कोरेगाव : कोरेगाव नगरपंचायतीमधील कोट्यवधी रुपयांच्या घोटाळ्यात सहभागी असणाऱ्या मुख्याधिकारी आणि सत्ताधारी नगरसेवक यांच्यावर कायदेशीर कारवाई करण्यात यावी, या मागणीसाठी राष्ट्रवादी काँग्रेसचे सामाजिक न्याय विभागाचे सातारा जिल्हाध्यक्ष रमेश उबाळे आणि नगरसेवकांचे कोरेगाव तहसील कार्यालयासमोर गेली सात दिवस ठिय्या आंदोलन सुरु आहे. या आंदोलनाला विधान परिषदेचे विरोधी पक्षनेते अंबादास दानवे यांनी भेट दिली.
कोरेगाव तालुक्यातील शिवसेनेच्या (उध्दव बाळासाहेब ठाकरे) गटाच्या वतीने आयोजित करण्यात आलेल्या बैलगाडी शर्यतीतीच्या निमित्त अंबादास दानवे कोरेगाव येथे आले होते. त्यावेळी ते बोलत होते. दानवे यांनी आमदार शशिकांत शिंदे आणि रमेश उबाळे यांच्याकडून कोरेगाव नगरपंचायतीतील मुख्याधिकारी आणि सत्तारूढ नगरसेवक यांच्या माध्यमातून कोरेगाव शहरातील कोट्यवधी रूपयांच्या गैरव्यवहाराची सविस्तर माहिती घेतली.
मंत्रालयात स्वतंत्र बैठक घेऊन कोरेगाव नगरपंचायतीतील भ्रष्टाचाराबाबत कायदेशीर कारवाई करण्यात येईल, असे आश्वासन अंबादास दानवे यांनी रमेश उबाळे आणि राष्ट्रवादी काँग्रेसच्या नगरसेवकांना दिले.
