Weather Update : राज्यातील तापमानात मोठी वाढ; रत्नागिरीत सर्वाधिक 39.2 अंश तापमान

पुढील दोन दिवस मुंबई आणि परिसरात तापमानाचा उच्चांक अनुभवायला मिळू शकतो. काही ठिकाणी पारा ३९ अंशांपर्यंत जाण्याची शक्यता असून, १५ ते १७ ऑक्टोबरदरम्यान कमाल तापमान ३६ ते ३७ अंशांपर्यंत खाली येऊ शकते, असा अंदाज आहे.

• मुंबईकरांनाही उन्हाचा चटका
• अनेक ठिकाणी पावसाची नोंद नसल्याने उष्णतेचा प्रभाव कायम
• मुंबईकरांना उन्हाचा चटका अधिक तीव्रतेने जाणवणार

पुणे : गेल्या काही दिवसांपासून वातारणात कमालीचा बदल जाणवत आहे. ऑक्टोबरच्या मध्यावरच राज्यात उन्हाचा चटका वाढला असून, रत्नागिरी येथे सोमवारी राज्यातील सर्वाधिक ३९.२ अंश सेल्सिअस कमाल तापमानाची नोंद झाली. त्यामुळे ऑक्टोबरमधील उन्हाची तीव्रता लक्ष वेधून घेत आहे. वैशाख महिन्यात जाणवणारा वणव्याचा चटकाही फिका पडावा, अशी परिस्थिती काही भागांत निर्माण झाली आहे.

भारतीय हवामानशास्त्र विभागाकडून मिळालेल्या आकडेवारीनुसार, नंदुरबार येथे ३८.९ अंश, हर्णे येथे ३८.५ अंश, मालेगाव येथे ३८.४ अंश, तर मुंबईतील सांताक्रूझ येथे ३८.२ अंश सेल्सिअस कमाल तापमान नोंदवले गेले. पुढील दोन दिवस मुंबई आणि परिसरात तापमानाचा उच्चांक अनुभवायला मिळू शकतो. काही ठिकाणी पारा ३९ अंशांपर्यंत जाण्याची शक्यता असून, १५ ते १७ ऑक्टोबरदरम्यान कमाल तापमान ३६ ते ३७ अंशांपर्यंत खाली येऊ शकते, असा अंदाज हवामान विभागाकडून व्यक्त करण्यात आला आहे.

रत्नागिरीत तापमान सर्वाधिक 39.2 अंशांवर गेले आहे. ठाणे-बेलापूर येथे ३८ अंश, तर सोलापूरमध्ये ३७.९ अंश तापमानाची नोंद झाली. जळगावमध्येही पारा ३७.४ अंशांवर पोहोचला. मात्र, दिवसा तापमान कमी होऊ लागले तरी आर्द्रतेमुळे उकाडा कायम राहण्याची शक्यता ही वर्तविण्यात आली. गेल्या तीन वर्षांतील हे सर्वोच्च कमाल तापमान असल्याचे हवामान विभागाने नमूद केले आले आहे.

अनेक ठिकाणी पावसाची नोंद नसल्याने उष्णतेचा प्रभाव कायम

मुंबईच्या कुलाबा केंद्रात ३६.५ अंश सेल्सिअस तापमान नोंदवले गेले. राज्यातील अनेक ठिकाणी पावसाची नोंद झाली नसल्याने उष्णतेचा प्रभाव कायम आहे. ऑक्टोबरमध्येही तापमानाचा पारा ३८ ते ३९ अंशांच्या आसपास पोहोचत असल्याने नागरिकांना उन्हाचा त्रास सहन करावा लागत आहे. हर्णे येथे १२ ऑक्टोबर रोजी कमाल तापमान ३८.५ अंश सेल्सिअस नोंदवले गेले.

मुंबईकरांना उन्हाचा चटका अधिक तीव्रतेने जाणवणार

ऑक्टोबरच्या मध्यावर मुंबईकरांना उन्हाचा चटका अधिक तीव्रतेने जाणवण्याची शक्यता आहे. मुंबईसह मुंबई महानगर प्रदेशात १३ आणि १४ ऑक्टोबरला कमाल तापमान ३८ ते ३९ अंश सेल्सिअसपर्यंत पोहोचण्याची शक्यता असून, त्यानंतर मात्र तापमानात हळूहळू घट होण्याचा अंदाज हवामान अभ्यासकांकडून व्यक्त करण्यात आला आहे.

दिवाळीच्या तोंडावर अधिक पावसाचा अंदाज व्यक्त

राज्यातून मान्सून माघारी फिरल्यानंतर आता ऑक्टोबरच्या उत्तरार्धात पुन्हा पावसाचे संकेत मिळत आहेत. भारतीय हवामान विभागाच्या विस्तारित श्रेणीतील अंदाजाच्या नकाशानुसार, २२ ऑक्टोबर ते ५ नोव्हेंबर या कालावधीत महाराष्ट्रासह पश्चिम किनारपट्टीच्या काही भागांत सरासरीपेक्षा अधिक पावसाची शक्यता दिसत आहे.