बुधवार, 7 ऑक्टोबर 2026
नळाच्या पाण्यात चक्क साप! नेरळ ग्रामपंचायतीच्या पाणीपुरवठ्यावर प्रश्नचिन्ह; नागरिकांमध्ये खळबळ
नेरळ ग्रामपंचायत ही मध्य रेल्वेने जोडलेले जंक्शन स्थानक वरील गाव आहे. यामुळे गेल्या 30 वर्षात मोठ्या प्रमाणात नागरीकरण झाले असून नेरळ गाव आता शहरीकरण झाले आहे. त्यात नेरळ गावच्या काही अंतरावरून उल्हास नदी वाहत असून नेरळ गावात चांगली नळपाणी योजना राबवली जात आहेत. त्यामुळे नेरळ मधील स्वच्छ पाणी हीच नेरळ गावचे नागरीकरण वाढण्यास महत्वाची ठरली आहे.
मात्र सध्या याच नेरळ गावात राबवली जाणारी नेरळ ग्रामपंचायतीची नळपाणी सर्वांसाठी चर्चेची ठरली आहे. नेरळ गावात सप्टेंबर महिन्यात आलेले गढूळ पाण्याने नेरळ ग्रामपंचायतीचा कारभार स्पष्ट झाला होता. जलशुद्धीकरण केंद्र असलेल्या या योजनेतून शुद्ध पाणी येते आणि त्यामुळे सर्व लोक आनंदाने राहण्यासाठी आले. आता याच नेरळ मध्ये आता गढूळ पाण्यानंतर चक्क नळाच्या पाण्यातून साप येऊ लागले आहेत.
नेरळ गावातील सम्राट नगर भागातील अशोक गोपीनाथ जाधव यांच्या घरी आज सकाळी नळाच्या पाण्यासोबत चक्क साप आला. जाधव यांच्या घरातील महिला या पाण्यात खेळत असलेला साप पाहून गडबडल्या. मात्र पाण्यात राहणारा हा साप जाधव यांच्या घरात देखील मस्त स्वच्छंदपणे पाण्यात फिरत होता. अशोक जाधव यांना आपल्या घरातील पाण्यात फिरत असलेला साप याचा व्हिडिओ बनवला आणि व्हायरल केला. या पाण्यात फिरणाऱ्या सापाची माहिती नेरळ ग्रामपंचायत कडे दिली असता नेरळ ग्रामपंचायतने तत्काळ आपल्या कार्यालयातील प्लंबर तेथे पाठवले आहेत.त्या भागात कुठे जलवाहिनी फुटलेली आहे काय? फुटलेल्या जलवाहिनीतून सापाने पाण्याच्या जलवाहिनी मध्ये प्रवेश केला आहे काय? याचा तपास सुरू केला आहे.
आपण जलशुद्धीकरण केंद्रात पाणी शुद्ध करूनच पाठवत आहोत. त्या भागात कुठे पाइपलाइन लिकेज् असल्यास हा प्रश्न निर्माण होऊ शकतो.परंतु स्थानिक रहिवाशी आणि ज्येष्ठ कार्यकर्ते सिद्धार्थ सदावर्ते यांनी संपर्क केल्यानंतर तत्काळ प्लंबर पाठवले आहेत, तपास करीत असून साप कसा पाण्यासोबत आला याचा शोध घेतला जात आहे, अशी माहिती ग्रामपंचायत अधिकारी अरुण कार्ले यांनी दिली.
