सोमवार, 2 नोव्हेंबर 2026
BCCI Announces India A Squad for Rising Asia cup
इंडिया ‘अ’ च्या फलंदाजी विभागात अनुभव आणि युवा खेळाडूंचा समावेश आहे. या संघात १५ वर्षीय वैभव सूर्यवंशीचा समावेश आहे. वैभवने अलीकडेच आपल्या स्फोटक फलंदाजीने लक्ष वेधून घेतले आहे. परंतु, न्यूझीलंडविरुद्धच्या टी-२० मालिकेत वैभवला केवळ दोन सामन्यांमध्ये खेळण्याची संधी मिळाली. संघाच्या आघाडीच्या फळीत अभिषेक शर्मा आणि वैभव सूर्यवंशी यांच्यासारखे स्फोटक फलंदाज आहेत. आपल्या आक्रमक फलंदाजीने सुरुवातीच्या षटकांमध्येच प्रतिस्पर्धी संघावर दबाव टाकण्याची क्षमता या दोघांमध्ये आहे.
दरम्यान, मधली फळी मजबूत करण्यासाठी प्रभसिमरन सिंग, कुमार कुशाग्र आणि रिंकू सिंग यांसारख्या खेळाडूंची निवड करण्यात आली आहे. सूर्यांश शेडगेचाही संघात समावेश आहे. विशेषतः रिंकू सिंगकडून शेवटच्या षटकांमध्ये जलद धावा करून संघाला कठीण परिस्थितीत एक मोठी धावसंख्या उभारण्यास मदत करण्याची अपेक्षा असेल.
संघाचे अष्टपैलू खेळाडूंचे पर्यायही मजबूत दिसत आहेत. निवड समितीने शाहबाज अहमद, विप्राज निगम, हर्ष दुबे आणि तनुष कोटियन यांचा समावेश केला आहे. हे खेळाडू फलंदाजी आणि गोलंदाजी या दोन्हीमध्ये योगदान देऊ शकतात. यामुळे कर्णधार तिलक वर्मा यांना अंतिम ११ खेळाडूंमध्ये संतुलन साधण्यासाठी अनेक पर्याय उपलब्ध होतील. या अष्टपैलू खेळाडूंची फिरकी गोलंदाजी कतारच्या परिस्थितीतही उपयुक्त ठरू शकते.
वेगवान गोलंदाजी विभागात हर्षित राणा हे सर्वात प्रमुख नाव आहे. तो आपल्या वेग आणि आक्रमक गोलंदाजीने संघाच्या वेगवान गोलंदाजीचे नेतृत्व करेल. प्रिन्स यादव आणि अर्शद खान यांचाही संघात समावेश करण्यात आला आहे.
स्पर्धेच्या स्वरूपानुसार, भारत ‘अ’ संघाला गट ‘ब’ मध्ये ठेवण्यात आले आहे. या गटात भारत, संयुक्त अरब अमिरात (UAE), नेपाळ आणि पाकिस्तान ‘अ’ यांचा समावेश आहे. गट ‘अ’ मध्ये बांग्लादेश ‘अ’, श्रीलंका ‘अ’, अफगाणिस्तान ‘अ’ आणि हाँगकाँग यांचा समावेश असेल.
अभिषेक शर्मा, वैभव सूर्यवंशी, प्रभसिमरन सिंग (यष्टीरक्षक), तिलक वर्मा, रजत पाटीदार, रिंकू सिंग, कुमार कुशाग्रा, सूर्यांश शेडगे, शाहबाज अहमद, विपराज निगम, हर्ष दुबे, तनुष कोटियन, हर्षित राणा, प्रिन्स यादव, अर्शद खान.
