Kabaddi Tournament : पंचगंगाची 'सुपर' सलामी! गोल्फादेवीवर एका गुणाने मात; शिवनेरी कबड्डी स्पर्धेत थरार
शिवांश मगरच्या पल्लेदार चढाया आणि वेदांत देसाईच्या पोलादी पकडीच्या जोरावर पंचगंगा सेवा मंडळाने शिवनेरी कबड्डी स्पर्धेच्या (Kabaddi Tournament) कुमार गटात विजयी सलामी दिली. अटीतटीच्या लढतीत पंचगंगाने गोल्फादेवी सेवा मंडळाचा 48-47 असा अवघ्या एका गुणाने पराभव केला. शेवटच्या क्षणापर्यंत रंगलेल्या या सामन्याने क्रीडाप्रेमींची उत्सुकता वाढवली.
शिवनेरी सेवा मंडळ, दादर यांच्या वतीने भवानी माता क्रीडांगणात आयोजित करण्यात आलेल्या या कबड्डी महोत्सवाचे यंदा 58 वे वर्ष आहे. मानाच्या शिवनेरी कबड्डी स्पर्धेने दरवर्षी मुंबईतील कबड्डी हंगामाला सुरुवात होते. यंदाच्या महोत्सवात विशेष व्यावसायिक, प्रथम श्रेणी व्यावसायिक, कुमार आणि महिला अशा चार गटांमध्ये सामने रंगणार आहेत. स्पर्धेच्या पहिल्या दिवशी कुमार गटातील चुरशीच्या सामन्यांनी लक्ष वेधून घेतले.
मुंबईच्या माजी महापौर आणि नगरसेविका किशोरी पेडणेकर यांच्या हस्ते स्पर्धेचे उद्घाटन झाले. यावेळी विधानसभाप्रमुख व निखिल लॉजिस्टिकचे व्यवस्थापक सुरेश कदम, स्थानिक नगरसेविका उर्मिला पांचाळ, सुनीता आयरे, हरदीपसिंग लाली, प्रशांत घाडीगावकर, मंडळाचे प्रमुख कार्यवाह व उपविभागप्रमुख नितीन पेडणेकर, अध्यक्ष सुयोगी नाईक, कार्याध्यक्ष विष्णू तांडेल, देविदास कदम, सचिन मांजरेकर, किरण मोरजकर, संजय माजरेकर, शाखाप्रमुख समीर दळवी आणि सुरेश काळे यांच्यासह अनेक मान्यवर उपस्थित होते.
IND vs WI: T20 क्रिकेटमध्ये श्रेयस अय्यरचा दबदबा! सरपंचने मोडला फिनिशर Dhoni चा ‘हा’ महारेकॉर्ड
पंचगंगा सेवा मंडळाने मध्यंतराला 24-23 अशी एका गुणाची आघाडी घेतली होती. ही आघाडी त्यांनी अखेरपर्यंत टिकवून ठेवली. गोल्फादेवी सेवा मंडळाच्या गुडेटी मोजेस आणि जितेंद्र पाटील यांनी कडवी झुंज देत उत्तरार्धात जोरदार मुसंडी मारली. मात्र, अखेरच्या क्षणी विजयाचे पारडे पंचगंगाच्या बाजूने झुकले. पुढील फेरीत पंचगंगा सेवा मंडळासमोर यश क्रीडा मंडळाचे आव्हान असेल. यश क्रीडा मंडळाला पहिल्या फेरीत पुढे चाल मिळाली होती.
कुमार गटातील अन्य सामन्यांत समर्थ स्पोर्ट्स क्लबने संस्कृती प्रतिष्ठानचा 53-38 असा 15 गुणांनी पराभव केला. समर्थकडून चढाईत विराज कोंडावळे आणि पकडीमध्ये अथर्व मोहिते यांनी प्रभावी कामगिरी केली. संस्कृती प्रतिष्ठानकडून मनोज गोरे आणि सार्थक जाधव यांनी चांगला खेळ केला.
Ranji Trophy 2026: कमबॅकचा आनंद अन्…! ;न्यूझीलंड दौऱ्याआधी टीम इंडियाचा ‘हा’ वाघ जखमी, अडचणी वाढणार?
दुसऱ्या सामन्यात गोकुळ क्रीडा मंडळाने वीर संताजी क्रीडा मंडळावर 41-38 अशी तीन गुणांनी मात केली. गोकुळकडून स्मित फाटक आणि दिव्यांश लाखन यांनी चढाईत, तर ऋषभ हजारे यांनी पकडीमध्ये मोलाचे योगदान दिले.
अन्य लढतींमध्ये बंड्या मारुती संघाने नवनाथ क्रीडा मंडळाचा 46-37 असा, तर आकांक्षा क्रीडा मंडळाने एफडर्स युनायटेडचा 33-23 असा पराभव केला. सिद्धी प्रभा फाउंडेशनने गणेश स्पोर्ट्स क्लबवर 55-25 असा 30 गुणांनी दणदणीत विजय मिळवत पुढील फेरीत प्रवेश केला.
.png "Videos"){kind=small}
