मंगळवार, 27 ऑक्टोबर 2026
(Photo - X)
Dhule News : धुळे जिल्ह्यातील शिंदखेडा तालुक्यातील चिमठाणे व ८५ गावांच्या पाणीपुरवठा योजनेची कामे निर्धारित कालमर्यादेत पूर्ण करून नागरिकांना प्रत्यक्ष पाणी उपलब्ध करून द्यावे. येत्या १५ जानेवारीपर्यंत किमान ३३ गावांमध्ये पाणीपुरवठा सुरू करण्यासाठी कालबद्ध कार्यक्रम आखून कामांना गती द्यावी, असे निर्देश पाणीपुरवठा व स्वच्छतामंत्री गुलाबराव पाटील यांनी दिले. योजनेतील प्रलंबित कामे पूर्ण करणे आणि पाणीटंचाईच्या काळात नागरिकांना दिलासा देणे, याला प्राधान्य देण्याचे निर्देशही त्यांनी संबंधित यंत्रणांना दिले.
मंत्रालयात मंत्री गुलाबराव पाटील यांच्या अध्यक्षतेखाली झालेल्या बैठकीत शिंदखेडा तालुक्यातील पाणीटंचाईची स्थिती, चिमठाणे व ८५ गावांच्या पाणीपुरवठा योजनेची सद्यस्थिती, प्रलंबित कामे आणि आगामी काळातील पाणीपुरवठ्याचे नियोजन यांचा सविस्तर आढावा घेण्यात आला. या बैठकीस धुळे जिल्ह्याचे पालकमंत्री जयकुमार रावल हेदेखील उपस्थित होते. याशिवाय या पाणीपुरवठा व स्वच्छता विभागाचे अपर मुख्य सचिव पराग जैन-नैनुटिया, महाराष्ट्र जीवन प्राधिकरणाचे सदस्य सचिव, जल जीवन मिशनचे अधिकारी, धुळे जिल्हा परिषदेचे मुख्य कार्यकारी अधिकारी, महाराष्ट्र जीवन प्राधिकरणाचे मुख्य अभियंता व संबंधित अभियंते, तसेच विभागाचे आणि जिल्हा प्रशासनाचे अधिकारी बैठकीस उपस्थित होते.
योजनेच्या कामाची भौतिक प्रगती सुमारे ५१ टक्क्यांपर्यंत झाली आहे. मुख्य उद्भव विहीर, पंपगृह, जलशुद्धीकरण केंद्र, विद्युत जोडणी तसेच शुद्ध पाणी वाहिन्या आणि वितरण व्यवस्थेतील काही कामे अद्याप पूर्ण व्हायची आहेत. त्यामुळे उर्वरित कामांचे टप्पेनिहाय नियोजन करून संबंधित यंत्रणांनी समन्वयाने काम करावे आणि प्रत्यक्ष पाणीपुरवठा सुरू करण्याचे उद्दिष्ट साध्य करावे, असे निर्देश मंत्री पाटील यांनी दिले.
योजनेच्या कामातील विलंबामुळे संबंधित कंत्राटदारावर प्रतिदिन जवळपास चार लाख रुपयांप्रमाणे दंड आकारण्यात आला असून, दंडाची रक्कम वसूल करण्यात आली आहे. हा दंड शिथिल करण्याची मागणी कंत्राटदाराकडून करण्यात आली होती. मात्र, प्रथम कामाची गती वाढवून निर्धारित उद्दिष्टानुसार गावांमध्ये प्रत्यक्ष पाणीपुरवठा सुरू करावा. त्यानंतरच दंड शिथिल करण्याच्या मागणीचा विचार केला जाईल, अशी स्पष्ट भूमिका मंत्री पाटील यांनी मांडली.
योजनेचा लाभ ८५ गावांतील नागरिकांना मिळणे अपेक्षित असल्याने कामातील विलंब दूर करणे आवश्यक आहे. केवळ आर्थिक दंडाबाबत निर्णय घेण्याऐवजी प्रत्यक्ष कामाची प्रगती, उर्वरित कामांची पूर्तता आणि नागरिकांना पाणी उपलब्ध होण्याच्या कालमर्यादेला महत्त्व दिले जाईल, असे त्यांनी स्पष्ट केले.
बैठकीत शिंदखेडा तालुक्यातील आगामी पाणीटंचाईच्या परिस्थितीचाही आढावा मंत्री पाटील यांनी घेतला. ऑक्टोबर २०२६ ते जून २०२७ या कालावधीसाठी तालुक्यातील ११६ गावांकरिता १२९ उपाययोजना प्रस्तावित असून, त्यासाठी एकूण २ कोटी ९६ लाख ९० हजार रुपयांची तरतूद प्रस्तावित आहे. यामध्ये विंधन विहिरी, विशेष नळ योजनांची दुरुस्ती, तात्पुरत्या पूरक पाणीपुरवठा योजना, विहिरींचे अधिग्रहण व खोलीकरण तसेच टँकरद्वारे पाणीपुरवठा अशा उपाययोजनांचा समावेश आहे. योजनेची कामे पूर्ण होईपर्यंत नागरिकांना पाणीटंचाईचा त्रास होऊ नये, यासाठी संबंधित विभागांनी आवश्यक कार्यवाही करावी, असे निर्देश मंत्री पाटील यांनी दिले.
योजनेतील प्रमुख कामांसाठी आवश्यक विद्युत पुरवठा उपलब्ध करणे, जलशुद्धीकरण केंद्रातील यंत्रसामग्री व विद्युत जोडणीची कामे पूर्ण करणे, उर्वरित जलवाहिन्या टाकणे आणि रेल्वे व रस्ते ओलांडण्याशी संबंधित कामे मार्गी लावणे आवश्यक आहे. काही ठिकाणी पाइपलाइनच्या मार्गातील स्थानिक अडचणीही दूर कराव्या लागणार आहेत. या सर्व बाबींचा विचार करून कामांचा प्राधान्यक्रम निश्चित करावा आणि ठरविलेल्या कालमर्यादेत कामे पूर्ण करण्यासाठी नियमित आढावा घ्यावा, असे मंत्री पाटील यांनी सांगितले.
‘शेतकऱ्यांची दिवाळी काळी होऊ देणार नाही!’ एकनाथ शिंदेंचा शब्द, कर्जवसुली करणाऱ्यांना दिला सज्जड दम
Ans: योजनेची भौतिक प्रगती सुमारे ५१ टक्के झाली आहे. मुख्य उद्भव विहीर, पंपगृह, जलशुद्धीकरण केंद्र, विद्युत जोडणी आणि पाइपलाइनची काही कामे अद्याप बाकी आहेत.
Ans: मंत्री गुलाबराव पाटील यांनी १५ जानेवारीपर्यंत किमान ३३ गावांमध्ये प्रत्यक्ष पाणीपुरवठा सुरू करण्याचे उद्दिष्ट निश्चित करून कामांना गती देण्याचे निर्देश दिले आहेत.
Ans: ऑक्टोबर २०२६ ते जून २०२७ या कालावधीसाठी ११६ गावांमध्ये १२९ उपाययोजना प्रस्तावित आहेत. त्यासाठी २ कोटी ९६ लाख ९० हजार रुपयांची तरतूद प्रस्तावित असून, यात टँकर, विंधन विहिरी, विहिरींचे खोलीकरण आणि नळ योजनांच्या दुरुस्तीचा समावेश आहे.
