फोटो सौजन्य - सोशल मिडिया
आयपीएल 2026 सुरू व्हायला 10 दिवस शिल्लक आहेत, भारतामध्ये पुन्हा एकदा क्रिकेटचा उत्सव सुरू होणार आहे. बीसीसीआयने पहिल्या 20 सामन्यांचे वेळापत्रक जाहीर केले आहे. काही राज्यांमध्ये निवडणूका असल्यामुळे बाकीचे वेळापत्रक हे निवडणूकीच्या वेळापत्रकानुसार जाहीर केले जाणार आहे. सनरायझर्स हैदराबादचा नियमित कर्णधार पॅट कमिन्स पाठीच्या दुखापतीतून पूर्णपणे सावरलेला नाही आणि तो आयपीएल २०२६ साठी संघात कधी सामील होईल हे अद्याप स्पष्ट झालेले नाही. कमिन्सच्या जागी भारतीय स्टार इशान किशन एसआरएचचे नेतृत्व करताना दिसू शकतो.
पॅट कमिन्स दुखापतीमुळे ॲशेस मालिकेतील अनेक सामने खेळू शकला नाही आणि तो २०२६ च्या टी२० विश्वचषकातूनही बाहेर आहे. टाइम्स ऑफ इंडियामधील एका वृत्तानुसार, सनरायझर्स हैदराबाद आगामी हंगामासाठी कर्णधारपद इशान किशनकडे सोपवू शकते. अभिषेक शर्माची संघाच्या उपकर्णधारपदी नियुक्ती केली जाऊ शकते. सनरायझर्स हैदराबाद आपल्या आयपीएल २०२६ मोहिमेची सुरुवात २८ मार्च रोजी रॉयल चॅलेंजर्स बंगळूर (RCB) विरुद्ध करेल. हा सामना बंगळूर येथील एम. चिन्नास्वामी स्टेडियमवर खेळला जाईल.
एसआरएच व्यवस्थापन इशान किशनच्या कर्णधारपदाचा अनुभव लक्षात घेऊन हा निर्णय घेऊ शकते. किशनने नुकतेच झारखंडला सय्यद मुश्ताक अली ट्रॉफीचे विजेतेपद मिळवून दिले. या काळात किशनने फलंदाजीतही उत्कृष्ट कामगिरी केली. याशिवाय, किशनला भारतीय १९ वर्षांखालील संघाचे कर्णधारपद भूषवण्याचाही अनुभव आहे, त्याने १९ वर्षांखालील विश्वचषक स्पर्धेत भारतीय संघाचे नेतृत्व केले होते.
किशन सध्या उत्कृष्ट फॉर्ममध्ये असून कर्णधारपदासाठी एक प्रबळ दावेदार म्हणून उदयास आला आहे. संघात सामील झाल्यावर हा ऑस्ट्रेलियन वेगवान गोलंदाज कर्णधारपदाची जबाबदारी स्वीकारू शकतो. सनरायझर्स हैदराबाद २०१६ नंतर प्रथमच आयपीएल चॅम्पियन बनण्याचे ध्येय ठेवेल.
🚨CAPTAIN ISHAN KISHAN FOR SRH IN IPL 2026🚨 – Ishan Kishan is the front runner to be Captain of Sunrisers Hyderabad as there is no clarity on Pat Cummins. [Pratyush Raj] pic.twitter.com/kt2QpUl43l — Sam (@Cricsam01) March 16, 2026
ईशान किशनसाठी हा आयपीएलचा हंगाम उत्कृष्ट ठरला आहे. त्याने आतापर्यंत तीन फ्रँचायझींचे प्रतिनिधित्व केले आहे. ११९ सामन्यांमध्ये, या डावखुऱ्या फलंदाजाने २९.१० च्या सरासरीने आणि १३७.६४ च्या स्ट्राइक रेटने २९९८ धावा केल्या आहेत. या काळात किशनने एक शतक आणि १७ अर्धशतके झळकावली आहेत. यष्टीमागे त्याने ५९ झेल घेतले असून पाच वेळा यष्टीचीत केले आहे.
२०२५ मध्ये, सनरायझर्स हैदराबादने लिलावात किशनला ११.२५ कोटी रुपयांना विकत घेतले. या भारतीय फलंदाजाने १४ सामन्यांमध्ये १५२.५८ च्या स्ट्राइक रेटने ३५४ धावा केल्या, ज्यात एका शतक आणि एका अर्धशतकाचा समावेश आहे. त्याने आपल्या आक्रमक शैलीने स्वतःची योग्यता सिद्ध केली.
