शुक्रवार, 16 ऑक्टोबर 2026
बारामती लोकअदालतीत 5627 प्रकरणे निकाली; 6 कोटी ४४ लाख ७२ हजार ६२३ रुपयांची वसुली
बारामती : बारामती न्यायालयात शनिवारी (दि. १२) आयोजित राष्ट्रीय लोकअदालतीमध्ये दाखल व दाखलपूर्व अशी एकूण ५६२७ प्रकरणे तडजोडीने निकाली काढण्यात आली. या प्रकरणांमधून एकूण ६ कोटी ४४ लाख ७२ हजार ६२३ रुपयांची वसुली करण्यात आली. जिल्हा न्यायाधीश-१ व्ही. सी. बर्डे यांच्या अध्यक्षतेखाली राष्ट्रीय लोकअदालतीचे आयोजन करण्यात आले होते. यावेळी मोटार वाहन अपघाताशी संबंधित १९ प्रकरणांमध्ये तडजोड झाली. या प्रकरणांमध्ये संबंधित पक्षकारांना एकूण २ कोटी ५३ लाख ७० हजार रुपयांची नुकसानभरपाई मिळवून देण्यात आली.
या प्रकरणांमध्ये विमा कंपन्यांच्या वतीने ॲड. संतिकर व ॲड. भोई, तर पक्षकारांच्या वतीने ॲड. अजय खोमणे, ॲड. अक्षय महामुनी, ॲड. अभी देशमुख, ॲड. खांडेकर, ॲड. फुलारी व ॲड. वाघ यांनी काम पाहिले. लोकअदालतीसाठी विविध पॅनेलवर जिल्हा न्यायाधीश-१ व्ही. सी. बर्डे, जिल्हा न्यायाधीश-४ एच. ए. वाणी, दिवाणी न्यायाधीश वरिष्ठ स्तर डी. एस. झंवर, चौथे सहदिवाणी न्यायाधीश वरिष्ठ स्तर पी. एम. पाटील, दुसरे सहदिवाणी न्यायाधीश कनिष्ठ स्तर पी. पी. काळे आणि तिसरे सहदिवाणी न्यायाधीश कनिष्ठ स्तर व्ही. व्ही. देशमुख यांनी कामकाज पाहिले.
बारामती वकील संघटनेच्या सचिव स्नेहा मखरे, खजिनदार हर्षद टिकोटे यांच्यासह अन्य वकील उपस्थित होते. तसेच न्यायालयीन कर्मचारी, महावितरण, स्टेट बँक ऑफ इंडिया, बँक ऑफ इंडिया, बँक ऑफ बडोदा, बँक ऑफ महाराष्ट्र, कॅनरा बँक, नगरपरिषद व पंचायत समितीचे अधिकारी उपस्थित होते.
दरम्यान, पुढील राष्ट्रीय लोकअदालत १२ डिसेंबर २०२६ रोजी होणार आहे. जास्तीत जास्त पक्षकारांनी आपली प्रकरणे परस्पर संमतीने व तडजोडीने निकाली काढण्यासाठी लोकअदालतीचा लाभ घ्यावा, असे आवाहन जिल्हा न्यायाधीश-१ व्ही. सी. बर्डे यांनी केले.
