खाजगी इमारतीतील प्रार्थनास्थळ बंद करण्याची मागणी; हिंदुत्ववादी कार्यकर्त्यांचे ठिय्या आंदोलन, नेमके प्रकरण काय?

इचलकरंजी:  शहरातील एका खाजगी इमारतीत सुरु असलेले प्रार्थनास्थळ बंद करण्यासाठी पोलिस फौजफाट्यासह गेलेल्या 8 हिंदुत्ववाद्यांच्या विरोधात पोलिसात गुन्हा दाखल झाला आहे. याची माहिती समजल्यानंतर संतप्त हिंदुत्ववादी कार्यकर्त्यांनी पोलिस ठाण्यासमोर ठिय्या मारला. यावेळी हिंदुतत्ववाद्यांवरील गुन्हे मागे घ्यावेत आणि पोलीस ठाणे आवारात प्रार्थना करणार्‍यांवर गुन्हा दाखल करण्याची मागणी केली.

पोलीस उपअधिक्षक समिरसिंह साळवे यांनी गुन्हा दाखल करण्याचे आश्‍वासन दिले, परंतु गुन्हा दाखल झाल्याशिवाय येथून हलणार नाही, असा पवित्रा घेत हिंदुत्ववाद्यांनी ठिय्या मारला. अखेर गुन्हा दाखल करण्याची प्रक्रिया सुरु केल्यानंतर हिंदुत्ववादी कार्यकर्ते माघारी परतले.

कोल्हापूर रोडवरील सोन्यामारुती मंदिराच्या पिछाडीस औद्योगिक वसाहतीतील एका खाजगी इमारतीत प्रार्थनास्थळ सुरु असून त्याचा भागातील नागरीकांना त्रास होत असल्याबद्दल नागरिकांनी हिंदुत्ववाद्यांकडे तक्रार दिली होती. त्याची शहानिशा करुन माहिती घेण्यासाठी काही हिंदुत्ववादी कार्यकर्ते पोलिसांना सोबत घेऊन रविवारी तेथे गेले. त्यावेळी त्याठिकाणी धर्मांतरणाचा प्रकार निदर्शनास आला होता. यावेळी तेथील लोकांशी शाब्दीक वाद घातल्याप्रकरणी प्रार्थनास्थळाशी संबंधितांनी गुन्हा दाखल करण्याची मागणी करत सोमवारी पोलीस ठाण्याच्या आवारातच सामुहिक प्रार्थना केली होती. त्यानंतर पोलिसांनी बिशप संजय शामसुंदर आढाव यांच्या तक्रारीवरुन शिवजी व्यास यांच्यासह 8 जणांवर गुन्हा दाखल केला.

याबाबतची माहिती मिळाल्यानंतर संतप्त हिंदुत्ववादी कार्यकर्त्यांनी मंगळवारी दुपारी शिवाजीनगर पोलीस ठाण्यात येत  पोलीस उपअधिक्षक समिरसिंह साळवे यांना त्याचा जाब विचारला. त्यावेळी साळवे यांनी दिलेल्या उत्तरावर समाधान न झाल्याने कार्यकर्त्यांनी पोलीस ठाण्याच्या आवारात वादग्रस्त प्रार्थनास्थळाशी संबंधितांवर गुन्हे दाखल झाल्याशिवाय आम्ही हटणार नाही, असा पवित्रा घेतला.

इचलकरंजीत पूर्ववैमनस्यातून दोन गटांत राडा; तीनजण गंभीर, 18 जणांना अटक

गजानन महाजन (गुरुजी) यांनी संतप्त भावना व्यक्त करत दुपारी दोन वाजेपर्यंत गुन्हे दाखल न झाल्यास आक्रमक भूमिका घेण्याचा इशारा दिला. त्यानंतर बराचवेळ पोलिसांकडून काहीच उत्तर न आल्याने हिंदुत्ववाद्यांनी शिवतिर्थ परिसरात जाऊन ठिय्या मारुन बसण्याची भूमिका घेतली. त्यावर उपअधिक्षक साळवे यांनी चर्चेची तयारी दर्शवत त्वरीत गुन्हे दाखल करण्याचे मान्य केले. अन् गुन्हे दाखल करण्याची प्रक्रिया केली. यावेळी महाजन गुरुजी यांनी केवळ गुन्हे दाखल करुन चालणार नाही तर बेकादेशीर कृत्य करणार्‍यांना कडक शासन करा आणि निरापराध कार्यकर्त्यांवर झालेले गुन्हे त्वरीत पाठीमागे घेण्याची कार्यवाही करण्याची मागणी केली.

दोन तास चाललेल्या या प्रकारामुळे पोलीस ठाणे आवारात तणावाचे वातावरण निर्माण झाले होते. अनुचित प्रकार घडू नये यासाठी  ठाण्याच्या आवारात बंदोबस्त तैनात करण्यात आला होता.

जमावबंदी आदेशाचा भंग 

जमावबंदी आदेशाचा भंग करत पोलिस ठाण्याच्या आवारात सार्वजनिक ठिकाणी धार्मिक प्रार्थना व भक्ती केल्याच्या कारणावरुन शिवाजीनगर पोलिसात माजी नगरसेवकासह 28 जणांवर गुन्हा दाखल करण्यात आला आहे. या प्रकरणी पोलिस कॉन्स्टेबल संतोष बाबुराव धनगर यांनी फिर्याद दिली आहे.