बुधवार, 12 ऑगस्ट 2026
अजिंक्य रहाणे नव्या भूमिकेत (फोटो सौजन्य - इन्स्टाग्राम)
१५ ऑगस्ट रोजी गॉल येथे सुरू होणाऱ्या भारत-श्रीलंका कसोटी मालिकेसाठी सोनी स्पोर्ट्स नेटवर्कच्या समालोचन पॅनेलमध्ये अजिंक्य रहाणेचा समावेश करण्यात आला आहे. प्रथम श्रेणी क्रिकेटमध्ये पदार्पण केल्यापासून सुमारे १८ वर्षांची शानदार कारकीर्द नुकतीच संपवणाऱ्या रहाणेला आता समालोचक म्हणून एका नवीन भूमिकेत पाहिले जाईल. आपल्या कारकिर्दीत रहाणेने भारतासाठी ८५ कसोटी सामने खेळले, ज्यात त्याने १२ शतके आणि २६ अर्धशतकांसह ३८.४६ च्या सरासरीने ५,०७७ धावा केल्या. त्याच्या नेतृत्वाखाली भारताने २०२०-२१ मध्ये ऑस्ट्रेलियात कसोटी मालिका जिंकली होती. त्याला खेळाची खूप चांगली समज आहे, त्यामुळे चाहत्यांना त्याचे समालोचन ऐकणे आनंददायी ठरेल.
आपल्या निर्णयाची घोषणा करताना अजिंक्य रहाणेने एका प्रसिद्धीपत्रकात म्हटले, “सोनी स्पोर्ट्स नेटवर्क आणि सोनी लिव्हवर भारताच्या श्रीलंका दौऱ्यादरम्यान कसोटी समालोचनात पदार्पण करण्यास मी उत्सुक आहे. कसोटी क्रिकेट हा आपल्या खेळाचा कळस आहे आणि इतकी वर्षे या फॉरमॅटमध्ये भारताचे प्रतिनिधित्व केल्यानंतर, खेळ एका वेगळ्या दृष्टिकोनातून पाहणे हा एक बहुमान आहे. मी माझे अनुभव सांगण्यास, खेळातील बारकावे समजावून सांगण्यास आणि कसोटी सामन्याची दिशा बदलू शकणारे निर्णय, रणनीती आणि क्षणांबद्दल चाहत्यांना माहिती देण्यास उत्सुक आहे.”
तसे, केवळ समालोचनच नाही, तर अजिंक्य रहाणे लवकरच एक खेळाडू म्हणून क्रिकेटच्या मैदानावर सक्रिय दिसू शकतो. ताज्या वृत्तांनुसार, रहाणे दक्षिण आफ्रिकन टी-२० लीग, SA20 मध्ये खेळू शकतो. SA20 साठी खेळाडूंचा लिलाव लवकरच होणार आहे आणि त्यात रहाणेच्या नावाचा समावेश होण्याची चर्चा आहे. दक्षिण आफ्रिकेचा खेळाडू ख्रिस मॉरिसनेही याबाबत संकेत देणारे विधान केले आहे. येत्या काळात रहाणे किती आघाड्यांवर खेळताना दिसतो, हे पाहणे उत्सुकतेचे ठरेल.
Ajinkya Rahane आता नव्या भूमिकेत! २६ ऑगस्टपासून युरोपच्या ‘या’ लीगमध्ये खेळताना दिसणार
