Buldhana Onion Prices
कांदा हा दैनदिन स्वयंपाकातील महत्त्वाचा घटक आहे. भाजी, आमटी, कोशिंबीर असो वा सकाळच्या नाश्त्याच्या पोह्यांची चव कांद्याशिवाय अपुरी वाटते. मात्र, वाढत्या दरामुळे घरगुती स्वयंपाकात कांद्याचा वापर कमी करण्याची वेळ गृहिणींवर आली आहे. हॉटेल्स आणि छोट्या-मोठ्या नाश्त्याच्या गाड्यांनाही वाढत्या दराची झळ बसत आहे. सध्या किरकोळ बाजारात ६० ते ७० रुपये किलो दराने मिळणारा कांदा भविष्यात शंभर रुपयांचा टप्पा ओलांडणार का? याकडे ग्राहकांचे लक्ष लागले आहे. मात्र, आगामी दर हे लागवडीचे क्षेत्र, उत्पादन, साठवणूक आणि बाजारातील आवक यावर अवलंबून राहतील.
दसरा आणि दिवाळीच्या पार्श्वभूमीवर खाद्यपदार्थांची मागणी वाढत असताना कांद्याच्या दरवाढीमुळे सर्वसामान्यांच्या खर्चात आणखी भर पडण्याची शक्यता आहे. रोजच्या जेवणापासून नाश्त्यापर्यंत कांद्याचे महत्त्व लक्षात घेता ही दरवाढ केवळ बाजारपेठेपुरती मर्यादित न राहता थेट घराघरांत जाणवत आहे. यंदाच्या हंगामात कमी पर्जन्यमानामुळे तलाव, लहान धरणे आणि विहिरींमधील पाणीसाठ्यावर ताण वाढला आहे. भूजल पातळी खालावल्याने विहिरी आणि बोरवेलमधून दीर्घकाळ सिंचनासाठी पुरेसे पाणी उपलब्ध होईलच, याची शाश्वती नाही.
जिल्ह्यात खरीप हंगामात सोयाबीनसारख्या नगदी पिकांचे क्षेत्र मोठे आहे. त्यापाठोपाठ कपाशी, उडीद, मूग आणि ज्वारीची लागवड केली जाते. रब्बी हंगामात कांदा लागवड करणाऱ्या शेतकऱ्यांसमोर यंदा पाण्याचे संकट उभे ठाकले आहे. जिल्ह्यातील खामगाव, मोताळा, संग्रामपूर आणि मलकापूर या तालुक्यांत सर्वाधिक कांदा लागवड केल्या जाते, मात्र यंदाच्या अपुऱ्या पावसामुळे या तालुक्यातील लागवड क्षेत्र घटनेची शक्यता वर्तविण्यात येत आहे.
साठवणुकीतील कांदा खराब होणे आणि नवीन कांद्याची बाजारपेठेत मर्यादित आवक ही दरवाढीमागील कारणे असल्याचे विक्रेत्यांकडून सांगण्यात येत आहे. त्यात आगामी हंगामात लागवड घटल्यास बाजारपेठेतील पुरवठ्यावर परिणाम होऊ शकतो, पुरवठा आणि मागणीतील अंतर वाढल्यास कांद्याचे दर आणखी चढण्याची शक्यता नाकारता येत नाही.
.png "Videos"){kind=small}
