जे पाणी शहरात पोहोचलेच नाही, त्यावरून महापौर-मंत्री आमनेसामने! सूर्या प्रकल्पातील १२ एमएलडी पाण्यावरून वाद
या मुद्द्यावरून मीरा-भाईंदरच्या महापौर डिंपल मेहता आणि आमदार नरेंद्र मेहता यांनी मंत्री प्रताप सरनाईक यांना घेरले आहे. मीरा-भाईंदरच्या हक्काचे एक थेंबही पाणी ठाण्याला जाऊ देणार नाही, असा स्पष्ट इशारा त्यांनी दिला आहे. दुसरीकडे, मंत्री प्रताप सरनाईक यांनी या आरोपांना प्रत्युत्तर देत बैठकीचा उद्देश मीरा-भाईंदरला लवकरात लवकर सूर्या प्रकल्पाचे पाणी उपलब्ध करून देणे हा असल्याचे स्पष्ट केले. तसेच मेहता नागरिकांची दिशाभूल करत असल्याचा आरोपही त्यांनी केला.
सूर्या धरण प्रकल्पातून एकूण ४१५ एमएलडी पाणी उपलब्ध होणे अपेक्षित आहे. यापैकी मीरा-भाईंदर महानगरपालिकेला पुढील वर्षी २१८ एमएलडी पाणी मिळण्याची अपेक्षा आहे. तर वसई-विरार महानगरपालिकेसाठी १८० एमएलडी आणि ४४ गावांसाठी १५ एमएलडी पाणी निर्धारित करण्यात आले आहे.
वसई-विरार शहराला २०२४ पासून या प्रकल्पाचे पाणी मिळण्यास सुरुवात झाली आहे. अशा प्रकारे एकूण ४०३ एमएलडी पाण्याचे वाटप प्रस्तावित असून, सुमारे १२ एमएलडी पाणी शिल्लक राहते. मात्र, या वादाचा केंद्रबिंदू मीरा-भाईंदरसाठी निर्धारित २१८ एमएलडी पाणी नसून, प्रकल्पातील निर्धारित वाटपानंतर शिल्लक राहणाऱ्या १२ एमएलडी पाण्याच्या वापराबाबत आहे.
महापौर डिंपल मेहता यांनी सांगितले की, प्रताप सरनाईक हे मीरा-भाईंदरचेही प्रतिनिधित्व करतात. अशा परिस्थितीत शहराच्या हक्काचे पाणी ठाण्याला देण्याचा विचार होणे दुर्दैवी आहे. शहरातील नागरिकांच्या हिताशी कोणतीही तडजोड केली जाणार नाही, असे त्यांनी स्पष्ट केले. आमदार नरेंद्र मेहता यांनीही या मुद्द्यावर आक्रमक भूमिका घेत मीरा-भाईंदरच्या वाट्याचे पाणी ठाण्याला नेऊ दिले जाणार नाही, असा ठाम इशारा दिला आहे.
दुसरीकडे, परिवहन मंत्री प्रताप सरनाईक यांनी महापौर आणि आमदारांनी केलेले आरोप निराधार असल्याचे सांगत पलटवार केला आहे. शहरातील चेनच्या पाण्याच्या टाकीच्या कामात ७११ कंपनीकडून अडथळे निर्माण होत असल्याचा आरोप त्यांनी केला. पुढील तीन महिन्यांत मीरा-भाईंदरला २१८ एमएलडी पाणी उपलब्ध करून दिले जाईल, असा दावाही त्यांनी केला. नागरिकांना लवकरात लवकर पाणी मिळावे, हाच बैठकीचा मुख्य उद्देश असल्याचे त्यांनी स्पष्ट केले.
या संपूर्ण वादातील सर्वात महत्त्वाची आणि चिंताजनक बाब म्हणजे ज्या पाण्याच्या वाटपावरून लोकप्रतिनिधी आमनेसामने आले आहेत, ते पाणी अद्याप मीरा-भाईंदरमधील नागरिकांच्या घरापर्यंत पोहोचलेलेच नाही. २०१३ पासून कागदावर आकार घेत असलेल्या या प्रकल्पाबाबत २०१७ मधील महानगरपालिका निवडणुकीच्या काळात तत्कालीन मुख्यमंत्री देवेंद्र फडणवीस यांनी मीरा-भाईंदरला सूर्या प्रकल्पातून पाणी उपलब्ध करून देण्याचे आश्वासन दिले होते. त्यासाठी तीन वर्षांची मुदतही सांगण्यात आली होती. मात्र, पाहता पाहता दहा वर्षांहून अधिक काळ उलटला तरी शहरातील नागरिकांना या प्रकल्पाच्या पाण्याची प्रतीक्षा कायम आहे.
सूर्या प्रकल्पाच्या पाण्यावरून सध्या भाजप आणि शिवसेनेच्या नेत्यांमध्ये राजकीय संघर्ष सुरू झाला आहे. एकीकडे महापौर आणि आमदार शहराच्या हक्काच्या पाण्याबाबत ठाम भूमिका घेत आहेत, तर दुसरीकडे परिवहन मंत्री पुढील तीन महिन्यांत २१८ एमएलडी पाणी उपलब्ध करून देण्याचा दावा करत आहेत.
मात्र, या सर्व आरोप-प्रत्यारोपांच्या पलीकडे मीरा-भाईंदरकरांना प्रत्यक्षात पाणी कधी मिळणार, पाणीपुरवठ्यासाठी आवश्यक पायाभूत सुविधा कधी पूर्ण होणार आणि शिल्लक १२ एमएलडी पाण्याबाबत अंतिम निर्णय काय होणार, हे प्रश्न अद्याप अनुत्तरित आहेत. त्यामुळे सूर्या प्रकल्पाच्या पाण्यावरून सुरू झालेला हा राजकीय संघर्ष आगामी काळात आणखी तीव्र होण्याची शक्यता असून, नागरिकांना मात्र आश्वासनांऐवजी प्रत्यक्ष नळातून पाणी मिळण्याची प्रतीक्षा आहे.
Ans: सूर्या प्रकल्पातील शिल्लक १२ एमएलडी पाणी ठाणे शहराला देण्याच्या मुद्द्यावरून वाद निर्माण झाला आहे.
Ans: मिरा-भाईंदरच्या महापौर डिंपल मेहता आणि आमदार नरेंद्र मेहता यांनी या प्रस्तावाला विरोध दर्शवला आहे.
Ans: सूर्या प्रकल्पातील पाणी अद्याप मिरा-भाईंदर शहरात पोहोचलेले नसताना त्यातील शिल्लक १२ एमएलडी पाणी ठाण्याला देण्याच्या मुद्द्यावरून स्थानिक लोकप्रतिनिधींनी आक्षेप घेतला आहे.






