राजगुरुनगर बँकेच्या वार्षिक सभेला गालबोट, दोन सभासदांत हाणामारी; नेमकं काय घडलं?

राजगुरुनगर सहकारी बँकेच्या सर्वसाधारण सभेत जोरदार राडा झाला आहे. संचालक मंडळाला प्रश्न विचारत असताना सभासदांमध्ये हाणामारी झाल्याचा प्रकार उघडकीस आला आहे.

राजगुरूनगर/ प्रभाकर जाधव : पुणे जिल्ह्यातील सहकार क्षेत्रातील अग्रगण्य असलेल्या राजगुरुनगर सहकारी बँकेची ९४ वी वार्षिक सर्वसाधारण सभा रविवारी (दि. ७) चंद्रमा गार्डन येथे पार पडली. मात्र सभेदरम्यान एका तरुण सभासदाच्या वारंवार प्रश्नोत्तरांमुळे निर्माण झालेल्या वादातून दोन सभासदांमध्ये शिवीगाळ आणि हाणामारी झाली. त्यामुळे बँकेच्या वार्षिक सभेला प्रथमच गालबोट लागले आहे. इतर सभासदांनी तातडीने हस्तक्षेप करून संबंधित व्यक्तीला बाहेर काढत परिस्थिती नियंत्रणात आणली आहे.

सभेला बँकेचे अध्यक्ष सागर पाटोळे, उपाध्यक्ष अश्विनी पाचारणे, ज्येष्ठ संचालक किरण आहेर, तसेच संचालक मंडळाचे सदस्य, तज्ञ संचालक, वरिष्ठ अधिकारी आणि मोठ्या संख्येने सभासद उपस्थित होते. मुख्य कार्यकारी अधिकारी शांताराम वाकचौरे यांनी वार्षिक अहवालाचे वाचन केले, तर उपाध्यक्षांनी आभार मानले. सभेत मांडलेले सर्व विषय शेवटी सर्वानुमते मंजूर करण्यात आले. यावेळी सभासदांकडून अनेक मुद्द्यांवर प्रश्न विचारले गेले. त्याला अध्यक्ष सागर पाटोळे, संचालक किरण आहेर आणि सीईओ शांताराम वाकचौरे यांनी समाधानकारक उत्तरे दिली.

दरम्यान, अध्यक्ष पाटोळे यांनी बँकेच्या कार्याचा आढावा घेत सांगितले की, ग्राहकांसाठी इंटरनेट बँकिंग सुविधा सुरू करण्यात आली असून, सहकार क्षेत्रात केलेल्या कामगिरीबद्दल बँकेला विविध पुरस्कार मिळाले आहेत. तसेच बँकेने सूक्ष्म, लघु व मध्यम उद्योगांसाठी अनुदान पात्र कर्जवाटप करणारी पुणे जिल्ह्यातील पहिली बँक म्हणून मान मिळवल्याचेही त्यांनी सांगितले.

हे सुद्धा वाचा : पुणे ग्रामीण पोलीसांवर वाढता ताण; लोकसंख्येच्या तुलनेत कर्मचाऱ्यांची कमतरता

बँकेचे माजी अध्यक्ष दिनेश ओसवाल यांची पुणे जिल्हा नागरी सहकारी बँक्स असोसिएशनच्या संचालकपदी निवड झाल्याबद्दल आणि महाराष्ट्र अर्बन को-ऑपरेटिव्ह बँक्स फेडरेशनकडून मिळालेल्या द्वितीय क्रमांकाच्या पुरस्काराबद्दल त्यांचा विशेष सत्कार करण्यात आला. सभेतील वातावरण एकूण सकारात्मक असले तरी तरुण सभासदाच्या वादामुळे झालेल्या हाणामारीमुळे बँकेच्या वार्षिक सभेवर अनपेक्षित गालबोट लागले.

हे सुद्धा वाचा : आंदेकर-गायकवाड टोळ्यांनी गुन्हेगारीतील ‘तो’ नियम मोडला; पोलिसही गेले चक्रावून