पुणे : पुण्याचे नवनियुक्त आयुक्त अमितेश कुमार (Amitesh Kumar) हे एक्शन मोडमध्ये आले आहेत. आल्यानंतर त्यांनी लगेचच पुण्यातील कुख्यात गुंडांना एकसाथ आयुक्तालयामध्ये बोलावले. ऑन रेकॉर्ड असणाऱ्या या गुंडांची परेड आयुक्तांनी घेतल्यानंतर आता शहरातील अवैध धंदे करणारे लोक रडारवर आले (Illegal business Parade) आहेत. पुणे पोलिसांनी (Pune Police) दुसऱ्या दिवशी देखील परेड करत अवैध धंदे करणारे आणि बेकायदा शस्त्रे बाळगणाऱ्या लोकांची हजेरी घेतली आहे.
पुणे शहरामध्ये अवैध धंदे करणारे आणि बेकायदेशीररित्या हत्यारे बाळगणाऱ्या लोकांची परेड घेण्यात आली आहे. गांजा, ड्रग्ज बाळगणाऱ्या ऑन रेकॉर्डवरील 500 हून अधिक गुन्हेगारांची पुणे पोलिस आयुक्तालयामध्ये ओळख परेड घेण्यात आली. शहरातील 30 पोलीस स्टेशनच्या हद्दीतील अमली पदार्थ विक्रेते, गांजा विक्रेते यांना बोलावून घेण्यात आले. त्यांना गांजा विक्री बंद म्हणजे बंद अशा शब्दांमध्ये पुणे पोलिसांनी तंबी दिली.
पुणे शहरामध्ये काही दिवसांपूर्वी ससून रुग्णालयातील ललित पाटीलचे मोठे ड्रग्ज रॅकेट उघडकीस आले होते. यामुळे शहरातील प्रशासनावर प्रश्नचिन्ह उपस्थित करण्यात आले. यानंतर कुख्यात गुंड शरद मोहोळ याची भरदिवसा हत्या करण्यात आल्यामुळे पुण्यात परत गॅंगवॉर होण्याची शक्यता वर्तवली जात होती. या सगळ्या प्रकरणानंतर पुणे पोलिसांनी कुख्यात गुंड व अवैध धंदे, अमली पदार्थ विकणारे आणि बेकायदेशीररित्या हत्यारे बाळगणाऱ्यांना दम भरला आहे. त्यांना अवैध धंदे बंद करण्याची तंबी देण्यात आली असून अमली पदार्थ पूर्णपणे थांबवण्याचे आदेश देण्यात आले आहे.
