आज रात्री 'तबाही' अटळ? Donald Trump यांच्या शेवटच्या धमकीनंतरही इराण झुकण्यास नकार (Photo Credit- Ai)
इराणी प्रसारमाध्यम ‘तेहरान टाइम्स’ने दिलेल्या वृत्तानुसार, इराणने अमेरिकेसोबतचे सर्व राजनैतिक (Diplomatic) आणि अप्रत्यक्ष चर्चेचे मार्ग (Indirect Channels) पूर्णपणे थांबवले आहेत. कोणत्याही प्रकारच्या संदेशांची देवाणघेवाण करण्यावरही इराणने बंदी घातली आहे. “आता चर्चेची वेळ संपली असून परिस्थिती केवळ संघर्षाकडे जात आहे,” असा पवित्रा इराणने घेतला आहे.
दुसरीकडे, डोनाल्ड ट्रम्प यांनी सोशल मीडिया प्लॅटफॉर्म ‘ट्रुथ सोशल’वर इराणला उद्देशून एक अत्यंत गंभीर आणि सूचक पोस्ट केली आहे. ट्रम्प यांनी लिहिले की, “आज रात्री एक संपूर्ण संस्कृती संपुष्टात येईल. मला असे घडावे असे वाटत नाही, पण कदाचित ते घडेल. मात्र, आता तिथले शासन बदललेले असून ते पूर्वीपेक्षा अधिक समंजस आणि कमी कट्टरपंथी आहे, त्यामुळे कदाचित काहीतरी विलक्षणही घडू शकते. जगाच्या प्रदीर्घ आणि कठीण इतिहासातील हा सर्वात महत्त्वाचा क्षण ठरेल. ४७ वर्षांची खंडणी, भ्रष्टाचार आणि मृत्यूचा खेळ आज रात्री संपेल. ईश्वर इराणच्या महान जनतेवर कृपा करो!”
अमेरिकेच्या हल्ल्याला प्रत्युत्तर देताना इराणच्या ‘इस्लामिक रिव्होल्युशनरी गार्ड कॉर्प्स’ने (IRGC) कठोर भूमिका मांडली आहे. इराणने म्हटले आहे की, जर अमेरिकन “दहशतवादी” सैन्याने आमची ‘रेड लाईन’ ओलांडली, तर आमचा प्रतिसाद केवळ या क्षेत्रापुरता मर्यादित राहणार नाही. इराणने स्पष्ट केले की, आम्ही आतापर्यंत केवळ लष्करी तळांना लक्ष्य केले आहे, पण जर आमच्या नागरी सुविधांवर हल्ले झाले, तर आम्ही चोख प्रत्युत्तर देण्यास अजिबात संकोच करणार नाही. अमेरिकेला साथ देणाऱ्या शेजारील देशांनाही इराणने इशारा दिला आहे. “आतापर्यंत आम्ही चांगला शेजारी म्हणून संयम पाळला होता, पण आता आमच्या मनातील सर्व संकोच दूर झाला आहे,” असे IRGC ने म्हटले आहे.
होर्मुजची सामुद्रधुनी बंद राहिल्यास जागतिक तेल पुरवठा विस्कळीत होण्याची भीती आहे. आधीच कच्च्या तेलाच्या किमती 100 डॉलरच्या पार गेल्या असताना, आज रात्री होणाऱ्या घडामोडींवर संपूर्ण जगाचे आणि शेअर बाजाराचे लक्ष लागून राहिले आहे.
