गुरुवार, 12 नोव्हेंबर 2026
मुंबई रेल्वे स्थानकांवर भोजपुरी गाणी (Photo - X)
मुंबई : मुंबईतील रेल्वे स्थानकांवर भोजपुरी गाणी वाजवण्यावरून आता राजकीय वातावरण चांगलंच तापलं आहे. छठपूजेच्या निमित्ताने मध्य आणि हार्बर रेल्वे मार्गावरील काही स्थानकांवर भोजपुरी गाणी वाजवण्यात आली. यावरून ठाकरे गट, मनसेसह विविध संघटनांनी आक्षेप घेतल्यानंतर रेल्वे प्रशासनाने आपली बाजू मांडली आहे. मात्र, रेल्वेच्या स्पष्टीकरणानंतरही मराठी विरुद्ध भोजपुरी असा नवा वाद रंगताना दिसत आहे. (Mumbai News)
छठपूजेच्या निमित्ताने महाराष्ट्रातून मुंबईमार्गे बिहार आणि उत्तर प्रदेशला जाणाऱ्या प्रवाशांची संख्या मोठी आहे. पुढील तीन ते चार दिवसांत दररोज तब्बल 50 ते 60 हजार प्रवासी प्रवास करत असल्याचं रेल्वेने स्पष्ट केलं आहे. या प्रवाशांच्या सांस्कृतिक भावनांचा विचार करून उद्घोषणांच्या दरम्यान सांस्कृतिक गाणी वाजवली जात असल्याची माहिती मध्य रेल्वेचे जनसंपर्क अधिकारी स्वप्नील नीला यांनी दिली.
मात्र, या निर्णयावरून आता स्थानिक भाषा आणि संस्कृतीचा मुद्दा ऐरणीवर आला आहे. राज्यातील विविध राजकीय संघटना आणि मराठी भाषेसाठी काम करणाऱ्या बिगर राजकीय संघटनांनी तीव्र आक्षेप घेतला आहे. राज्यात कोणत्याही प्रकारचे सांस्कृतिक आक्रमण खपवून घेतले जाणार नाही, अशी भूमिका घेण्यात आली आहे. यामुळॆ आता पुन्हा मोठा वाद निर्माण झाल्याचं दिसत आहे.
ठाकरे गटाच्या नेत्या किशोरी पेडणेकर यांनी या प्रकरणावरून थेट मुख्यमंत्र्यांना लक्ष्य केलं. ‘महाराष्ट्राला बिहार-यूपीत नेऊन ठेवलं का?’ असा सवाल करत त्यांनी सरकारवर जोरदार टीका केली.
यूपी आणि बिहारमध्ये सुधारणा होत असताना महाराष्ट्राचे मुख्यमंत्री मात्र महाराष्ट्राला त्याच दिशेने घेऊन जात असल्याची टीका त्यांनी केली. संविधान बदलण्याच्या चर्चेचा संदर्भ देत त्यांनी सरकारच्या भूमिकेवरही प्रश्न उपस्थित केले.
मुंबईतील रेल्वे स्थानकांवर भोजपुरी गाणी मोठ्या आवाजात वाजवली जात असल्याचा आरोप पेडणेकर यांनी केला. रेल्वेच्या महत्त्वाच्या उद्घोषणा आणि वेळापत्रकाच्या सूचना बाजूला ठेवून गाण्यांना प्राधान्य दिलं जात असेल, तर हा प्रकार चुकीचा असल्याचं त्या म्हणाल्या.
‘उत्तर प्रदेश आणि बिहारमधील रेल्वे स्थानकांवर महाराष्ट्राची गाणी लावली जातील का?’ असा सवालही त्यांनी केला. आम्ही गाण्यांच्या विरोधात नाही, मात्र स्थानिक भाषा आणि संस्कृतीचा सन्मान राखला गेला पाहिजे, अशी त्यांची भूमिका आहे.
Ans: छठपूजेच्या पार्श्वभूमीवर महाराष्ट्रातून दररोज 50 ते 60 हजार प्रवासी बिहार आणि उत्तर प्रदेशला जात असल्याने त्यांच्या सांस्कृतिक भावनांचा विचार करून उद्घोषणांच्या दरम्यान गाणी वाजवण्यात आल्याचं रेल्वेने सांगितलं.
Ans: किशोरी पेडणेकर यांनी रेल्वे प्रशासन आणि राज्य सरकारवर टीका केली. उत्तर प्रदेश आणि बिहारमधील रेल्वे स्थानकांवर महाराष्ट्राची गाणी वाजवली जातील का, असा सवाल त्यांनी उपस्थित केला.
Ans: मध्य रेल्वेचे जनसंपर्क अधिकारी स्वप्नील नीला यांच्या माहितीनुसार, छठपूजेसाठी पुढील तीन ते चार दिवसांत दररोज 50 ते 60 हजार प्रवासी महाराष्ट्रातून बिहार आणि उत्तर प्रदेशला जाणार आहेत. त्यामुळे उद्घोषणांच्या दरम्यान सांस्कृतिक गाणी वाजवली जात असल्याचं रेल्वेने स्पष्ट केलं.
