शनिवार, 7 नोव्हेंबर 2026
फ्रान्समध्ये महागाईचा उद्रेक; लोक रस्त्यावर, विद्यार्थी-कर्मचारी मोठ्या संख्येने सहभागी
पॅरिस : फ्रान्समध्ये महागाई, कमी पगार आणि शिक्षण बजेटमधील कपातीमुळे निर्माण झालेला जनतेचा संताप रस्त्यावर उतरला. देशभरात ६ लाखांहून अधिक लोक रस्त्यावर उतरले. पॅरिसपासून ल्योन आणि मार्सेलपर्यंत मोठ्या रॅली काढण्यात आल्या. विद्यार्थी, कर्मचारी आणि निवृत्त लोकांनी यात सहभाग घेतला.
काही शहरांमध्ये संघर्ष झाला असला तरी, बहुतेक निदर्शने शांततापूर्ण राहिली. या चळवळीची सुरुवात सप्टेंबरमध्ये एका हायस्कूलमधील कर्मचाऱ्यांच्या कमतरतेविरोधातील निषेधाने झाली. सुरुवातीला, विद्यार्थी शिक्षणासाठी वाढीव बजेटची मागणी करत होते. हळूहळू, वाढत्या महागाईच्या पार्श्वभूमीवर पगार आणि पेन्शनमध्ये वाढीची मागणी करत कर्मचारीही यात सामील झाले. प्रसारमाध्यमांच्या वृत्तानुसार, फ्रेंच कामगार संघटनांचे म्हणणे आहे की, इंधन, अन्न, भाडे, गॅस आणि विजेच्या किमती वाढत असताना, लोकांचे उत्पन्न त्याच गतीने वाढत नाही. या निषेधामुळे, फ्रान्समधील जवळपास एक तृतीयांश हायस्कूल बंद राहिली किंवा त्यांचे कामकाज सामान्यपणे चालू शकले नाही.
काही शाळांमध्ये विद्यार्थ्यांनी रस्ते अडवले, तर इतर अनेक भागांमध्ये शिक्षकांनी संप पुकारला. काही भागांमध्ये सार्वजनिक वाहतुकीवरही परिणाम झाला. पॅरिसचा प्रसिद्ध आयफेल टॉवरही गुरुवारी बंद ठेवण्यात आला होता. पॅरिसमधील निदर्शनादरम्यान, विद्यार्थी असमानता आणि भविष्याबद्दल चिंता व्यक्त करणारे फलक घेऊन उभे असलेले दिसले. कर्मचाऱ्यांनी चांगल्या वेतनाची आणि निवृत्ती वेतनाची मागणी केली.
70000 पोलिस तैनात
या आदोलनांच्या पार्श्वभूमीवर कडक सुरक्षा व्यवस्था करण्यात आली होती. देशभरात ७०,००० पोलीस कर्मचारी तैनात करण्यात आले होते. त्यांना पाठिंबा देण्यासाठी चिलखती चाहने, ड्रोन आणि हेलिकॉप्टरही तैनात करण्यात आले होते. तथापि, ही आंदोलने नेहमीच शांततापूर्ण नव्हती, प्रसारमाध्यमांच्या वृत्तानुसार, रेनमध्ये काही मुखवटाधारी लोकांनी रस्ते अडवण्याचा प्रयत्न केला. पोलिसांवर स्टीलचे गोळे फेकण्यात आल्याचेही अधिकाऱ्यांनी सांगितले.
सरकारवरील दबाव वाढतोय
सरकारवरील दबाव वाढत आहे. फ्रान्समधील कामगार संघटनानी इशारा दिला आहे
की, देश मंदीच्या दिशेने वाटचाल करत आहे आणि कंपन्यांमधील कर्मचारी कपातीच्या योजना वाढत आहेत. लोकांच्या दैनंदिन समस्या सोडवण्यात सरकार अपयशी ठरले आहे, असे संघटनांचे म्हणणे आहे. यामुळे, हे आंदोलन आता केवळ विद्यार्थ्यांपुरते मर्यादित राहिलेले नाही; त्यात समाजातील विविध घटकांचा समावेश झाला आहे.
FAQ
1. फ्रान्समध्ये नागरिकांनी आंदोलन का केले?
वाढती महागाई, कमी पगार आणि शिक्षण बजेटमधील कपातीविरोधात नागरिकांनी आंदोलन केले.
2. आंदोलनात किती लोक सहभागी झाले?
देशभरात ६ लाखांहून अधिक नागरिक सहभागी झाल्याचे वृत्त आहे.
3. कोणत्या शहरांमध्ये मोठ्या रॅली काढण्यात आल्या?
पॅरिस, ल्योन आणि मार्सेल या शहरांमध्ये मोठ्या रॅली काढण्यात आल्या.
