देशभक्तीने भारावलेल्या ५ हजार नागरिकांचा तिरंगा रॅलीत सहभाग

भारतीय स्वातंत्र्याच्या अमृतमहोत्सवानिमित्त माळशिरस अकलूज या भागातील नागरिकांमध्ये विशेषत: या भागातील तरुण पिढीमध्ये राष्ट्रभक्तीचे वातावरण निर्माण व्हावे यासाठी माळशिरस तालुक्याच्या पूर्व व पश्चिम भागातून दोन तिरंगा मोटरसायकल रॅलीचे आयोजन करण्यात आले होते. या रॅलीमध्ये पाच हजार नागरिकांनी सहभाग घेतला.

सोलापूर : भारतीय स्वातंत्र्याच्या अमृतमहोत्सवानिमित्त माळशिरस अकलूज या भागातील नागरिकांमध्ये विशेषत: या भागातील तरुण पिढीमध्ये राष्ट्रभक्तीचे वातावरण निर्माण व्हावे यासाठी माळशिरस तालुक्याच्या पूर्व व पश्चिम भागातून दोन तिरंगा मोटरसायकल रॅलीचे आयोजन करण्यात आले होते. या रॅलीमध्ये पाच हजार नागरिकांनी सहभाग घेतला व संपूर्ण तालुक्यात देशभक्तीमय वातावरणाची निर्मिती केली.

स्व. शंकरराव मोहिते पाटील सहकारी साखर कारखाना व अन्य सहकारी संस्थेच्या माध्यमातून तिरंगा बाईक रॅलीचे आयोजन करण्यात आले होते. या रॅलीस आजादी का अमृत महोत्सव सोहळा समिती अकलूजचे अध्यक्ष जयसिंह मोहिते पाटील व कार्याध्यक्ष संग्रामसिंह मोहिते पाटील यांनी हिरवा झेंडा दाखवला. भारत माता की जय, वंदे मातरम्, इंनक्लाब जिंदाबादच्या जयघोषात व देशभक्तीच्या वातावरणात तरूणाईच्या सळसळत्या जोशात अडीच हजार मोटरसायकल स्वार तिरंगा रॅली संपन्न झाली. या रॅलींचे संपूर्ण तालुक्यात मोठ्या उत्साही व देशभक्तीच्या वातावरणात स्वागत करण्यात आले. मोटारसायकलवर लावण्यात आलेल्या तिरंगा झेंड्यामुळे संपूर्ण रॅली मार्ग तिरंगामय झाली होती.

ही रॅली शंकरनगर, सदुभाऊ चौक, माळीनगर, २५/४, महाळूंग, श्रीपूर, बोरगांव, माळखांबी, बोंडले, वेळापूर, खंडाळी, माळेवाडी, प्रतापसिंह चौक, आंबेडकर चौक, गांधी चौक, सदुभाऊ चौक मार्गे विजयसिंह मोहिते-पाटील क्रीडा संकुल येथे पोहोचली. माळशिरस तालुक्याच्या पूर्व व पश्चिम भागातून आलेल्या दोन्ही रॅली अकलूज येथील क्रिडा संकुलात पोहोचल्यानंतर या रॅलीचा प्रवाह एका मोठ्या तिरंगारुपी महासागरात रूपांतरित झाला होता.

[read_also content=”महाविद्यालयाचे दोन विद्यार्थी ट्रकखाली चिरडून ठार https://www.navarashtra.com/maharashtra/two-college-students-were-crushed-to-death-under-a-truck-nrdm-314804.html”]

“आपल्या देशाला स्वातंत्र्य मिळून ७५ वर्षे पूर्ण होत आहेत. त्यानिमित्त केंद्र शासन आजादी का अमृत महोत्सव हा कार्यक्रम संपूर्ण देशभरात राबवित आहे. त्याच अनुषंगाने माळशिरस -अकलूज या भागातील तरुण पिढी मध्ये देशभक्तीचे वातावरण निर्माण करणे व बलशाली राष्ट्र निर्मितीमध्ये तरुणाईचा सहभाग घेणे व या भागातील नागरिकांमध्ये जाज्वल राष्ट्रभक्ती निर्माण करणे यासाठी माळशिरस तालुक्याच्या पूर्व पश्चिम भागातून दोन तिरंगा बाईक रॅलीचे आयोजन करण्यात आले होते.”

– धैर्यशील मोहिते पाटील (कार्याध्यक्ष, स्वातंत्र्य दिन अमृत महोत्सव सोहळा समिती, अकलूज)