पुणे पदवीधर मतदारसंघासाठी भाजपची तयारी सुरू; चंद्रकांत पाटलांच्या सूचनेनंतर तालुकानिहाय संपर्क यंत्रणा सज्ज

पुणे पदवीधर व शिक्षक मतदारसंघाच्या निवडणुकीच्या पार्श्वभूमीवर भाजपने सांगलीत तयारीचा आढावा घेतला. चंद्रकांत पाटलांनी पदवीधर मतदारांशी थेट संपर्क वाढवण्याच्या सूचना दिल्या.

• पुणे पदवीधर मतदारसंघासाठी भाजपची तालुकानिहाय तयारी सुरू
• चंद्रकांत पाटलांनी मतदार संपर्क आणि यादी पडताळणीच्या सूचना दिल्या
• सांगली जिल्हा बँक निवडणुकीच्या तयारीचाही बैठकीत आढावा

 

सांगली : पुणे पदवीधर मतदारसंघासाठी भारतीय जनता पक्षाची तालुकानिहाय संपर्क यंत्रणा सज्ज आहे. त्यानुसार पदाधिकाऱ्यांनी प्रत्येक तालुक्यात पदवीधर मतदारांचे संपर्क-जाळे अधिक मजबूत करण्यावर भर द्यावा, अशी सूचना भाजपचे नेते व पालकमंत्री चंद्रकांत पाटील यांनी सांगली येथे केली.

आगामी पुणे पदवीधर व शिक्षक मतदारसंघाच्या निवडणुकीसह सांगली जिल्हा मध्यवर्ती सहकारी बँकेच्या पंचवार्षिक निवडणुकीच्या पार्श्वभूमीवर सांगली येथे भाजप पदाधिकाऱ्यांची बैठक झाली. या बैठकीत दोन्ही निवडणुकांच्या तयारीचा आढावा घेण्यात आला.

पुणे पदवीधर मतदारसंघाच्या निवडणुकीच्या पार्श्वभूमीवर तालुकानिहाय पदाधिकारी व कार्यकर्त्यांनी मतदारांशी थेट संपर्क वाढवावा, मतदार यादीची पडताळणी करावी आणि प्रत्येक तालुक्यातील पदवीधर मतदारांपर्यंत संघटनात्मक यंत्रणा प्रभावीपणे पोहोचवावी, असे पाटील यांनी सांगितले. पदवीधर मतदारांच्या स्थानिक प्रश्नांची माहिती घेऊन त्यांच्याशी सातत्याने संवाद ठेवण्याच्या सूचनाही बैठकीत देण्यात आल्या.

Rohit Pawar : …तर समृद्धी महामार्ग जाम करू, रोहित पवारांचा राज्य सरकारला इशारा

पुणे विभाग पदवीधर मतदारसंघात पुणे, सातारा, सांगली, सोलापूर आणि कोल्हापूर या जिल्ह्यांचा समावेश आहे. त्यामुळे सांगली जिल्ह्यातील प्रत्येक तालुक्यात मतदार संपर्काचे नियोजन करण्यावर बैठकीत भर देण्यात आला. मतदार नोंदणी, मतदार याद्यांची पडताळणी आणि निवडणूक प्रक्रियेबाबत कार्यकर्त्यांना आवश्यक माहिती देण्याच्या दृष्टीनेही नियोजन करण्यात येत असल्याचे सांगण्यात आले.

याच बैठकीत सांगली जिल्हा मध्यवर्ती सहकारी बँकेच्या पंचवार्षिक निवडणुकीचाही आढावा घेण्यात आला. जिल्हा बँकेच्या निवडणुकीच्या अनुषंगाने संबंधित तालुका व मतदारसंघनिहाय संघटनात्मक स्थिती, पदाधिकाऱ्यांचा समन्वय आणि पुढील निवडणूक तयारीबाबत चर्चा करण्यात आली.

Sharad Pawar : ‘आपण कुठेही जाणार नाही, यायचं असेल तर आमच्यासोबत या’; शरद पवारांचा NDA चर्चेला पूर्णविराम

बैठकीस माजी मंत्री डॉ. सुरेश खाडे, आमदार सुरेश गाडगीळ, आमदार गोपीचंद पडळकर, आमदार सत्यजित देशमुख, जिल्हाध्यक्ष सम्राट महाडिक, भाजपचे वरिष्ठ नेते मकरंद देशपांडे, नीता केळकर, माजी आमदार भगवानराव साळुंखे, माजी आमदार पृथ्वीराज देशमुख, संग्राम देशमुख, माजी जिल्हा परिषद अध्यक्ष अमरसिंह देशमुख, जतचे नगराध्यक्ष डॉ. रवींद्र आरळी, माजी आमदार दिनकर पाटील यांच्यासह भाजपचे प्रमुख पदाधिकारी उपस्थित होते.

पुणे पदवीधर व शिक्षक मतदारसंघाच्या निवडणुकीच्या पार्श्वभूमीवर आगामी काळात तालुकानिहाय बैठकांचे आयोजन, मतदार संपर्क आणि संघटनात्मक आढावा यावर भर दिला जाणार असल्याचे बैठकीत स्पष्ट झाले.