शुक्रवार, 23 ऑक्टोबर 2026
MPSC मुलाखतीच्या तयारीसाठी BARTI कडून मिळणार 10 हजारांची मदत
महाराष्ट्र लोकसेवा आयोगाच्या राज्यसेवा मुख्य परीक्षा 2025 मध्ये यश मिळवलेल्या अनुसूचित जातीच्या उमेदवारांसाठी महत्त्वाची बातमी आहे. डॉ. बाबासाहेब आंबेडकर संशोधन व प्रशिक्षण संस्था अर्थात बार्टी (BARTI) कडून अशा पात्र उमेदवारांना मुलाखतीच्या तयारीसाठी आर्थिक सहाय्य दिले जाणार आहे. या योजनेंतर्गत प्रत्येक पात्र उमेदवाराला एकरकमी 10 हजार रुपये देण्यात येणार आहेत.
मुलाखतीची तयारी करताना आर्थिक अडचणी येऊ नयेत, या उद्देशाने ही मदत देण्यात येत आहे. योजनेचा लाभ घेण्यासाठी उमेदवारांना ऑनलाइन तसेच ऑफलाइन अशा दोन्ही पद्धतीने अर्ज करणे आवश्यक आहे.
ऑनलाइन अर्ज 10 सप्टेंबर 2026 रोजी सायंकाळी 5 वाजेपर्यंत सादर करावा लागणार आहे. त्यानंतर अर्जाची स्व-साक्षांकित प्रत आवश्यक कागदपत्रांसह बार्टीच्या पुणे कार्यालयात पोस्ट किंवा कुरियरने पाठवावी लागेल. ही प्रत 11 सप्टेंबर 2026 रोजी सायंकाळी 5 वाजेपर्यंत कार्यालयाकडे पोहोचणे आवश्यक आहे.
NEET PG 2026 च्या गोपनीयतेचा भंग केल्यास कडक कारवाई; परीक्षेच्या ‘या’ नियमांचे पालन करावे लागणार?
या आर्थिक सहाय्यासाठी उमेदवार महाराष्ट्राचा रहिवासी आणि अनुसूचित जाती प्रवर्गातील असणे आवश्यक आहे. तसेच, 25 ऑगस्ट 2026 रोजी जाहीर झालेल्या MPSC राज्यसेवा मुख्य परीक्षा 2025 मध्ये उत्तीर्ण असणे गरजेचे आहे. उमेदवाराचे वय कमाल 35 वर्षे असावे.
अर्जासोबत जात प्रमाणपत्र किंवा जात वैधता प्रमाणपत्र, अधिवास प्रमाणपत्र, MPSC मुख्य परीक्षेचे प्रवेशपत्र, ओळखपत्र आणि स्वतःच्या नावावरील राष्ट्रीयकृत बँकेच्या पासबुकाची प्रत जोडावी लागणार आहे. महत्त्वाचे म्हणजे केवळ ऑनलाइन किंवा केवळ ऑफलाइन अर्ज केल्यास तो ग्राह्य धरला जाणार नाही. दोन्ही प्रक्रिया पूर्ण करणे बंधनकारक आहे.
अर्जाची प्रत डॉ. बाबासाहेब आंबेडकर संशोधन व प्रशिक्षण संस्था (बार्टी), 28/28, क्वीन्स गार्डन, कॅम्प, पुणे – 411001 या पत्त्यावर पाठवावी. अधिक माहितीसाठी 020-26333330 किंवा 020-26333339 या क्रमांकांवर संपर्क साधता येणार आहे.
