गुरुवार, 8 ऑक्टोबर 2026
विकासाच्या नावाखाली वाईच्या ऐतिहासिक घाटांची तोडफोड; कृष्णाकाठचा शेकडो वर्षांचा वारसा धोक्यात!
वाई हे ऐतिहासिक शहर आहे. शहरात अनेक ऐतिहासिक मंदिरे, घाट आहेत. शहरालगत वाहणाऱ्या कृष्णा नदीच्या काठावर तर काशीविश्वेश्वर, महा गणपतीसह अनेक मंदिरे, चिरेबंदी घाट आहेत. वाईतील हे घाट राज्याचे भूषण आहेत. सध्या नगरपालिकेकडून या घाटालगत सांडपाणी व्यवस्था, पदपथाची कामे सुरू आहे. मात्र, ही कामे करताना अनेक ठिकाणी या जुन्या स्थापत्याला धक्का लागला आहे. ठेकेदाराच्या या बेजबाबदार नियोजनामुळे घाटांच्या वारसास्थळाबाबत प्रश्नचिन्ह उपस्थित झाले आहे.
Ratnagiri: धरण उशाला अन् कोरड घशाला, रत्नागिरी पालिकेकडून नागरिकांना त्रास देण्याचे काम?
ब्राह्मणशाही घाटावर पूर्वी भाविक व पर्यटकांसाठी विसावा ठरलेले चार दगडी पार होते. या पारांची मोडतोड झाली आहे. याबाबत अनेक सामाजिक संस्थांनी पत्रव्यवहार करून पार पूर्ववत करण्याची मागणी केली होती. प्रशासनाने तसे आश्वासन दिल्याचे नागरिक सांगतात. मात्र, सद्यःस्थितीत चारपैकी एक पार तर पूर्णपणे गायब झाला आहे, तर उर्वरित तीन भग्नावस्थेत पडून आहेत. हे पार कोणी हटवले. गायब झालेला पार कुठे गेला असे प्रश्न नागरिक विचारत आहेत.
दुसरीकडे, कोजागरी पौर्णिमेचे दीपप्रज्वलन आणि पारंपरिक गणेश विसर्जनाचा मार्ग असलेल्या रामडोह आळीतील ऐतिहासिक पायऱ्यांचीही या विकासकामांमध्ये मोठी वाताहत झाली आहे. विस्कटलेले दगड आणि सिमेंट-फरशीच्या अवाजवी वापरामुळे घाटांचे नैसर्गिक सौंदर्य नष्ट होत असल्याचा आरोप होत आहे.
पुरातत्त्व विभागाची परवानगी न घेता, कोणतेही सर्वेक्षण न करता हे काम सुरू आहे का असा सवाल उपस्थित करत विकासकामांची करण्याची मागणी जोर धरत आहे. वाईचा विकास जरूर व्हावा; परंतु तो करताना समृद्ध इतिहासाची मोडतोड करून नव्हे, अशी ठाम भूमिका वाईकरांनी घेतली आहे. गायब पार तातडीने शोधून सर्व नुकसानग्रस्त रचना मूळ दगडी धाटणीतच पूर्ववत न केल्यास तीव्र आंदोलनाचा इशारा वाईकरांनी दिला आहे.
पालिकेने पदपथ आणि इतर कामे करताना ब्राह्मणशाही आणि रामडोह आळी येथील जुने ऐतिहासिक पार आणि दगडी पायऱ्या काढून टाकल्या आहेत. यामुळे ऐतिहासिक स्थापत्याचे नुकसान झाले असून ही तोडफोड तातडीने दुरुस्त करून देण्यात यावेत यासाठी पालिकेकडे वेळोवेळी पत्रव्यवहार करण्यात आला आहे. ही दुरुस्ती तातडीने करून द्याव्यात. श्रेयस खटावकर, सरपंच, कृष्णाबाई संस्थान घाट, ब्राह्मणशाही, वाई.
वाई शहरात ब्राह्मणशाही आणि रामडोह आळी या भागात पदपथ आणि सांडपाणी व्यवस्थेची कामे सुरू आहेत. या कामाच्या वेळी जुन्या ऐतिहासिक कामांना थोडी हानी पोहोचली आहे. मात्र, ठेकेदाराला हे बांधकाम पूर्ववत करण्याची अट घातली आहे. त्याच्याकडून हे काम लवकरच पूर्ण करून घेतले जाईल, अशी माहिती वाई मुख्याधिकारी संजीवनी दळवी यांनी दिली.
Latur News : आदर्श कॅम्पसवर कारवाईची होणार? लातूर महापालिकेच्या तपासणीकडे लक्ष
