Maharashtra Breaking LIVE News Today: महाराष्ट्रासह देशविदेशातील ब्रेकिंग बातम्यांच्या लाईव्ह अपडे्स एका क्लिकवर

26 Dec 2025 11:13 AM (IST)

राष्ट्रवादीत बड्या नेत्यांचा प्रवेश

सांगली महापालिका निवडणुकीच्या पार्श्वभूमीवर राष्ट्रवादी काँग्रेसमध्ये इनकमिंग सुरूच आहे. मिरजेतल्या दिग्गज नगरसेवकांच्या प्रवेशानंतर सांगलीतल्या भाजप आणि राष्ट्रवादी शरद पवार गटातल्या नगरसेवकांनी आज अजित पवार गटात प्रवेश केला आहे. पुण्यामध्ये उपमुख्यमंत्री अजित पवार आणि सांगली शहर जिल्हाध्यक्ष पद्माकर जगदाळे यांच्या उपस्थितीत सांगलीतल्या विद्यमान नगरसेवकांनी प्रवेश केला आहे. यामध्ये राष्ट्रवादी शरदचंद्र पवार पक्षाचे नेते अभिजीत भोसले, स्नेहन सावंत आणि भाजपाच्या नसीमा नाईक यांचा समावेश आहे.

26 Dec 2025 10:57 AM (IST)

ट्रम्प स्वतःच्याच सापळ्यात अडकला!

भारतावर ५०% अतिरिक्त कर लादून, राष्ट्राध्यक्ष डोनाल्ड ट्रम्प स्वतःच्याच बनवलेल्या सापळ्यात अडकलेले दिसतात. अमेरिकेच्या राष्ट्राध्यक्षांनी भारताला त्रास देण्याच्या उद्देशाने हा अतिरिक्त कर लादला असला तरी, भारताला त्याचा मोठा फायदा होत असल्याचे दिसून येते. एवढेच नाही तर, चीनसोबतचे भारताचे संबंध, जे खूपच कटु होते, ते आता सुधारत असल्याचे देखील दिसून येत आहे. डोनाल्ड ट्रम्प यांनी या वर्षी ऑगस्टमध्ये भारतावर मोठ्या प्रमाणात कर लादल्यानंतर, त्यांच्यावर जगभरात टीका झाली. ट्रम्प यांच्या या निर्णयावर अमेरिकेतही टीका झाली. चीनने भारताला पाठिंबा दर्शविला होता.

26 Dec 2025 10:44 AM (IST)

पाकिस्तानची क्रूरता सीमेपार!

बलुचिस्तान (Balochistan) हा प्रांत सध्या पाकिस्तानी (Pakistani) सुरक्षा दलांच्या छळाचा आणि मानवी हक्कांच्या पायमल्लीचा नरक बनला आहे. बलुचिस्तानच्या मानवाधिकार परिषदेने (HRCB) नोव्हेंबर २०२५ चा आपला अहवाल सादर केला असून, त्यातील आकडेवारी पाहून जगाच्या अंगावर शहारे येत आहेत. या एका महिन्यात पाकिस्तानी सैन्याने १०६ बलुच नागरिकांचे अपहरण केले असून ४२ जणांची हत्या केली आहे. या भयावह परिस्थितीमुळे बलुचिस्तानमध्ये संतापाचा ज्वालामुखी उसळला असून, जगभरातील मानवाधिकार संघटनांनी यावर तीव्र चिंता व्यक्त केली आहे.

26 Dec 2025 10:37 AM (IST)

राष्ट्रवादीला रामराम करत प्रशांत जगताप करणार ‘या’ पक्षात प्रवेश

आगामी महापालिका निवडणुकांच्या पार्श्वभूमीवर राष्ट्रवादी काँग्रेसचा शरद पवार गट आणि उपमुख्यमंत्री अजित पवार यांच्या राष्ट्रवादीची युती होणार आहे. या युतीला विरोध करत प्रशांत जगताप यांनी शरद पवारांच्या राष्ट्रवादीच्या शहराध्यक्ष पदाचा राजीनामा दिला. त्यानंतर ते कोणत्या पक्षात जाणार, असा प्रश्न उपस्थित होत होता. अशातच प्रशांत जगताप काँग्रेसमध्ये प्रवेश करणार असल्याची माहिती समोर आली आहे. आज दुपारी १२ वाजता जगताप काँग्रेसमध्ये (Congress) अधिकृतरित्या प्रवेश करतील.

26 Dec 2025 10:30 AM (IST)

‘इंडियन आयडल १’ जिंकल्यानंतर का घाबरला Abhijeet Sawant ?

२००४ मध्ये “इंडियन आयडल सीझन १” जिंकल्यानंतर अभिजीत सावंत राष्ट्रीय स्तरावर प्रसिद्ध झाला. परंतु, त्याचे चाहते या मोठ्या विजयाचा आनंद साजरा करत करत असताना, गायक थोडा घाबरला देखील होता. त्याने अलिकडच्या मुलाखतीत यामागील कारण स्पष्ट केले आहे. त्याच्या मते, त्याला भीती होती की इतकी लोकप्रियता मिळवल्यानंतर, एक प्रसिद्ध गायक म्हणून त्याला दीर्घकालीन प्रोजेक्टसाठी स्वाक्षरी करून तो फसेल आणि नंतर त्याला बाहेर काढू शकणार नाही.

26 Dec 2025 10:19 AM (IST)

ग्वाल्हेरमध्ये Live संगीत दरम्यान संतापले कैलाश खेर

काल ग्वाल्हेरमधील कैलाश खेर यांचा संगीत कार्यक्रम पार पडला. माजी पंतप्रधान अटलबिहारी वाजपेयी यांच्या जयंतीनिमित्त ग्वाल्हेर मेळा मैदानावर हा कार्यक्रम आयोजित करण्यात आला होता. गृहमंत्री अमित शहा यांनी दिवसभर कार्यक्रमाला उपस्थिती दाखवली. त्यानंतर, संध्याकाळी कैलाश खेर यांचा संगीत कार्यक्रम पार पडला. मात्र, गर्दीने इतका गोंधळ घातला की कैलाश खेर यांना त्यांचा कार्यक्रम मधेच बंद करावा लागला. शिवाय, कैलाश खेर यांना स्टेजवरून लोकांच्या गर्दीला प्राण्यांसारखे वागू नका असे आवाहन करावे लागले.

26 Dec 2025 10:12 AM (IST)

विराट आणि रोहित पुन्हा मैदानात उतरणार

दोन्ही खेळाडूंनी त्यांच्या प्रभावी खेळीनंतर जल्लोष साजरा केला आणि आता चाहते पुन्हा एकदा त्यांच्या स्फोटक फलंदाजीची आतुरतेने वाट पाहत आहेत. स्पर्धेतील दुसऱ्या सामन्यात विराट कोहलीच्या दिल्लीचा सामना गुजरातशी होईल. हा सामना बेंगळुरूमधील बीसीसीआय सेंटर ऑफ एक्सलन्स येथे खेळला जाईल. रोहित शर्माच्या मुंबईचा सामना जयपूरमधील सवाई मानसिंग स्टेडियमवर उत्तराखंडशी होईल. दोन्ही सामने शुक्रवारी सकाळी ९ वाजता सुरू होतील.

26 Dec 2025 09:59 AM (IST)

Nigeria Air Strike: नायजेरियात ISIS तळांवर अमेरिकेचे हवाई हल्ले; ट्रम्प यांची सोशल मीडियावरून माहिती

United States Airstrikes In Nigeria:  अमेरिकेच्या लष्कराने गुरुवारी रात्री वायव्य नायजेरियामध्ये दहशतवादी संघटना आयएसआयएसच्या तळांना लक्ष्य करत हवाई हल्ले केल्याची माहिती समोर आली आहे. या कारवाईची माहिती अमेरिकेचे राष्ट्राध्यक्ष डोनाल्ड ट्रम्प यांनी सोशल मीडियावर पोस्टद्वारे दिली.

ट्रम्प यांनी यापूर्वी ऑक्टोबर महिन्यात नायजेरियामधील दहशतवाद्यांवर ख्रिश्चनांच्या हत्येचे गंभीर आरोप केले होते. त्या वेळीच त्यांनी दहशतवाद्यांविरोधात कारवाईचा इशारा दिला होता. नायजेरियातील सरकार हिंसा रोखण्यात अपयशी ठरत असल्याचा आरोप करत, जर ही परिस्थिती अशीच राहिली आणि अमेरिकेने हस्तक्षेप केला नाही, तर नायजेरियातील ख्रिश्चनांच्या अस्तित्वालाच धोका निर्माण होऊ शकतो, असे विधानही ट्रम्प यांनी केले होते.

26 Dec 2025 09:47 AM (IST)

Eknath Shinde Politics: मिरा-भाईंदरमध्ये  भाजपचे दोन नेते शिंदे गटात दाखल

एकमेकांचे नेते आणि पदाधिकारी पक्षात घेऊ नयेत, असा अलिखित करार भाजप आणि शिवसेना (एकनाथ शिंदे गट) यांच्यात असल्याचे सांगितले जात होते. मात्र मिरा-भाईंदरमध्ये या परस्पर सामंजस्याला तडा गेल्याचे चित्र स्पष्ट झाले आहे. भाजपचे दोन नेते पक्षाला सोडचिठ्ठी देत शिवसेना (शिंदे गट) मध्ये सामील झाले आहेत. आगामी महापालिका निवडणुकीच्या पार्श्वभूमीवर भाजपमध्ये उमेदवारीसाठी इच्छुकांची मोठी गर्दी झाली आहे. त्यामुळे अनेकांना तिकीट मिळण्याची शक्यता कमी वाटत असून, याच कारणामुळे काही नेत्यांनी पक्षबदलाचा मार्ग स्वीकारल्याचे बोलले जात आहे.

26 Dec 2025 09:41 AM (IST)

Prashant Jagtap Join Congress: प्रशांत जगताप काँग्रेसमध्ये प्रवेश करणार

Pune Politics:   राजकीय वर्तुळात चर्चेत असलेले प्रशांत जगताप आज दुपारी १२ वाजता काँग्रेस पक्षात अधिकृत प्रवेश करणार असल्याची माहिती समोर आली आहे. मुंबईतील दादर भवन येथे हा पक्षप्रवेश होणार असून, याबाबत जवळपास अंतिम निर्णय निश्चित झाल्याचे सूत्रांकडून सांगण्यात येत आहे. प्रशांत जगताप यांच्यासमोर भाजप, काँग्रेस, शिवसेना तसेच शिवसेना (उद्धव बाळासाहेब ठाकरे) गट असे अनेक पर्याय खुले होते. विविध पक्षांकडून त्यांच्याशी संपर्क साधण्यात आला होता. मात्र, अखेर त्यांनी काँग्रेस पक्षात प्रवेश करण्याचा निर्णय घेतल्याचे स्पष्ट झाले आहे.

26 Dec 2025 09:36 AM (IST)

Free Fire Max: गेममध्ये लाईव्ह झाला Dream Ring ईव्हेंट

फ्री फायर मॅक्स प्लेअर्ससाठी आनंदाची बातमी आहे. गेममध्ये ड्रिम रिंग लक रॉयल ईव्हेंट आता लाईव्ह झाला आहे. हा ईव्हेंट ख्रिसमस थिमवर आधारित आहे. यामध्ये मिळणारे ग्लू वॉल, व्हीकल आणि वेपन स्किनचे डिझाईन सेंटा क्लॉसची सवारी म्हणजेच रेंडियरने प्रेरित आहे. या गेमिंग रिवॉर्डशिवाय प्लेअर्सना या ईव्हेंटमध्ये यूनिवर्सल रिंग टोकन देखील क्लेम करण्याची संधी मिळणार आहे. गेमिंग कंपनी गरेनाचं असं मत आहे की, अशा प्रकराच्या रिवॉर्ड्समुळे प्लेअर्सना एक्सक्लूसिव गेमिंग आयटम जिंकण्याची संधी मिळते आणि यामुळे प्लेअर्सचा गेमिंगचा अनुभव पूर्वीपेक्षा अधिक चांगला होतो.

26 Dec 2025 09:30 AM (IST)

Vijay Hazare Trophy च्या टॉप-5 संघांच्या यादीत, बिहारच्या आधी या संघाने ओलांडला होता 500 धावांचा टप्पा

Vijay Hazare Trophy :  विजय हजारे ट्रॉफीने भारतीय स्थानिक क्रिकेटच्या मर्यादित षटकांच्या स्वरूपाचा उत्साह पुन्हा जिवंत केला आहे. त्याचे कारण म्हणजेच भारतीय संघामधील काही दिग्गज खेळाडूंचा स्पर्धेमध्ये समावेश. या स्पर्धेमध्ये एक वेगळा उत्साह पाहायला मिळाला आणि चाहत्यांची गर्दी  बिहारने बुधवारी विक्रमी सांघिक धावसंख्येसह लिस्ट ए मोहिमेची सुरुवात केली. रांची येथे अरुणाचल प्रदेशविरुद्ध बिहारने ५० षटकांत ६ गडी गमावून ५७४ धावा केल्या, जी विजय हजारे ट्रॉफीच्या इतिहासातील सर्वोच्च सांघिक धावसंख्या आहे.