Buldhana Water Storage
खामगाव: बुलढाणा जिल्ह्यातील प्रकल्पांमधील जलसाठा दिवसेंदिवस कमी होत असल्याने आगामी काळात पाणीटंचाईचे संकट निर्माण होण्याची शक्यता आहे. जिल्ह्यातील ५२ प्रकल्पांमधील एकूण जलसाठ्याची टक्केवारी २८ सप्टेंबर रोजी ५८.५२ टक्के होती. ती गुरुवारी ५५.४२ टक्क्यांवर आली. अवध्या १० दिवसात जलसाठ्यात सुमारे ३ टक्क्यांची घट झाल्याने पाण्याच्या नियोजनाचा प्रश्न ऐरणीवर आला.
Washim News: ‘मत वाचवा, देश वाचवा!’ वाशिममध्ये महाविकास आघाडीचे आंदोलन, निवडणूक आयोगाविरोधात एल्गार
यंदाच्या पावसाळ्यात प्रकल्पांच्या पाणलोट क्षेत्रात अपेक्षित पाऊस झाला नसल्याने जलसाठ्यात पुरेशी वाढ होऊ शकली नाही. त्यातच गेल्या महिनाभरापासून उन्हाची तीव्रता वाढत असल्याने प्रकल्पांमधील पाण्याचे बाष्पीभवन होत आहे. अद्याप उन्हाळ्याला सुरुवात व्हायची असताना जलसाठ्यात घट होत असल्याने आगामी महिन्यांत पाणीपुरवठ्याचे नियोजन करताना प्रशासनाला मोठी कसरत करावी लागू शकते. पावसाळा संपण्याच्या मार्गावर असतानाही परतीच्या पावसाने अद्याप अपेक्षित हजेरी लावलेली नाही. ग्रामीण भागातील विहिरी आणि हातपंपांच्या पाणीपातळीवरही होत आहे.
जिल्ह्यातील प्रमुख प्रकल्पांपैकी खडकपूर्णा प्रकल्पातील उपयुक्त जलसाठा २८ सप्टेंबर रोजी ५.६० टक्के होता. ८ ऑक्टोबर रोजी तो केवळ १.७५ टक्क्यांवर आला.म्हणजेच दहा दिवसांत या प्रकल्पाच्या जलसाठ्यात ३.८५ टक्क्यांची घट झाली आहे. कोराडी प्रकल्पातही ५.०२ टक्क्यांची घट नोंदविण्यात आली आहे. नळगंगा, पेनटाकळी, ज्ञानगंगा, मन आणि तोरणा यांसह अन्य प्रकल्पांमधील जलसाठ्यातही घट झाली.
खामगाव पाटबंधारे विभागाचे, उपविभागीय अधिकारी, लोकेश बॉबटकार म्हणाले की, दा पावसाळ्यात अपेक्षित पाऊस न झाल्याने प्रकल्पांमधील जलसाठ्यावर परिणाम झाला, उपलब्ध पाणीसाठा लक्षात घेऊन पाण्याचा वापर आणि आगामी काळातील पाणीपुरवठ्याचे नियोजन करणे आवश्यक आहे. नागरिकांनीही पाण्याचा काटकसरीने वापर करून पाणी वाया जाणार नाही, याची काळजी घ्यावी. पावसाची स्थिती आणि प्रकल्पामधील जलसाठ्याचा नियमित आढावा घेऊन आवश्यक उपाययोजना करण्यावर भर दिला जात आहे.
.png "Videos"){kind=small}
