शेतकऱ्यांच्या नुकसानीवरुन रोहित पाटील आक्रमक, उद्या तासगावात लाक्षणिक उपोषण; नेमकं काय आहेत मागण्या?

शेतकऱ्यांच्या प्रश्नांवरुन आमदार रोहित पाटील यांच्या नेतृत्वाखाली एक ऑक्टोबर २०२५ रोजी तासगाव तहसील कार्यालयासमोर एकदिवसीय लाक्षणिक उपोषण होणार आहे.

तासगाव/प्रवीण शिंदे : तासगाव तालुक्यात गेल्या काही दिवसांत झालेल्या अवकाळी पावसाने शेतकऱ्यांचे जगणे अक्षरशः उद्ध्वस्त केले आहे. हातातोंडाशी आलेला हंगाम पाण्याखाली गेला आहे, अनेक शेतकरी कर्जाच्या खाईत अधिक खोल गेले, तर काहींच्या डोळ्यासमोर वर्षभराची मेहनत पाण्यात वाहून गेली. या गंभीर परिस्थितीकडे शासनाने तात्काळ लक्ष द्यावे, या मागणीसाठी आमदार रोहित पाटील यांच्या नेतृत्वाखाली एक ऑक्टोबर २०२५ रोजी तासगाव तहसील कार्यालयासमोर एकदिवसीय लाक्षणिक उपोषण होणार आहे.

शेतकरी हवालदिल, शासन मात्र मौन

तासगाव तालुक्यातील बहुतांश गावांमधील शेतजमिनी पाण्याखाली गेल्या आहेत. खरीप पिकांची अवस्था बिकट असून, शेतकऱ्यांवर जगण्याचे संकट ओढवले आहे. अशा वेळी शासनाने तातडीने ठोस निर्णय घ्यायला हवा होता. मात्र, आजवर केवळ आश्वासनांच्या पलीकडे काहीच घडलेले नाही. शासन यंत्रणा पंचनाम्यांच्या नावाखाली वेळ मारून नेत आहे, तर मदतीचा प्रश्न अजूनही हवेतच आहे.

उपोषणातील ठोस मागण्या

आमदार पाटील यांनी शासनासमोर काही ठोस मागण्या ठेवत या उपोषणाची दिशा स्पष्ट केली आहे.

• अतिवृष्टी झालेल्या सर्व भागांमध्ये सरसकट पंचनामे व्हावेत.
• शेतकरी बांधवांची संपूर्ण कर्जमाफी करावी.
• तालुक्यातील परिस्थितीला अनुसरून ओला दुष्काळ जाहीर व्हावा.
• नुकसानभरपाईची अनुदान रक्कम वाढवून तातडीने द्यावी.
• शेतकऱ्यांची बँक वसुली व कर वसुली थांबवावी.
• सर्वसामान्य जनतेस निराधार पेन्शनची थकलेली रक्कम त्वरित मिळावी.
• थांबवलेली रोजगार हमी योजना पूर्ववत सुरु करावी.

आजचा शेतकरी फक्त उत्पादन करत नाही, तर आपल्या रक्ताने आणि घामाने संपूर्ण अर्थव्यवस्थेला आधार देतो. तरीसुद्धा संकटाच्या काळात त्याच्याकडे मदतीसाठी बोट दाखवणारे हात दिसत नाहीत. शेतकऱ्यांच्या समस्या समजून घेऊन त्यावर तातडीने उपाययोजना करणं हे शासनाचं कर्तव्य आहे. पण आज परिस्थिती अशी आहे की शेतकरी आंदोलनाशिवाय सरकार हलत नाही.

तासगाव तहसीलसमोर होणारे हे उपोषण हा केवळ एक राजकीय उपक्रम नाही, तर शेतकऱ्यांच्या अस्तित्वाचा प्रश्न आहे. शासनाने जर अजूनही दुर्लक्ष केले, तर शेतकऱ्यांच्या असंतोषाची ठिणगी मोठ्या आंदोलनात परिवर्तित होईल, यात शंका नाही.

हे सुद्धा वाचा : शेतकऱ्यांना सरकारने तात्काळ भरीव मदत द्यावी, अन्यथा…; काँग्रेसच्या बड्या नेत्याचा इशारा