सोमवार, 21 सप्टेंबर 2026
काशिमीरात मेट्रो ब्रिजखाली थरार! तरुणाच्या अंगावर कोसळला सिमेंटचा ब्लॉक; घटनेचा थरारक CCTV व्हिडिओ ‘नवराष्ट्र’च्या हाती
विजय काते, मिरा रोड : मिरा-भाईंदरच्या काशिमीरा परिसरात मेट्रो ब्रिजखाली सुरू असलेल्या कामादरम्यान सिमेंटचा मोठा ब्लॉक अचानक खाली कोसळल्याने २३ वर्षीय तरुण गंभीर जखमी झाल्याची धक्कादायक घटना समोर आली आहे. काशिमीरा येथील अक्षित बारसमोर ही घटना घडली. संपूर्ण प्रकार परिसरातील सीसीटीव्ही कॅमेऱ्यात कैद झाला असून या घटनेचे Exclusive CCTV फुटेज ‘नवराष्ट्र डिजिटल’च्या हाती लागले आहे.
मिळालेल्या माहितीनुसार, शादाब नावाचा २३ वर्षीय तरुण रस्ता ओलांडून जात होता. त्याचवेळी त्याच्या मोबाइलवर फोन आला. फोनवर बोलण्यासाठी तो रस्त्याच्या मध्यभागी काही क्षण थांबला. मात्र, पुढच्या काही क्षणांतच त्याच्यासोबत भयंकर प्रकार घडला. मेट्रो ब्रिजच्या परिसरात सुरू असलेल्या कामाच्या ठिकाणाहून अचानक सिमेंटचा मोठा ब्लॉक खाली कोसळला. हा ब्लॉक थेट शादाबच्या डोक्यावर आदळला. अचानक झालेल्या या घटनेत शादाब गंभीर जखमी झाला आणि रस्त्यावर कोसळला.
या घटनेनंतर शादाब गंभीर जखमी अवस्थेत रस्त्यावर पडून होता. मिळालेल्या माहितीनुसार, जवळपास तासभर तो त्याच ठिकाणी पडून होता. रस्त्याच्या कडेला मोठी वाहने उभी असल्यामुळे रस्त्यावरून जाणाऱ्या नागरिकांना आणि वाहनचालकांना तो सहज दिसला नसल्याचे सांगण्यात येत आहे. अखेर एका व्यक्तीचे शादाबकडे लक्ष गेले. त्यानंतर तातडीने मदतीसाठी धावपळ सुरू करण्यात आली. रिक्षाच्या मदतीने जखमी शादाबला मिरा रोड येथील वोखहार्ड हॉस्पिटलमध्ये उपचारासाठी दाखल करण्यात आले.
सिमेंटचा ब्लॉक थेट डोक्यावर आदळल्याने शादाबच्या डोक्याला गंभीर दुखापत झाली आहे. त्याच्यावर वोखहार्ड हॉस्पिटलमध्ये शस्त्रक्रिया सुरू असल्याची माहिती मिळाली आहे. या घटनेनंतर शादाबच्या कुटुंबीयांकडून पोलिसांकडे तक्रार दाखल करण्याची प्रक्रिया सुरू असल्याचे समजते.
या घटनेचा थरार परिसरातील सीसीटीव्ही कॅमेऱ्यात कैद झाला आहे. उपलब्ध फुटेजमध्ये तरुण रस्त्याच्या परिसरात असताना अचानक वरून वस्तू कोसळल्याचा प्रकार दिसत असल्याचे सांगण्यात येत आहे. या घटनेचे Exclusive CCTV फुटेज ‘नवराष्ट्र डिजिटल’च्या हाती लागले आहे.
या घटनेनंतर मेट्रो ब्रिजखाली सुरू असलेल्या कामाच्या ठिकाणी नागरिकांच्या सुरक्षेसाठी पुरेशा उपाययोजना करण्यात आल्या होत्या का, असा प्रश्न उपस्थित झाला आहे. मेट्रोचे काम सुरू असताना खालील रस्त्यावरून पादचारी आणि वाहनांची ये-जा सुरू असल्यास बांधकाम साहित्य खाली पडू नये यासाठी आवश्यक सुरक्षा व्यवस्था असणे महत्त्वाचे ठरते.
स्थानिकांच्या दाव्यानुसार, यापूर्वीही या परिसरात बांधकाम साहित्य तसेच लोखंडी वस्तू खाली पडण्याचे प्रकार घडले आहेत. या दाव्यांची अधिकृत पुष्टी होणे बाकी आहे. मात्र, आता सिमेंटचा मोठा ब्लॉक कोसळून तरुण गंभीर जखमी झाल्याने कामाच्या ठिकाणच्या सुरक्षा व्यवस्थेबाबत प्रश्न निर्माण झाले आहेत.
या घटनेला नेमके कोण जबाबदार आहे, सिमेंटचा ब्लॉक कोणत्या कारणामुळे खाली कोसळला आणि कामाच्या ठिकाणी आवश्यक सुरक्षा उपाय करण्यात आले होते का, याची चौकशी होण्याची गरज व्यक्त केली जात आहे. संबंधित यंत्रणांकडून या घटनेबाबत अधिकृत स्पष्टीकरण आल्यानंतरच दुर्घटनेचे नेमके कारण स्पष्ट होऊ शकणार आहे.
दरम्यान, गंभीर जखमी शादाबवर रुग्णालयात उपचार सुरू आहेत. त्याच्या कुटुंबीयांकडून पोलिसांत तक्रार देण्याची प्रक्रिया सुरू असल्याची माहिती असून, पुढील पोलीस कारवाईकडेही लक्ष लागले आहे.
