31 Aug 2026 10:04 AM (IST)

तुकाराम मुंढेंच्या कारवाईचा ट्विंकल खन्नावर परिणाम; डिंपल कपाडियासोबत घरातच बनवतेय पनीर

महाराष्ट्राचे FDA आयुक्त तुकाराम मुंढे हे त्यांच्या धडक कारवाईसाठी ओळखले जातात. गेल्या काही महिन्यांपासून त्यांनी खाद्यपदार्थांमध्ये भेसळ करणाऱ्यांसह सुरक्षा नियमांचे उल्लंघन करणाऱ्या रेस्टॉरंट्सविरोधात कठोर पावले उचलली आहेत. त्यांच्या या धडक कारवाईला कलाकार मंडळींकडूनही पाठिंबा मिळताना दिसत आहे. मध्यंतरी त्यांनी भेसळयुक्त पनीरच्या उत्पादनाविरोधातही मोठी कारवाई केली होती. त्यांच्या या कारवाईनंतर आता अभिनेत्री ट्विंकल खन्नानेही आपल्या अनुभवाबद्दल एक मजेशीर किस्सा सांगितला आहे. ट्विंकल आणि तिची आई डिंपल कपाडिया यांनी बाहेर पनीर खाण्याऐवजी आता घरच्या घरी पनीर बनवण्यास सुरुवात केली आहे.

31 Aug 2026 09:45 AM (IST)

MNS-BJP Politics: आमच्या नादात लागू नका; राजू पाटलांचा भाजपला इशारा 

भाजप नेते बृजभूषण सिंह यांच्या नावाचा उल्लेख करीत कल्याण भाजपा जिल्हाध्यक्ष नंदू परब यांनी मनसे अध्यक्ष राज ठाकरे यांच्याबद्दल केलेल्या वक्तव्यावर राजू पाटील यांनी जिल्हाध्यक्ष नंदू परब यांचा चांगला समाचार घेतला. “राज ठाकरे यांच्याबद्दल बोलायची त्यांची औकात आहे का?” असा थेट सवाल राजू पाटील यांनी केला. कल्याण ग्रामीणमध्ये पक्षाच्या एका कार्यक्रमात मनसे नेते राजू पाटील बोलत होते. यावेळी त्यांनी नंदू परब यांच्या चांगला समाचार घेतला.

31 Aug 2026 09:35 AM (IST)

Pune Chakan Traffic:  चाकणमधील वाहतूक कोंडी अन् खड्ड्यांवर जिल्हाधिकारी आक्रमक 

Pune Chakan Traffic:  पुणे जिल्ह्यातील चाकण औद्योगिक क्षेत्रातील दयनीय रस्ते, सततची वाहतूक कोंडी आणि पायाभूत सुविधांच्या समस्येवर प्रशासनाने अखेर मोठा निर्णय घेतला आहे. जिल्हाधिकारी कार्यालयात पार पडलेल्या उच्चस्तरीय बैठकीत जिल्हाधिकारी जितेंद्र डुडी यांनी रस्ते दुरुस्ती, अतिक्रमणे हटवणे आणि वाहतूक नियोजनाबाबत संबंधित यंत्रणांना कडक इशारा दिला आहे. ३१ ऑगस्टपर्यंत रस्त्यांवरील सर्व खड्डे बुजवून तातडीची दुरुस्ती कामे पूर्ण करा, अन्यथा कडक कारवाईला सामोरे जा, असे स्पष्ट निर्देश जिल्हाधिकाऱ्यांनी दिले आहेत.

31 Aug 2026 09:25 AM (IST)

Abhijeet Dipke on Mohan Bhagwat: ‘भाजपने मोहन भागवतांचे ऐकावे’; आरएसएस प्रमुखांच्या विधानानंतर अभिजीत दीपकेंचा टोला

Abhijeet Dipke on Mohan Bhagwat: कॉकरोच जनता पार्टीचे (CJP) संस्थापक अभिजीत दीपके यांनी रविवारी भारतीय जनता पक्षावर जोरदार निशाणा साधला आहे. सत्ताधारी भाजप स्वतःला राष्ट्रीय स्वयंसेवक संघापेक्षा (RSS) मोठा समजू लागला आहे, असा आरोप करत त्यांनी भाजपला आरएसएस प्रमुख मोहन भागवत यांचे म्हणणे ऐकण्याचा सल्ला दिला.

न्यूयॉर्कमधील एका कार्यक्रमाला संबोधित करताना आरएसएस प्रमुख मोहन भागवत म्हणाले होते की, “ज्या हिंदूचा असा विश्वास आहे की मुस्लिमांनी भारतात राहू नये, तो मुळातच स्वतःला हिंदू मानू शकत नाही.” भागवत यांच्या याच विधानाचा संदर्भ देत अभिजीत दीपके यांनी भाजपवर पुन्हा एकदा राजकीय टोलेबाजी केली.

31 Aug 2026 09:10 AM (IST)

Mumbai Politics: शिंदे गटाला सव्वा वर्षाचे महापौरपद मिळण्याची शक्यता

Mumbai Politics: मुंबईच्या राजकारणात लवकरच मोठी राजकीय उलथापालथ होण्याची शक्यता वर्तवली जात आहे. आशियातील सर्वात श्रीमंत मानल्या जाणाऱ्या मुंबई महानगपालिकेच्या महापौरपदाबाबत नवा फॉर्म्युला ठरल्याची चर्चा राजकीय वर्तुळात सुरू झाली आहे. मुंबई महापालिकेच्या महापौरपदासाठी 'सव्वा-सव्वा वर्षांचा' फॉर्म्युला ठरला असून त्यानुसार महापौरपद शिंदे गटाला मिळण्याची दाट शक्यता आहे.

31 Aug 2026 09:00 AM (IST)

Kailash Mansarovar Nepal Flood: नेपाळच्या महापुरात ताटातूट झाल्यानंतर मुंबई विमानतळावर भावा-बहिणीची भेट 

Kailash Mansarovar Nepal Flood: नेपाळमधील महापुरात ताटातूट झालेल्या भावा-बहिणीची रविवारी मुंबई विमानतळावर ताटातूट संपून भेट झाली आणि त्यांनी अत्यंत भावूक वातावरणात अनोखे रक्षाबंधन साजरे केले. अलका कीर्तीरामन आणि राकेश मेहता यांनी एकत्र कैलास मानसरोवर यात्रेला सुरुवात केली होती. मात्र, अलका यांची प्रकृती बिघडल्याने त्या वरपर्यंत जाऊ शकल्या नाहीत. दरम्यान, २६ ऑगस्टला नेपाळमध्ये आलेल्या अचानक महापुरामुळे सुरक्षित जागी हलवताना दोघांचा प्रवास वेगवेगळ्या मार्गाने सुरू झाला. रविवारी विमानतळावर भेट होताच अलका यांनी आपल्या भावाला राखी बांधून या खडतर प्रवासाला सुखद पूर्णविराम दिला.