(फोटो सौजन्य-सोशल मीडिया)
झटपट विकास होणाऱ्या पाथर्डी शिवारात खरात याने सन २०२२ मध्ये सर्व्हे नंबर ३२७ मध्ये जागा घेवून त्याठिकाणी टोलेजंग इमारत उभारली. अर्थातच ही इमारत उभारतांना खरात याला त्याच्या शासकीय अधिकाऱ्यांचा संबंधाचा पुरेपूर लाभ झाला. इमारतीला बांधकाम परवानगी ते पुर्णत्वाचा दाखला देण्यात महापालिकेच्या अधिकाऱ्यांनी कुठलीही कसूर ठेवली नाही. तथापि, खराताच्या या नवीन इमारतीत येण्या-जाण्यासाठी जागा उपलब्ध नसल्याने खरात याने अधिकाऱ्यांना हाताशी धरून लगतच्या प्लॉटधारकांच्या जागेतून जागा मिळावी यासाठी दबाव टाकण्यास सुरूवात केली. तंत्र-मंत्राच्या सहाय्याने ‘तुमच्या जागा भविष्यात विक्री करू देणार नाही’ अशी धमकी खरात याने दिल्याने त्याच्या आजुबाजुच्या प्लॉटधारकांनी वर्षे-दोन वर्षे आपल्या जागेवर बांधकाम बंद केले. कालांतराने खरात याने हा नाद सोडून दिला असला तरी, त्यानंतर पाथर्डी शिवारात सुमारे ३० ते ४० एकर जागा वेगवेगळ्या माध्यमातून खरेदी केल्याचे आता स्थानिक रहिवाशी सांगत आहेत. खरात याच्याकडे जमीन खरेदीसाठी शंभर ते दिडशे कोटी रूपये कोठून आले असा सवालही केला जात आहे.
दरम्यान दोन वर्षापुर्वी इंदिरानगरमध्ये राहणाऱ्या एका महिला अधिकाऱ्याच्या अपहरण प्रकरणातही खरात याचे नाव घेतले जात आहे. त्यासाठी त्याला सिन्नरच्या एका व्यक्तीने मदत केल्याचेही आता बोलले जात आहे. सदर महिला अधिकारी काही काळ निफाड-सिन्नरला कार्यरत होती. त्यातून तिचे व खरात याचा संबंध आला. काही तरी कुरबुरी झाल्यानंतर संबंधात वितृष्टता आल्याने सायंकाळच्या सुमारास घराबाहेर शतपावली करण्यास बाहेर पडलेल्या या महिला अधिकाऱ्याचे एका कारचालकाने अपहरण केल्याची घटना घडली होती. महिलेच्या पतीने इंदिरानगर पोलिसात तक्रार दिल्यानंतर तपासाची चक्रे फिरली व महिला अधिकारी अचानक प्रकट झाली. या गुन्ह्याचा तपास बंद करण्यात आला असला तरी, महिला अधिकाऱ्याचे अपहरणात नेमके कोण होते? कशासाठी अपहरण करण्यात आले हे सारे प्रश्न अद्यापही गुलदस्त्यातच आहेत. खरात याच्या लैगीक प्रकरणानंतर आता त्या प्रकरणाकडेही याच अंगाने पाहिले जात आहे.
दरम्यान, खरात याने त्याच्या पाथर्डीच्या इमारतीच्या आजूबाजूला रहिवाशांना धमकाविण्याचे प्रकार सातत्याने सुरू असल्याचे पाहून एका जागा मालकाने थेट इंदिरानगर पोलीस ठाण्यात धाव घेवून खरात विरूद्ध अदखलपात्र गुन्ह्याची नोंद केली होती. तत्कालीन इंदिरानगरचे पोलीस व तपास अधिकाऱ्यांनी त्यात पुढे काय केले हे अद्यापही समोर आलेले नाही. मात्र त्यावेळी एक सहाय्यक पोलीस आयुक्त दर्जाच्या अधिकाऱ्याने खरातला सहकार्य करीत सदरचे प्रकरण रफादफा करण्यास मदत केल्याचेही बोलले जात आहे.
.png "Videos"){kind=small}
