गुरुवार, 13 ऑगस्ट 2026
देवळाई रस्त्यावरील 15 मालमत्तांवर हातोडा; तीन मजली दोन इमारतींचा समावेश
छत्रपती संभाजीनगर : देवळाई चौक ते धुळे-सोलापूर महामार्गाला जोडणाऱ्या २४ मीटर रुंदीच्या रस्त्याच्या कामातील अडथळे दूर करण्यासाठी महापालिकेने बुधवारी आणखी १५ मालमत्तांवर कारवाई केली. यात तीन मजली दोन इमारतींचा समावेश आहे. एका इमारतीवर पूर्णपणे हातोडा चालवण्यात आला, तर दुसऱ्या इमारतीचा रस्त्याच्या हद्दीत येणारा भाग यंत्रांच्या साहाय्याने आला. काही मालमत्ताधारकांनी महापालिकेची कारवाई टाळून स्वतःहून बाधित बांधकामे काढण्यास सुरुवात केली आहे.
देवळाई चौकातून पुढे धुळे-सोलापूर रस्त्याला जोडणाऱ्या या मार्गाचे सिमेंट काँक्रिटीकरण सुरू आहे. मात्र, देवळाई गावातील अनेक मालमत्ता रस्त्याच्या कामात बाधित होत असल्याने कामाला अडथळा निर्माण झाला होता. त्यामुळे महापालिकेने मंगळवारपासून पाडापाडीची कारवाई सुरू केली. पहिल्या दिवशी १२ मालमत्तांवरील अडथळे दूर करण्यात आल्यानंतर बुधवारी उर्वरित १५ मालमत्तांवर कारवाई करण्यात आली. रस्त्याच्या एका बाजूला उभ्या असलेल्या दोन-तीन मजली इमारती कामासाठी प्रमुख अडथळा ठरत होत्या. त्यापैकी एक इमारत पूर्णपणे जमीनदोस्त करण्यात आली.
दुसऱ्या इमारतीचा रस्ता बाधित भाग जेसीबी आणि पोकलेनच्या मदतीने हटवण्यात आला. कारवाईदरम्यान काही मालमत्ताधारकांनी स्वतःच बांधकामे काढून घेत महापालिकेला सहकार्य केले. त्यामुळे पाडापाडीची प्रक्रिया काही ठिकाणी वेगाने पूर्ण झाली. या रस्त्याच्या पुढील टप्प्यात दोन धार्मिक स्थळांचाही रस्ते रुंदीकरणामुळे बाधित भाग आहे. संबंधित नागरिकांकडूनही रस्त्याच्या हद्दीत येणारे बांधकाम स्वतःहून काढण्यास सुरुवात झाली आहे. आणखी पाच ते ते सहा बांधकामांवर गुरुवारी (दि.१३) कारवाई केली जाणार असल्याची माहिती सहाय्यक आयुक्त संजय सुरडकर यांनी दिली.
अतिक्रमण हटाव मोहिमेला वाशिम शहरात सुरुवात
वाशिम नगरपरिषदेने शहरातील सार्वजनिक रस्ते अतिक्रमणमुक्त करण्यासाठी बुधवारी अतिक्रमण हटाव मोहिमेला सुरुवात केली. मोहिमेच्या पहिल्याच दिवशी मोठा कुंभारपुरा, दिघेवाडी, आंबेडकर चौक, बसस्थानक परिसर आदी भागांत धडक कारवाई करत रस्त्यालगत उभारण्यात आलेले अतिक्रमण जेसीबीच्या सहाय्याने हटविण्यात आले.
