मंगळवार, 3 नोव्हेंबर 2026
Strait Of Hormuz: होर्मुझच्या सामुद्रधुनीत इराणी जहाजावर क्षेपणास्त्र हल्ला; १ ठार, ३ जण गंभीर जखमी; जागतिक तेल पुरवठ्याला धोका ( फोटो सौजन्य : सोशल मीडिया )
मध्य पूर्वेतील सागरी क्षेत्रात पुन्हा एकदा युद्धाचे ढग घनदाट झाले आहेत. जागतिक ऊर्जा सुरक्षेच्या दृष्टीने अत्यंत संवेदनशील मानल्या जाणाऱ्या होर्मुझच्या सामुद्रधुनीत (Strait Of Hormuz) एका इराणी व्यापारी जहाजावर अज्ञातांकडून भीषण क्षेपणास्त्र हल्ला करण्यात आला आहे. या दुर्दैवी घटनेत जहाजावरील एका व्यक्तीचा जागीच मृत्यू झाला असून इतर तीन जण गंभीर जखमी झाले आहेत. या हल्ल्यामुळे संपूर्ण पर्शियन आखात आणि ओमानच्या आखातातील सागरी वाहतुकीवर भीतीचे सावट पसरले आहे.
स्थानिक प्रशासनाने दिलेल्या माहितीनुसार, ही घटना रविवारी पहाटे ५ वाजेच्या सुमारास घडली. केशम परगण्याचे गव्हर्नर हुसेन अमीरतिमौरी यांनी इराणी प्रसारमाध्यमांना दिलेल्या माहितीनुसार, ‘व्हर्गो ट्रान्सपोर्ट’ कंपनीशी संबंधित हे व्यापारी जहाज आपल्या निश्चित मार्गाने जात असताना केशम बेट आणि हेंगम बेटाच्या मध्यभागी असलेल्या शिब द्राझ किनाऱ्याजवळ त्यावर अचानक एका अज्ञात प्रक्षेपकाने किंवा क्षेपणास्त्राने मारा केला. हल्ल्याचा झटका इतका तीव्र होता की जहाजावर मोठी हानी झाली. घटनेची माहिती मिळताच स्थानिक आपत्कालीन पथकांनी घटनास्थळी धाव घेऊन जखमींना तातडीने जवळच्या रुग्णालयात उपचारासाठी दाखल केले.
जागतिक घडामोडी संबंधित बातम्या वाचण्यासाठी येथे क्लिक करा : US Politics: ‘व्हान्स विलक्षण आहेत, पण…’ 2028च्या निवडणुकीची चर्चा तापली; JD Vance यांच्या उमेदवारीवर ट्रम्प यांचे मोठे विधान
या घटनेचे गांभीर्य लक्षात घेऊन युनायटेड किंगडम मरिटाइम ट्रेड ऑपरेशन्स (UKMTO) या आंतरराष्ट्रीय सागरी सुरक्षा नियामक संस्थेने तातडीने एक अधिकृत सूचना जारी केली आहे. या भागात प्रवास करणाऱ्या सर्व आंतरराष्ट्रीय व्यापारी जहाजांना उच्च सतर्कता बाळगण्याचे आणि कोणत्याही संशयास्पद हालचालीची त्वरित माहिती देण्याचे निर्देश दिले गेले आहेत. होर्मुझच्या सामुद्रधुनीतील वाढत्या लष्करी कारवायांमुळे सामान्य व्यापारी जहाजांच्या सुरक्षेचा प्रश्न ऐरणीवर आला आहे.
गेल्या काही काळापासून अमेरिका आणि इराण यांच्यातील लष्करी तणाव अभूतपूर्व पातळीवर पोहोचला आहे. अमेरिकेचे नौदल (CENTCOM) इराणच्या बंदरांवर नाकेबंदी कायम ठेवत इराणी जहाजांवर बारीक लक्ष ठेवून आहे. दुसरीकडे, इराणनेही अमेरिकेच्या युद्धनौकांना लक्ष्य करत बॅलिस्टिक क्षेपणास्त्रांचा वापर तीव्र केला आहे. या ताज्या हल्ल्याबाबत अमेरिकन लष्कराकडून अद्याप कोणतेही थेट अधिकृत वक्तव्य आलेले नाही, मात्र या भागातील प्रत्येक लष्करी हालचालीमुळे आखाती देशांमध्ये युद्धाची ठिणगी पडण्याची शक्यता वाढली आहे.
जागतिक घडामोडी संबंधित बातम्या वाचण्यासाठी येथे क्लिक करा : Dario Amodei: AIची आंधळी शर्यत थांबवा! अँथ्रोपिकचे सीईओ डारिओ अमोदेई यांचा इशारा; मानवी सुरक्षिततेसाठी ‘स्पीड ब्रेक’ आवश्यक
होर्मुझची सामुद्रधुनी हा ओमान आणि इराण यांच्यातील एक अत्यंत अरुंद पण जागतिक अर्थकारणासाठी अतिशय महत्त्वाचा सागरी मार्ग आहे. जगातील एकूण कच्च्या तेलाच्या पुरवठ्यापैकी सुमारे २० टक्के पुरवठा एकट्या या मार्गावरून होतो. इराणने अलीकडेच असा प्रस्ताव ठेवला आहे की, पर्शियन आखातात प्रवेश करणाऱ्या सर्व जहाजांनी इराणी सागरी हद्दीचाच वापर करावा आणि या मार्गावरून जाणाऱ्या जहाजांवर ‘पारगमन शुल्क’ (Transit Fee) आकारले जावे. इराणच्या या धोरणामुळे आंतरराष्ट्रीय पातळीवर आधीच असंतोष होता, त्यातच या क्षेपणास्त्र हल्ल्यामुळे कच्च्या तेलाच्या जागतिक किमतींवर आणि पुरवठा साखळीवर विपरीत परिणाम होण्याची दाट शक्यता निर्माण झाली आहे.
