महाएल्गार आंदोलनापूर्वी सुधाकर घारे यांना अटक; खालापूरमधून अलिबागला नेल्याने कार्यकर्ते संतप्त
खालापूर येथील गोदरेज आणि टाटा स्टील कंपनीच्या गेट वर उद्या 3 सप्टेंबर रोजी महाएल्गार आंदोलन होणार आहे.घारे यांच्या नेतृत्वाखाली आयोजित करण्यात आलेल्या एल्गार आंदोलनाच्या पार्श्वभूमीवर राष्ट्रवादी काँग्रेस (अजित पवार गट) रायगड जिल्हाध्यक्ष सुधाकर घारे हे आज खालापूर पोलिस ठाण्यात चर्चेसाठी गेले होते.भूमिपुत्रांना स्थानिक उद्योगांमध्ये ८० टक्के रोजगार, स्थानिकांना ठेकेदारीत प्राधान्य तसेच कंत्राटी कामगारांच्या विविध प्रश्नांवर टाटा स्टील व गोदरेज कंपन्यांसमोर उद्या एल्गार आंदोलनाची हाक देण्यात आली आहे.
या आंदोलनासाठी मोठ्या संख्येने नागरिक व कार्यकर्ते सहभागी होण्याची शक्यता लक्षात घेऊन पोलिस प्रशासनाने खबरदारीचा उपाय म्हणून ही कारवाई केली.तेथे प्रतिबंधात्मक कारवाई करत ताब्यात घेतले. त्यानंतर त्यांना पुढील कायदेशीर कार्यवाहीसाठी अलिबाग येथे नेण्यात आले असल्याची माहिती मिळाली आहे.आंदोलनापूर्वी परिसरात कडेकोट पोलीस बंदोबस्त तैनात करण्यात आला असून संवेदनशील ठिकाणी अतिरिक्त पोलीस फौज तैनात करण्यात आली आहे. कायदा व सुव्यवस्था अबाधित राखण्यासाठी प्रशासनाने प्रतिबंधात्मक उपाययोजना अधिक कडक केल्या आहेत.
सुधाकर घारे यांना ताब्यात घेतल्यानंतर आंदोलनाच्या पार्श्वभूमीवर राजकीय वातावरण तापले असून कार्यकर्त्यांमध्ये संतापाची भावना व्यक्त होत आहे. दरम्यान,पोलिसांनी ही कारवाई पूर्णपणे प्रतिबंधात्मक स्वरूपाची असल्याचे सांगितले असून शांततेत कायदा व सुव्यवस्था राखण्याचे आवाहन नागरिकांना करण्यात आले आहे.
खालापूर येथे होणाऱ्या महाएल्गार मोर्चा साठी पाठिंबा अनेक संस्थांनी दिला आहे.दुसरीकडे याच पाठिंबा देणाऱ्या संस्था आणि राजकीय पक्ष यांना खालापूर पोलीस यांच्याकडून नोटिसा बजावण्यात येत आहेत.खालापूर पोलीस कर्जत तालुक्यात त्या त्या संस्था,राजकीय पक्ष यांना गाठून नोटीस बजावली जात आहे.त्यामुळे देखील कर्जत तालुक्यात खळबळ माजली आहे.
.png "Videos"){kind=small}
