Leopard CCTV Video: बिबट्याची दहशत सुरूच; देवरुखच्या साडवली परिसरातील थरारक दृश्य CCTV मध्ये, तातडीने पिंजरा लावण्याची मागणी

Leopard CCTV Video: देवरुख शहरालगतच्या साडवली-सह्याद्री नगर परिसरात पहाटे बिबट्याचा मुक्तसंचार पाहायला मिळाला. स्थानिक नागरिक भाई शिंदे यांच्या घरासमोरून फिरणारा बिबट्या CCTV कॅमेऱ्यात कैद झाला आहे. वारंवार होणाऱ्या बिबट्याच्या दर्शनामुळे परिसरात भीतीचे वातावरण असून वनविभागाने तातडीने पिंजरा लावून बंदोबस्त करावा....

• घरासमोरून आरामात फिरला बिबट्या!
• देवरुखच्या साडवली परिसरातील थरारक दृश्य CCTV मध्ये
• तातडीने पिंजरा लावण्याची मागणी

Leopard CCTV Video: कोकणातील काही जिल्ह्यात बिबट्यांनी चांगलीच दहशत माजविण्यास सुरुवात केली आहे. वारंवार बिबटे नागरी वस्तीत दिसू लागल्याने नागरिक भितीच्या छायेत वावरत आहेत. दरम्यान रत्नागिरी जिल्ह्यातील देवरुखच्या साडवली-सह्याद्री नगर परिसरात बिबट्याचा वावर पुन्हा एकदा समोर आल्याने नागरिकांमध्ये भीतीचे वातावरण निर्माण झाले आहे. आज (10 ऑक्टोबर) पहाटे परिसरातील स्थानिक नागरिक भाई शिंदे यांच्या घरासमोर बिबट्या फिरताना दिसला. हा संपूर्ण प्रकार घराबाहेर लावण्यात आलेल्या CCTV कॅमेऱ्यात कैद झाला आहे. (Leopard CCTV Video)

Wai News : बिबट्याच्या वाढत्या वावराने पश्चिम वाईत भीती; पिंजरे-कॅमेरे बसवण्याची मागणी

CCTV दृश्यांमध्ये बिबट्या मानवी वस्तीजवळून मोकळेपणाने फिरताना दिसत असल्याने परिसरातील रहिवाशांची चिंता वाढली आहे. गेल्या काही दिवसांपासून देवरुख शहरासह लगतच्या ग्रामीण भागात बिबट्याचा वावर वाढल्याचे स्थानिकांचे म्हणणे आहे. रात्री आणि पहाटेच्या वेळी बिबटे अन्नाच्या शोधात मानवी वस्तीकडे येत असल्याने नागरिकांच्या सुरक्षेचा प्रश्न ऐरणीवर आला आहे. विशेषतः लहान मुले, ज्येष्ठ नागरिक तसेच घराबाहेर बांधलेली पाळीव जनावरे आणि अन्य प्राण्यांच्या सुरक्षेबाबत ग्रामस्थांकडून चिंता व्यक्त केली जात आहे. रात्रीच्या वेळी घराबाहेर पडतानाही नागरिकांना खबरदारी घ्यावी लागत आहे.

साडवली-सह्याद्री नगर परिसरात बिबट्याचा मुक्तसंचार सुरू असल्याने वनविभागाने या प्रकाराची तातडीने दखल घ्यावी, अशी मागणी स्थानिकांनी केली आहे. बिबट्याच्या हालचालींवर लक्ष ठेवण्यासाठी आवश्यक उपाययोजना कराव्यात तसेच गरजेनुसार परिसरात पिंजरा लावून बिबट्याचा सुरक्षित बंदोबस्त करावा, अशी मागणी साडवली आणि देवरुख परिसरातील ग्रामस्थांकडून करण्यात येत आहे.

तसेच सह्याद्रीच्या पर्वतरांगा आणि कोकण परिसरात दूर्मिळ मानल्या जाणाऱ्या ब्लॅक पँथर अर्थात काळ्या बिबट्याच्या वावराच्या नोंदीतही वाढ झाली आहे. यामध्ये वाढती जंगलतोड, मानवी वस्तीचा विस्तार आणि अन्न – पाण्याच्या शोधात हे वन्यप्राणी जंगलातून मानवी वस्तीकडे येत असल्याचे तज्ज्ञांचे मत आहे. वाढत्या जंगलतोडीमुळे आणि मानवी हस्तक्षेपापायी वन्यप्राणी अन्नाच्या शोधार्थ मानवी वस्तीकडे वळत आहेत. ते रात्रीच्या वेळी पाळीव कुत्र्यांची शिकार करत असल्याचे समोर आले आहे.

वनविभागाचे आवाहन

• नागरिकांनी घाबरून न जाता रात्रीच्या वेळी एकटे बाहेर जाणे टाळावे.
• पाळीव जनावरांची सुरक्षितता राखावी.
• बिबट्या किंवा इतर वन्यप्राणी निदर्शनास आल्यास तत्काळ वन विभाग (Forest Department) संपर्क साधावा.

Leopard Attack : मध्यरात्री दबा धरून बसला अन् थेट…! सफाळ्यात बिबट्याच्या हल्ल्याने खळबळ; ग्रामस्थांमध्ये भीतीचं वातावरण