Rohit Pawar Vikram Pachpute
Rohit Pawar MPSC Protest Pune : पुण्यात सुरू असलेल्या MPSC विद्यार्थ्यांच्या आंदोलनावरून राष्ट्रवादी काँग्रेसचे आमदार रोहित पवार आणि भाजप आमदार विक्रम पाचपुते यांच्यात चांगलीच जुंपली आहे. गेल्या पाच दिवसांपासून रोहित पवार हे MPSC विद्यार्थ्यांसोबत आंदोलनात बसले आहेत. याच आंदोलनावरून पाचपुते यांनी केलेल्या टीकेला रोहित पवारांनी जोरदार प्रत्युत्तर दिलं आहे. इतकंच नाही, तर 2029 च्या विधानसभा निवडणुकीत विक्रम पाचपुते निवडून येणार नाहीत, असं थेट चॅलेंजच त्यांनी दिलं आहे.
काही दिवसांपूर्वी विक्रम पाचपुते यांनी पुण्यातील MPSC आंदोलनावरून रोहित पवारांवर निशाणा साधला होता. हे आंदोलन आता विद्यार्थ्यांचं आंदोलन राहिलेलं नाही, तर ‘रोहित पवार नाईटस’ कार्यक्रम सुरू असल्यासारखं वाटत असल्याची टीका त्यांनी केली होती.
दिवसभर आंदोलनाच्या ठिकाणी केवळ 50 ते 100 लोक असतात आणि विद्यार्थ्यांनी या आंदोलनाकडे पाठ फिरवली आहे, असा दावाही पाचपुते यांनी केला होता. तसेच आंदोलनाच्या माध्यमातून राज्याला वेठीस धरण्याचं काम सुरू असून, रोहित पवार हे आंदोलनाच्या आडून ‘अर्बन नक्षल’ तयार करत असल्याचा गंभीर आरोप त्यांनी केला होता.
पाचपुतेंच्या या टीकेवर रोहित पवारांनी सोमवारी MPSC विद्यार्थ्यांसमोर बोलताना जोरदार पलटवार केला. “अहिल्यानगरमधील एक आमदार आहेत, त्यांना मी माझे मित्र समजत होतो. पण माझ्यावर टीका करण्याच्या नादात त्यांनी सामान्य कुटुंबातील, शेतकऱ्यांच्या आणि अधिकारी होण्याचं स्वप्न पाहणाऱ्या मुलांना अर्बन नक्षल म्हटलं,” अशी टीका रोहित पवारांनी केली.
तसंच, “2029 ला ही व्यक्ती विधानसभेत जाणार नाही, ही माझी जबाबदारी आहे,” असा थेट इशाराच त्यांनी दिला. तुमच्या तोंडून एखादा शब्द चुकीचा निघाला असेल तर माफी मागता आली असती. पण तुम्ही सरळ बोलून नंतर मी असं बोललोच नाही, अशी भूमिका घेत असल्याचंही रोहित पवार म्हणाले.
आता रोहित पवारांनी विक्रम पाचपुतेंना दिलेल्या थेट चॅलेंजमुळे राजकीय चर्चेला पुन्हा हवा मिळाली आहे. MPSC आंदोलनाचा मुद्दा पुढे आणखी किती तापतो आणि या वादाचा 2029 च्या निवडणुकीवर काय परिणाम होतो, हे पाहणं महत्त्वाचं ठरणार आहे.
.png "Videos"){kind=small}
