सोमवार, 5 ऑक्टोबर 2026
नाशिकमधील बंद मनपा शाळा पुन्हा सुरू होणार; दादाजी भुसे यांचे अधिकाऱ्यांना तातडीचे निर्देश (Photo - Social Media)
Nashik News : नाशिक महानगरपालिका हद्दीतील बंद असलेल्या शाळांचे आवश्यक दुरुस्ती आणि पायाभूत सुविधांसह पुनरुज्जीवन करून त्या पुन्हा सुरू कराव्यात, असे निर्देश शालेय शिक्षण मंत्री दादा भुसे यांनी दिले आहेत. या शाळांमध्ये विद्यार्थ्यांसाठी सुरक्षित, स्वच्छ आणि सुविधायुक्त शैक्षणिक वातावरण निर्माण करण्यावर भर देण्याच्या सूचनाही त्यांनी दिल्या.
मनपा शाळांमधील विद्यार्थीसंख्या वाढवण्यासाठी प्रभावी नियोजन आणि ठोस कृती आराखडा तयार करून त्याची अंमलबजावणी करावी, असंही मंत्री भुसे यांनी स्पष्ट केलं.
मंत्री दादा भुसे यांनी नाशिक शहरातील पंचवटी येथील मनपा प्राथमिक शाळा क्रमांक 30, सिडको येथील मनपा माध्यमिक शाळा आणि जेलरोड येथील मनपा शाळा क्रमांक 56 यांची पाहणी केली.
Satara News: :दुष्काळाच्या कचाट्यात शेतकरी; दूध व्यवसायानेही सोडली साथ!
यावेळी त्यांनी शाळांमधील उपलब्ध शैक्षणिक सुविधा, वर्गखोल्या, इमारतींची सद्यस्थिती, पायाभूत सुविधा आणि विद्यार्थ्यांच्या शैक्षणिक स्थितीचा आढावा घेतला.
यावेळी महापौर हिमगौरी आहेर-आडके, उपमहापौर विलास शिंदे, अजय बोरस्ते, प्रविण तिदमे यांच्यासह महानगरपालिका प्रशासनातील संबंधित अधिकारी उपस्थित होते.
महानगरपालिका हद्दीतील सध्या बंद असलेल्या सर्व शाळांची सद्यस्थिती तपासून त्यांचं योग्य पद्धतीने वर्गीकरण करावं, अशा सूचना भुसे यांनी दिल्या.
ज्या शाळांच्या इमारती किंवा परिसरात दुरुस्तीची आवश्यकता आहे, तिथली कामं प्राधान्याने आणि तातडीने पूर्ण करण्याचे निर्देश देण्यात आले आहेत. शाळा पुन्हा सुरू करण्यासाठी आवश्यक असलेल्या मूलभूत सुविधा, स्वच्छता, सुरक्षितता, वर्गखोल्या आणि विद्यार्थ्यांसाठीच्या इतर सुविधांची उपलब्धता सुनिश्चित करण्यासही सांगण्यात आलं.
मनपा शाळांमध्ये विद्यार्थ्यांना दर्जेदार शैक्षणिक सुविधा मिळण्यासोबतच शाळांच्या इमारती आणि परिसर आकर्षक असणंही गरजेचं असल्याचं मंत्री भुसे यांनी सांगितलं.
शाळांमध्ये सकारात्मक आणि आनंददायी वातावरण निर्माण झाल्यास पालकांचा मनपा शाळांकडे पाहण्याचा दृष्टिकोन अधिक सकारात्मक होण्यास मदत होईल. त्यामुळे केवळ बंद शाळा पुन्हा सुरू न करता विद्यार्थीसंख्या वाढवण्यासाठी ठोस कृती आराखडा तयार करून त्याची प्रभावी अंमलबजावणी करावी, असे निर्देश त्यांनी दिले.
शाळांच्या पाहणीदरम्यान उपलब्ध शैक्षणिक साधने, विद्यार्थ्यांसाठीच्या सुविधा आणि आवश्यक सुधारणांबाबत अधिकाऱ्यांकडून माहिती घेण्यात आली.
ज्या ठिकाणी आवश्यक कामं प्रलंबित आहेत, ती कामं कालबद्ध पद्धतीने पूर्ण करण्यासाठी तातडीने कार्यवाही करावी, अशा सूचनाही मंत्री दादा भुसे यांनी संबंधित अधिकाऱ्यांना दिल्या.
Wai News : बिबट्याच्या वाढत्या वावराने पश्चिम वाईत भीती; पिंजरे-कॅमेरे बसवण्याची मागणी
