शनिवार, 17 ऑक्टोबर 2026
कल्याण : एका आठ वर्षीय मुलीसोबत लैगिंग अत्याचाराची धक्कादायक घटना मानपाडा पोलीस ठाण्याच्या हद्दीत घडली आहे. या प्रकरणात मानपाडा पोलिसांनी खाजगी शिक्षक अजितकुमार साहू याला बेड्या ठोकल्या आहेत. अजितकुमार साहू हा त्याच्या गावी उडिसाला पळून जाण्याच्या तयारीत होता. त्या आधीच मानपाडा पोलिसांनी त्याला अटक केली आहे.
कल्याण पूर्वेत एका परिसरात राहणारा शिक्षक अजितकुमार शाहू जनरल नॉलेज या विषयाचे कोचिंग क्लासेस घेतो. या कोचिंग क्लासमध्ये शिकणाऱ्या एका आठ वर्षीय मुलगी क्लासवरून घरी आल्यानंतर ती अस्वस्थ होती. तिची मानसिक स्थिती बघून तिच्या नातेवाईकांनी तिची विचारपूस केली. आधी तर मुलगी काही सांगण्याच्या मनस्थितीत नव्हती. मात्र तिला तिच्या नातेवाईकांनी विश्वासात घेतले. त्यानंतर तिने जे सांगितले ते ऐकून सर्वांना धक्काच बसला. तिच्या सांगण्यानुसार तिच्यासोबत काही दिवसांपासून गैरप्रकार सुरु होता. तिच्यावर लैगिंक अत्याचार केला जात होता. लैेंगिक अत्याचार करणारा दुसरा तिसरा कोणी नव्हता. तर ती ज्या ठिकाणी क्लासला जाते. त्याच क्लासचा शिक्षक तिच्यावर लैंगिक अत्याचार करीत होता. मुलीने ही हकीगत सांगितल्यावर मुलीच्या नातेवाईकांनी मानपाडा पोलिसांनी ठाण्यात धाव घेतली.
मानपाडा पोलीस ठाण्याचे वरिष्ठ पोलीस निरिक्षक अशाेक होनमाने यांनी त्वरीत संबंधित शिक्षक अजितकुमार साहूला अटक करण्यासाठी पोलीस पाठविले. पोलीस त्याच्या घरी पोहचले. त्यावेळी तो पळून जाण्याच्या तयारी होता. पोलीस अधिकारी सुनिल तारमळे यांनी त्याला तात्काळ ताब्यात घेतले. या प्रकरणात अजितकुमार साहूला अटक करण्यात आली आहे. पुढील तपास एसीपी सुनिल कुर्हाडे आणि वरिष्ठ पोलीस निरिक्षक अशोक होनमाने यांच्या मार्गदर्शनाखाली पोलीस अधिकारी निशा चव्हाण करीत आहेत. या घटनेमुळे परिसरामध्ये खळबळ उडाली आहे.
