Buldhana: मलकापुरात १२ डीजे मालकांविरुद्ध गुन्हा, दुर्गा स्थापना मिरवणुकीतील डीजेला दणका; आवाजाची नोंद १२०.४ डेसिबल

Malkapur Navaratri DJ Noise Pollution: मलकापूरमध्ये दुर्गादेवी स्थापना मिरवणुकीत निर्धारित मर्यादेपेक्षा जास्त आवाजात डीजे वाजवल्याप्रकरणी पोलिसांनी १२ डीजे मालकांविरुद्ध गुन्हे दाखल केले आहेत. तब्बल १२०.४ डेसिबल आवाजाची नोंद झाली असून, ध्वनीप्रदूषण नियमांचे उल्लंघन केल्याप्रकरणी ही कारवाई करण्यात आली.

• मलकापूरमध्ये डीजे मालकांवर गुन्हे
• आवाजाची पातळी थेट १२०.४ डेसिबल
• १२ डीजे मालक अडचणीत

मलकापूर: नवरात्रोत्सवाच्या पार्श्वभूमीवर दुर्गादिवी स्थापना मिरवणुकीत कर्णकर्कश आवाजात डीजे वाजवून ध्वनीप्रदूषण नियमांचे उल्लंघन करणाऱ्या १२ डीजे मालकांविरुद्ध मलकापूर शहर पोलिसांनी गुन्हे दाखल केले आहेत. रविवारी केलेल्या या कारवाईत ध्वनीमापक यंत्राद्वारे आवाजाची नोंद घेतली असता तो तब्बल १२०.४ डेसिबल आढळल्याचे पोलिसांनी सांगितले.शहरातील हनुमाननगर, नारखेडे कॉम्प्लेक्स, गाडगेबाबा टी पॉईंट, एसबीआय चौक, तहसील चौक, हनुमान चौक, हॉटेल विशाल परिसर, सूरज मेडिकलजवळ, टायटन दुकानासमोर, कन्हैया डेली नीड्स परिसरासह विविध ठिकाणी दुर्गादेवी स्थापना मिरवणुका काढण्यात आल्या होत्या.

Washim: चाराटंचाई निवारणासाठी नियोजन करा; जिल्हाधिकारी योगेश कुंभेजकर यांचे निर्देश; जिल्हा प्रशासनातर्फे आढावा

या मिरवणुकांमध्ये विहित मयदिपेक्षा अधिक आवाजात डीजे वाजविण्यात आल्याने नागरिकांना त्रास सहन करावा लागल्याचे पोलिसांच्या कारवाईतून समोर आले आहे. विशेषतः ज्येष्ठ नागरिक, लहान मुले आणि रुग्णांना मोठा त्रास होण्याची शक्यता व्यक्त करण्यात आली.या प्रकरणी अक्षय बाजीराव तोत्रे (रा. पाझर घाटमळा, चांडवली बु., जि. पुणे), शुभम सुपडा लहाने (रा. साखळी बु., जि. बुलढाणा), रामराज्य मलकापूरवाला साऊंडशी संबंधित व्यक्ती, परेश विलास पाटील (जळगाव खुर्द, जि. जळगाव), गौरव अनिल पाटील (सनी पॅलेस, खामगाव), शुभम बाळू अंधारे (अदमपूर, जि. अकोला), चिरज प्रकाश गलवाडे (पंचशील नगर, भुसावळ), आनंद जनार्दन वानखडे (खामगाव), अभिषेक रवींद्र चव्हाण (म्हसवेद, जि. सातारा) यांच्यासह एकूण १२ डीजे मालकांविरुद्ध भारतीय न्याय संहितेतील कलम २२३(ख), २७०, २९३ तसेच पोलिस अधिनियमातील महाराष्ट्र संबंधित कलमांनुसार गुन्हे दाखल करण्यात आले आहेत.

आवश्यक सूचना देऊनही मनमानी

• ध्वनीप्रदूषण रोखण्यासाठी प्रशासनाने यापूर्वीच नियमांचे पालन करण्याचे निर्देश दिले होते.
• ४ ऑक्टोवर रोजी मलकापूर शहर पोलिस ठाण्यात डीजे चालक व मालकांची बैठक घेऊन आवश्यक सूचना देण्यात आल्या होत्या. तसेच बाहेरगावाहून आलेल्या डीजे मालकांना रविवारी भारतीय नागरिक सुरक्षा संहिता २०२३ व्या कलम १६८ अन्वये नोटिसा देऊन कायदेशीर नियमांची जाणीव करून देण्यात आली होती.
• निर्बंध लागू असल्यानंतरही व पूर्वसूचना देऊनही नियमांचे उल्लंघन सुरूच असल्याने पोलिसानी घटनास्थळी जाऊन ध्वनीमापक यंत्राद्वारे आवाजाची तपासणी केली. यावेळी १२०,४ डेसिबल इतक्या आवाजाची नोंद झाल्यानंतर संबंधित डीजे मालकांविरुद्ध कायदेशीर कारवाई करण्यात आली.

Washim: कापूस खरेदीसाठी उपाययोजना, ४ केंद्रांवर ‘स्थानिक निगराणी समिती’ स्थापन; ‘कपास किसान अॅप’वर नोंदणीचे आवाहन