शुक्रवार, 9 ऑक्टोबर 2026
Chess Tournament : निवड चाचणी बुद्धिबळ स्पर्धेत तामोजी चक्रवर्ती, अमृता लाड प्रथम
बँक ऑफ बडोदा (बीओबी), मुंबई विभाग आणि आयडियल स्पोर्ट्स अकॅडमी यांच्या सहकार्याने आयोजित मुंबई विभागीय बीओबी निवड चाचणी बुद्धिबळ स्पर्धेत (Chess Tournament) पुरुष गटात तामोजी चक्रवर्ती, तर महिला गटात अमृता लाड यांनी प्रथम क्रमांक पटकाविला. पुरुष गटात विकास महाडिक यांनी द्वितीय, तर अनिकेत सकपाळ यांनी तृतीय क्रमांक मिळविला. महिला गटात देवी शांती यांनी द्वितीय, तर इंदिरा राणे यांनी तृतीय स्थान मिळविले.
बॅलार्ड पियर येथील बीओबी क्रीडा गृहात झालेल्या या स्पर्धेतील पुरुष गटाच्या निर्णायक पाचव्या फेरीत पहिल्या पटावर तामोजी चक्रवर्ती आणि विकास महाडिक यांच्यात रंगतदार लढत झाली. विकास महाडिक यांच्या आक्रमक चालींना तामोजी यांनी चोख प्रत्युत्तर दिले. अखेर 23व्या चालीला हा सामना बरोबरीत सुटला. दोन्ही खेळाडूंनी प्रत्येकी 4.5 गुण मिळविले; मात्र सरस सरासरीच्या आधारे तामोजी यांनी प्रथम, तर विकास महाडिक यांनी द्वितीय क्रमांक मिळविला.
पुरुष गटातील दुसऱ्या पटावरील सामन्यात अनिकेत सकपाळ यांनी संकेत साकरे यांच्यावर मात केली. अनिकेत यांनी 28व्या चालीला प्रतिस्पर्ध्याच्या राजाला कोंडीत पकडत विजय मिळविला. या विजयासह त्यांनी चार गुणांची कमाई करत तृतीय क्रमांक पटकाविला.
SA vs AUS: स्टीव्ह स्मिथने डरकाळी फोडली; ऑस्ट्रेलियाच्या कसोटी इतिहासात घातला ‘हा’ धुमाकूळ
महिला गटातील निर्णायक सामन्यात अमृता लाड आणि देवी शांती यांच्यातील लढत 14 चालींनंतर बरोबरीत सुटली. दोन्ही खेळाडूंनी प्रत्येकी 2.5 गुण मिळविले. सरस सरासरीच्या आधारे अमृता यांनी प्रथम, तर देवी शांती यांनी द्वितीय क्रमांक मिळविला. अन्य एका सामन्यात इंदिरा राणे यांनी आक्रमक चालींच्या जोरावर नवेजीता गुलेरी यांना पराभूत केले. दोन गुणांसह त्यांनी तृतीय स्थान मिळविले.
स्पर्धेतील विजेत्यांचे मुंबई विभागीय सहाय्यक महाव्यवस्थापक सागर आर., क्रीडा संयोजक प्रदीप सुरोशे, मुंबई शहर बुद्धिबळ संघटनेचे सचिव राजाबाबू गजेंगी आणि शिवछत्रपती पुरस्कार विजेते लीलाधर चव्हाण यांनी अभिनंदन केले.
