शुक्रवार, 23 ऑक्टोबर 2026
Keir Starmer: पंतप्रधानपद सोडल्यानंतर ७१ दिवसांनी कीर स्टारमर यांचा खासदारकीला रामराम; ११ वर्ष संसदीय कारकिर्दीला पूर्णविराम ( फोटो सौजन्य : सोशल मीडिया )
ब्रिटनच्या राजकारणातून एक अत्यंत महत्त्वाची आणि मोठी बातमी समोर येत आहे. ब्रिटनचे माजी पंतप्रधान आणि लेबर पार्टीचे ज्येष्ठ नेते कीर स्टारमर (Keir Starmer) यांनी आपल्या खासदारकीचा राजीनामा देऊन सक्रिय संसदीय राजकारणातून पायउतार होण्याचा निर्णय घेतला आहे. पंतप्रधानपदावरून हटल्यानंतर अवघ्या ७१ दिवसांनी त्यांनी लंडनमधील ‘हॉलबॉर्न आणि सेंट पॅनक्रस’ (Holborn and St Pancras) या आपल्या पारंपरिक मतदारसंघाचे प्रतिनिधित्व सोडण्याची घोषणा केली. या निर्णयामुळे २०१५ पासून सुरू झालेल्या त्यांच्या ११ वर्षांच्या प्रदीर्घ संसदीय कारकिर्दीचा प्रवास अधिकृतपणे थांबला आहे.
आपल्या राजीनाम्याची घोषणा करताना कीर स्टारमर यांनी सांगितले की, उन्हाळ्याच्या सुट्ट्यांच्या काळात त्यांनी स्वतःच्या राजकीय भवितव्यावर आणि वाटचालीवर सखोल विचार मंथन केले. या विचारांती, संसदीय राजकारणातून बाहेर पडून नव्या पिढीला तसेच नव्या नेतृत्वाला पुढे येण्याची संधी देण्याची हीच योग्य वेळ असल्याचे त्यांना वाटले. खासदारकी सोडली असली तरी संसदेबाहेर राहून सार्वजनिक जीवनात, आंतरराष्ट्रीय राजकारणात आणि जागतिक पातळीवरील महत्त्वाच्या व्यासपीठांवर आपले योगदान देणे सुरुच ठेवणार असल्याचे त्यांनी स्पष्ट केले आहे.
जागतिक घडामोडी संबंधित बातम्या वाचण्यासाठी येथे क्लिक करा : Israel-Hamas War: हमासला सर्वात मोठा झटका; उत्तर गाझातून लष्करी कमांडर अल-अरबीदला इस्रायली सैन्याने उचलले
कीर स्टारमर हे २०१५ च्या सार्वत्रिक निवडणुकीत हॉलबॉर्न आणि सेंट पॅनक्रस मतदारसंघातून पहिल्यांदा हाऊस ऑफ कॉमन्स (ब्रिटनचे संसद भवन) वर निवडून आले होते. त्यांनी लेबर पार्टीचे दिग्गज नेते फ्रँक डॉब्सन यांचा राजकीय वारसा यशस्वीपणे पुढे चालवला. खासदार म्हणून आपल्या ११ वर्षांच्या कार्यकाळात त्यांनी मतदारसंघातील सामाजिक कल्याण, कामगारांचे हक्क, भाडेकरूंच्या सुरक्षेचे कायदे आणि गरिबीविरोधात अनेक महत्त्वपूर्ण पावले उचलली. शाळांमध्ये मोफत नाश्ता व भोजन (Breakfast Club), किमान वेतनात सुधारणा आणि महिलांवरील हिंसाचार रोखण्यासाठी त्यांनी उभारलेले लढे हे त्यांच्या कार्यकाळातील प्रमुख टप्पे मानले जातात.
२०२० मध्ये लेबर पार्टीचे नेतृत्व हाती घेतल्यानंतर स्टारमर यांनी पक्षाला नव्या उर्जेसह उभे केले आणि २०२४ च्या सार्वत्रिक निवडणुकीत ऐतिहासिक बहुमत मिळवून ब्रिटनचे पंतप्रधान बनले. तथापि, राजकीय घडामोडी आणि पक्षीय समीकरणांनंतर त्यांनी जुलैमध्ये पंतप्रधानपदाचा राजीनामा दिला होता. सुरुवातीला त्यांनी खासदार म्हणून कार्यकाळ पूर्ण करण्याचे संकेत दिले होते, परंतु अखेर त्यांनी खासदारकी सोडत पूर्णविराम देण्याचा निर्णय घेतला.
स्टारमर यांच्या राजीनाम्यामुळे हॉलबॉर्न आणि सेंट पॅनक्रस या जागेवर लवकरच पोटनिवडणूक घेतली जाणार आहे. हा मतदारसंघ ऐतिहासिकदृष्ट्या लेबर पार्टीचा मजबूत बालेकिल्ला मानला जातो. २०२४ च्या निवडणुकीत स्टारमर यांनी ही जागा ११,००० हून अधिक मतांच्या फरकाने जिंकली होती. मात्र, अलीकडच्या काळात झालेल्या स्थानिक स्वराज्य संस्थांच्या निवडणुकीत ग्रीन पार्टीने (Green Party) या भागात मोठी आगेकूच केली आहे. राजकीय विश्लेषकांच्या मते, ग्रीन पार्टीचे प्रमुख नेते जॅक पोलान्स्की (Zack Polanski) या पोटनिवडणुकीत रिंगणात उतरण्याची दाट शक्यता असून, यामुळे लेबर पार्टीसमोर या बालेकिल्ल्यात मोठे आव्हान उभे ठाकू शकते.
जागतिक घडामोडी संबंधित बातम्या वाचण्यासाठी येथे क्लिक करा : Nepal flood: नेपाळमध्ये पुरामुळे 1,127 जणांचा दुर्दैवी अंत, हजारो बेपत्ता; भारत आणि अमेरिकेकडून आपत्कालीन मदत सामग्री दाखल
स्टारमर यांच्या या निर्णयावर विरोधी पक्षातील कंझर्व्हेटिव्ह पार्टीने (Conservative Party) जोरदार निशाणा साधला आहे. कंझर्व्हेटिव्ह पक्षाचे अध्यक्ष केविन हॉलिनरेक्स यांनी टीका करताना म्हटले की, “खासदार म्हणून राहण्याचे आश्वासन देऊन अचानक राजीनामा देणे हा स्टारमर यांचा राजकीय यू-टर्न आहे. त्यांच्या या निर्णयामुळे सर्वसामान्य करदात्यांवर नाहक पोटनिवडणुकीचा अतिरिक्त आर्थिक भार पडणार आहे.”
दुसरीकडे, स्टारमर यांनी आपल्या भविष्यातील योजना स्पष्ट करताना सांगितले की, ते यापुढे आंतरराष्ट्रीय मुत्सद्देगिरी, जागतिक सुरक्षा, आंतरराष्ट्रीय व्यापार आणि तंत्रज्ञानाच्या क्षेत्रातील बदलांवर अधिक लक्ष केंद्रित करतील. याशिवाय महिला व मुलींवरील हिंसाचाराविरुद्ध चालवल्या जाणाऱ्या जागतिक मोहिमेत ते सक्रिय सहभाग नोंदवतील. लेबर पक्षाच्या नव्या संसद सदस्याला आणि सरकारला आपला पूर्ण पाठिंबा राहील, असा विश्वासही त्यांनी शेवटी व्यक्त केला.
