कोल्हापूर : खासदार विनायक राऊत (MP Vinayak Raut) यांनी शुक्रवारी कोल्हापुरात झालेल्या मेळाव्यात राज्य नियोजन मंडळाचे कार्यकारी अध्यक्ष राजेश क्षीरसागर यांच्यावर टोकाची टीका केली. यास प्रत्युत्तर म्हणून कोल्हापूर शहर शिवसेनेच्या वतीने शनिवारी कोल्हापूर शहरातील छत्रपती शिवाजी महाराज चौकामध्ये अनोख्या पद्धतीने आंदोलन करण्यात आले.
शुक्रवारी केशवराव भोसले नाट्यगृहात झालेल्या शिवसैनिकांच्या मेळाव्यात बोलताना खासदार विनायक राऊत यांनी क्षीरसागर यांनी त्यांच्या निवासस्थानी दिलेल्या जेवणाचे पैसे हे तत्कालीन पालकमंत्री सतेज पाटील यांच्याकडून घेतले असल्याचे खळबळजनक वक्तव्य केले होते. या वक्तव्याचा समाचार म्हणून कोल्हापूर शहर शिवसेनेच्या वतीने त्यावेळी आयोजित मेजवानीचे राजेश क्षीरसागर यांनी खर्च केलेल्या जेवणाचे बिल स्पीड पोस्टने विनायक राऊत यांना पाठवून राऊत यांच्या वक्तव्याचा निषेध नोंदवला.
यावेळी बोलताना ऋतुराज क्षीरसागर यांनी गेली 36 वर्षे राजेश क्षीरसागर यांनी शिवसेना पक्षासाठी अर्पण केले असताना खासदार विनायक राऊत यांनी इतक्या खालच्या पातळीला जाऊन वक्तव्य करणे हे निषेधार्ह असून घरी येणाऱ्या गृहस्थाचे आदरातिथ्य करणाऱ्या अन्नदाताचा राऊत यांनी अपमान केला असल्याचे सांगितले. यावेळी शिवसैनिकांनी जय भवानी जय शिवाजीच्या जोरदार घोषणा दिल्या.
या आंदोलनात युवा नेते ऋतुराज क्षीरसागर ,जयवंत हरुगले,तुकाराम साळोखे,अश्विन शेळके,कपिल सरनाईक,मंदार तपकिरे,अविनाश कमते,दादू शिंदे,रणजित जाधव,मंगलताई साळोखे ,पूजा भोर,मंगल कुलकर्णी ,गौरी माळदकर,सुनीता भोपळे,उदय भोसले,सचिन क्षीरसागर ,अनिकेत राऊत,अंकुश निपाणीकर ,आकाश सांगावकर ,किरण पाटील,कपिल नाळे, शैलेंद्र गवळी,कृष्णा लोंढे,अर्जुन आंबी,विनोद हजारे ,सुनील माने,रियाज बागवान आदींसह शिवसैनिक मोठ्या संख्येने उपस्थित होते.
