Amit Thackeray: पुण्यात अमित ठाकरेंच्या दौऱ्यात राड्याची ठिणगी? सरकारी महाविद्यालयातून मोदींचा फोटो हटवला, VIDEO व्हायरल

Amit Thackeray: मनसे विद्यार्थी सेनेचे अध्यक्ष अमित ठाकरे यांच्या पुण्यातील महाविद्यालयीन दौऱ्यादरम्यान सरकारी तंत्रशिक्षण महाविद्यालयातील नरेंद्र मोदी यांच्या फोटोवरून वाद निर्माण झाला. मनसे कार्यकर्त्यांनी मोदींचा फोटो खाली उतरवला. या घटनेचा व्हिडीओ सोशल मीडियावर व्हायरल होत आहे.

• शिवरायांच्या बाजूला मोदींचा फोटो कशाला?
• अमित ठाकरेंचा सवाल
• मनसे कार्यकर्त्यांनी क्षणात फोटो उतरवला

Amit Thackeray: महाराष्ट्र नवनिर्माण विद्यार्थी सेनेचे (MNS) अध्यक्ष अमित ठाकरे (Amit Thackeray) यांच्या पुणे दौऱ्याची सुरुवातच एका वेगळ्या वादामुळे चर्चेत आली आहे. विद्यार्थ्यांना मिळणाऱ्या सुविधा आणि त्यांच्या समस्या जाणून घेण्यासाठी अमित ठाकरे आज (31 ऑगस्ट 2026) शिवाजीनगर येथील सरकारी तंत्रशिक्षण महाविद्यालयात पोहोचले. मात्र, प्राचार्यांच्या कार्यालयातील नरेंद्र मोदी यांच्या छायाचित्रावरून यावेळी नवा वाद निर्माण झाला.

कँटिनपासून खेळाडूंच्या प्रशिक्षकापर्यंत विचारला जाब

महाविद्यालयाला भेट दिल्यानंतर अमित ठाकरे यांनी विद्यार्थ्यांना मिळणाऱ्या सुविधांची माहिती घेतली. कँटिनमध्ये मिळणाऱ्या जेवणाच्या दर्जाबाबत तसेच स्पोर्ट्स कोट्यातून प्रवेश मिळालेल्या खेळाडूंना प्रशिक्षक उपलब्ध नसल्याच्या मुद्द्यावर त्यांनी महाविद्यालय प्रशासनाला प्रश्न विचारले. विद्यार्थ्यांना आवश्यक सुविधा का उपलब्ध होत नाहीत, याबाबत त्यांनी प्राचार्यांकडून माहिती घेतली. याचवेळी एका विद्यार्थ्याने प्राचार्यांच्या कार्यालयातील छायाचित्रांकडे अमित ठाकरे यांचे लक्ष वेधले.

Aaple Sarkar Seva Kendra: पुणे जिल्ह्यात १,३७२ नवीन ‘आपले सरकार’ केंद्रांना मंजुरी; अर्ज करण्याची आज अंतिम मुदत!

‘शिवाजी महाराजांच्या बाजूला मोदींचा फोटो कशाला?’

शिवाजीनगर येथील सरकारी तंत्रशिक्षण महाविद्यालयातील कार्यालयात छत्रपती शिवाजी महाराज आणि डॉ. बाबासाहेब आंबेडकर यांच्या फोटोच्या शेजारी पंतप्रधान नरेंद्र मोदी यांचे फोटो लावण्यात आले होते. ते पाहिल्यानंतर अमित ठाकरे यांनी, शिवाजी महाराज आणि डॉ. बाबासाहेब आंबेडकर यांच्या बाजूला नरेंद्र मोदी यांचा फोटो कशासाठी लावण्यात आला आहे? असा सवाल उपस्थित केला. त्यानंतर लगेच उपस्थित मनसे कार्यकर्त्यांनी नरेंद्र मोदी यांचा फोटो त्या ठिकाणाहून खाली उतरवले. या संपूर्ण प्रसंगाचा व्हिडीओ सोशल मीडियावर व्हायरल झाल्याने राजकीय वर्तुळातही चर्चा सुरू झाली आहे.

सात महाविद्यालयांना भेट देणार अमित ठाकरे

अमित ठाकरे यांच्या पुणे दौऱ्याचा मुख्य उद्देश विद्यार्थ्यांशी थेट संवाद साधण्याचा आहे. पुण्यातील एकूण सात महाविद्यालयांना ते भेट देणार असून विशेषतः Gen Z विद्यार्थ्यांच्या समस्या, अडचणी, शैक्षणिक प्रश्न आणि प्रशासनाकडून असलेल्या अपेक्षा जाणून घेण्याचा त्यांचा प्रयत्न आहे. या दौऱ्यात विद्यार्थ्यांच्या विविध प्रश्नांकडे लक्ष वेधण्यासाठी वेगवेगळ्या स्वरूपातील कार्यक्रमांचेही नियोजन करण्यात आले आहे.

‘शैक्षणिक भ्रष्टाचार दहीहंडी’सह विविध उपक्रम

विद्यार्थ्यांच्या प्रश्नांकडे प्रशासनाचे लक्ष वेधण्यासाठी ‘शैक्षणिक भ्रष्टाचार दहीहंडी’ हा अभिनव उपक्रम आयोजित करण्यात आला आहे. विद्यार्थिनींच्या सुरक्षेचा मुद्दा मांडण्यासाठी ‘रक्षाबंधन’ उपक्रमाचाही समावेश करण्यात आला आहे. वाडिया महाविद्यालय परिसरात विद्यार्थ्यांसमोर उघडपणे होणाऱ्या सिगारेट आणि गुटखा विक्रीविरोधात कारवाईची मागणी केली जाणार आहे. याशिवाय माता रमाई आंबेडकर यांच्या स्मारकाला अभिवादन करण्याचाही दौऱ्यात समावेश आहे. एकीकडे अमित ठाकरे यांनी विद्यार्थ्यांच्या प्रश्नांवर आक्रमक भूमिका घेतली असताना दुसरीकडे सरकारी महाविद्यालयातील नरेंद्र मोदींचा फोटो हटवण्यात आल्याने या दौऱ्याला राजकीय वळण मिळण्याची शक्यता निर्माण झाली आहे.

तळेगावजवळ उभारणार नवीन MIDC! तब्बल 1100 एकर क्षेत्राचा प्रस्ताव; दरनिश्चितीनंतर…