवाढ देण्यात आली आहे. अपूर्ण वंशावळ जुळवणी तातडीने पूर्ण करण्याचे निर्देश सरकारने दिले असून, यामुळे मराठा समाजाला कुणबी जात प्रमाणपत्र मिळण्याचा मार्ग अधिक सुकर होण्यास मदत होणार आहे.
26 Aug 2026 09:11 AM (IST)
Rohit Pawar Rahul Gandhi : राष्ट्रवादी शरद पवार गटाचे आमदार रोहित पवार काँग्रेसमध्ये प्रवेश करणार असल्याच्या जोरदार चर्चा राजकीय वर्तुळात रंगल्या आहेत. रोहित पवारांनी दिल्लीत काँग्रेस नेते राहुल गांधी यांची भेट घेतल्यानंतर आणि सातत्याने त्यांच्या समर्थनात भूमिका घेतल्याने अजित पवार गटातील नेत्यांनीही त्यांच्यावर काँग्रेस प्रवेशाचा आरोप केला होता.
या राजकीय चर्चांवर स्वतः रोहित पवार यांनी स्पष्टीकरण देत काँग्रेस प्रवेशाचे वृत्त फेटाळून लावले आहे. राज्यात सध्या अधिकृत विरोधी पक्षनेता उपलब्ध नसल्यामुळेच देशाच्या विरोधी पक्षनेत्यावर अवलंबून राहावे लागत असल्याचे सांगत त्यांनी राहुल गांधी यांच्या भेटीमागील राजकीय भूमिका स्पष्ट केली
26 Aug 2026 09:01 AM (IST)
Karnataka High Court Judgment: पत्नी ही घरकामासाठी किंवा सासू-सासऱ्यांची सेवा करण्यासाठी ठेवलेली कर्मचारी किंवा पतीची खासगी मालमत्ता नाही. लग्न म्हणजे पत्नीची वैयक्तिक ओळख, स्वातंत्र्य किंवा तिच्या आवडीनिवडींवर नियंत्रण मिळवण्याचे लायसन्स नाही, अशा कडक शब्दांत कर्नाटक हायकोर्टाने एका पतीची याचिका फेटाळून लावली.
न्यायालयाने स्पष्ट केले की, घरातील कामे करणे किंवा सासू-सासऱ्यांची सेवा करणे हे पत्नीचे ऐच्छिक काम आहे. आपल्या वृद्ध आई-वडिलांची काळजी घेण्याची प्राथमिक जबाबदारी ही त्यांच्या स्वतःच्या मुलांची आहे, सुनांची नाही. पत्नीवर तिच्या मनाविरुद्ध ताबा मिळवणे किंवा माहेरी जाण्यासाठी परवानगी सक्तीची करणे हे मानवी सन्मान आणि सामाजिक न्याय या संवैधानिक मूल्यांच्या विरोधात आहे, असे निरीक्षण यावेळी कोटाने नोंदविले.
मध्य महाराष्ट्रातील पुणे, सातारा आणि मराठवाड्याच्या काही भागांत पाऊस पुन्हा जोर धरणार असून हवामान विभागाने सतर्कतेचा इशारा दिला आहे. कोयना धरणातून पाण्याचा विसर्ग वाढवण्यात आला आहे. आगामी निवडणुकांच्या पार्श्वभूमीवर राजकीय घडामोडींना वेग आला असून पक्षांतराचे सत्र सुरू आहे. दुसरीकडे, मुंबईत कॅब आणि रिक्षा चालकांसाठी मराठी भाषा सक्तीच्या नियमाविरोधात मुंबई उच्च न्यायालयात याचिका दाखल करण्यात आली आहे.
देशात साखरेच्या वाढत्या दरांवर नियंत्रण मिळवण्यासाठी आणि सर्वसामान्यांना दिलासा देण्यासाठी केंद्र सरकारने महत्त्वपूर्ण धोरणात्मक निर्णय घेतला आहे. अमेरिकेच्या H-1B व्हिसा शुल्कात वाढ करण्याच्या प्रस्तावामुळे भारतीय माहिती तंत्रज्ञान (IT) क्षेत्रातील कर्मचाऱ्यांमध्ये चिंतेचे वातावरण आहे.
.png "Videos"){kind=small}
