Strawberry Crop Revival : महाबळेश्वरमध्ये अवकाळी पावसामुळे स्ट्रॉबेरी उत्पादक शेतकऱ्यांना दिलासा; भुईमूग काढणीच्या कामालाही चालना

Strawberry Crop Revival : महाबळेश्वर तालुक्यात ऑगस्टपासून पावसाने दडी मारल्यामुळे स्ट्रॉबेरीसह खरीप पिके संकटात सापडली होती. मात्र, अर्णव वादळाच्या प्रभावामुळे सातारा जिल्ह्यात झालेल्या दमदार अवकाळी पावसाने शेतकऱ्यांना दिलासा मिळाला.

• महाबळेश्वर तालुक्यात स्ट्रॉबेरीचे पीक मोठ्या प्रमाणावर   
• भुईमूग काढणेही पावसाअभावी कठीण झाले   
• यंदा पेरणीसाठी केलेला खर्च तरी पदरात पडेल का  

Strawberry Crop Revival :  यंदा अल निनोच्या प्रभावामुळे ऑगस्ट महिन्यापासून पावसाने दडी मारल्याने महाबळेश्वर तालुक्यातील खरीप हंगामातील पिके संकटात सापडली होती. ऐन दाणा भरण्याच्या अवस्थेत पिकांना पाण्याची नितांत गरज असताना पावसाने पाठ फिरवली. त्यामुळे अनेक शेतांतील पिके सुकून गेली, तर उत्पादनात मोठी घट होण्याची भीती निर्माण झाली होती. मात्र, आंध्र किनारपट्टीवर निर्माण झालेल्या अर्णव वादळाच्या प्रभावामुळे शनिवारी पहाटेपासून सातारा जिल्ह्यात दमदार पावसाने हजेरी लावली आणि संकटात सापडलेल्या शेतकऱ्यांना काहीसा दिलासा मिळाला.

महाबळेश्वर तालुक्यात स्ट्रॉबेरीचे पीक मोठ्या प्रमाणावर

महाबळेश्वर तालुक्यात स्ट्रॉबेरीचे पीक मोठ्या प्रमाणावर घेतले जाते. तसेच डोंगरमाथ्यावरील शेतांमध्ये वाटाणा, फरसबी यांसारख्या नगदी पिकांची लागवड केली जाते. पावसाच्या दीर्घ खंडामुळे या पिकांवर प्रतिकूल परिणाम झाला होता. विशेषतः स्ट्रॉबेरीच्या लागवडीसाठी आवश्यक ओलावा मिळत नसल्याने शेतकरी चिंतेत होते. आता झालेल्या पावसामुळे जमिनीतील ओलावा वाढून स्ट्रॉबेरी पिकाला नैसर्गिक नवसंजीवनी मिळण्याची आशा निर्माण झाली आहे.

Karanja : विविध मागण्यांसाठी शेतकरी आक्रमक, शेतकरी एल्गार समितीतर्फे आंदोलन; प्रशासनाचे वेधले लक्ष

भुईमूग काढणेही पावसाअभावी कठीण झाले

दुसरीकडे, जमिनीखाली तयार झालेला भुईमूग काढणेही पावसाअभावी कठीण झाले होते. कडक जमिनीमुळे अनेक ठिकाणी शेतकऱ्यांना खुरप्याने माती टोकरून भुईमूग काढावा लागत होता. मात्र, पावसामुळे जमीन भुसभुशीत झाल्याने आता भुईमूग सहज उपटून काढणे शक्य झाले आहे.

यंदा पेरणीसाठी केलेला खर्च तरी पदरात पडेल का

यंदा पेरणीसाठी केलेला खर्च तरी पदरात पडेल की नाही, अशी चिंता शेतकऱ्यांना सतावत होती. काहींच्या मते, पेरलेले बियाणे तरी परत मिळेल का, अशी परिस्थिती होती. त्यामुळे झालेल्या पावसाने दिलासा मिळाला असला, तरी उत्पादनाच्या नुकसानीची चिंता कायम आहे.

Buldhana News: नुकसानग्रस्तांना १२५ कोटींची मदत, १ लाख ३५ हजार शेतकऱ्यांना लाभ; पालकमंत्री मकरंद जाधवांची माहिती